01 Jun 2016, 12:19
ކާބޯތަކެތި ވިއްކާ ހުރިހާ ވިޔަފާރިއެއް ބަލައި ފާސްކުރުމަށް މޯލްޑިވްސް ފުޑް އެންޑް ޑުރަގް އޮތޯރިޓީ (އެމްއެފްޑީއޭ) އިން ކުރިއަށްގެންދާ އޮޕަރޭޝަންގެ ދަށުން މާލޭގެ 50 ޕަސެންޓް ފިހާރަ ޗެކްކޮށްފައިވާ އިރު ގިނަ މައްސަލަތަކެއް ފާހަގަވެފައިވާ ކަމަށް އެ އޮތޯރިޓީން ބުނެފި އެވެ.
މީގެ ދެ ހަފްތާ ކުރިން ފެށި އޮޕަރޭޝަނާ ގުޅޭ ގޮތުން އެމްއެފްޑީއޭގެ ސީނިއާ ސައިންޓިފިކް އޮފިސާ ސާޖިދާ މުހައްމަދު "ސަން"އަށް މިއަދު ވިދާޅުވީ މާލޭގެ 50 ޕަސެންޓް ފިހާރަތައް ބަލައި ފާސްކޮށް ނިމިފައިވާ އިރު ރޯދައިގެ ކުރިން މާލޭގެ ހުރިހާ ފިހާރައެއް ބަލައި ފާސްކޮށް ނިމޭނެ ކަމަށެވެ.
އޭނާ ވިދާޅުވީ މިހާތަނަށް ބެލިބެލުމުން ފިހާރަތަކުގައި ތަކެތި ބެހެއްޓުމާއި މުއްދަތު ހަމަވާ ސާމާނު ވިއްކުމުގެ އިތުރުން ސާފުތާހިރުކަމުގެ މައްސަލަތައް ފާހަގަވެފައިވާ ކަމަށެވެ.
"އެކަށީގެން ނުވާ ތަންތަނުގައި ޕުރޮސެސްކުރުމުގެ މައްސަލަތައް އެބައުޅޭ، ކުކުޅު ކޮށުމާއި އެކަހަލަ ކަންކަން ތަނާ އެކަށީގެންނުވާ ސާފްތާހިރުކަން ނުހިފެއްޓޭ ކަހަލަ ތަންތަނުގައި މިކަހަލަ މަސައްކަތް ކުރާނަން." ސާޖިދާ ވިދާޅުވި އެވެ.
އޭނާ ވިދާޅުވީ ފާހަގަކުރެވޭ ކަންކަން އިސްލާހު ކުރުމަށް ލިޔުމަކުން ހުށައަޅަމުންދާ އިރު ދެން ފަށާ ބުރުގައި މައްސަލަ ހުރިތަންތަން އިސްލާހުކޮށްފައި ހުރިތޯ ބަލައި އެކަންކަން އިސްލާހު ނުކުރާނަމަ ފިޔަވަޅު އަޅާނެ ކަމަށެވެ.
އެއޮޕަރޭޝަންގެ ދަށުން މުޅި ރާއްޖޭގެ ހުރިހާ ފިހާރައެއް ބަލައި ފާސްކުރުމަށް ވަނީ ނިންމައިފަ އެވެ.