31 May 2016, 20:28
ކުރިޔަށް އޮތް ރަމަޟާން މަހު މާލޭގައި ފެން ކޭހާއި ގޭސްފުޅި ގޭގެއަށާއި ތަންތަނަށް ޑެލިވާ ކުރުމަށް ވަކި ވަގުތުތަކެއް ކަނޑައަޅައިފި އެވެ.
މި ވަގުތުތައް ކަނޑައެޅީ، އެންވާރަމެންޓް މިނިސްޓްރީ އާއި އިކޮނޮމިކް މިނިސްޓްރީންނެވެ. ދެ މިިނިސްޓްރީން ވެސް މިގޮތަށް ކަނޑައެޅީ، ރޯދަ މަހު މާލޭގެ މަގުތަކުގެ ޓްރެފިކަށް ލުޔެއް ގެނައުމަށް ކަމަށް އެ މިނިސްޓްރީތަކުން ބުނެ އެވެ.
އިކޮނޮމިކް މިނިސްޓްރީން މިއަދު ކުރި އިއުލާނެއްގައި ބުނީ، ރޯދަ މަހު ގޭސް ޑެލިވާ ކުރުމުގެ ޚިދުމަތް ދޭންޖެހޭނީ ކޮންމެ ދުވަހަކު ހެނދުނު 10:00 އިން ހަވީރު 4:00 އަށް ކަމަށާއި، ހުކުރު ދުވަސްދުވަހު މެންދުރު 1:30 އިން ހަވީރު 4:00 އަށް ކަމަށެވެ. އަދި ރޭގަނޑުގެ ވަގުތުގައި ގޭސް ކުންފުނިތަކުން ގޭސްފުޅި ޑެލިވާ ކުރަން ޖެހޭނީ ރޭގަނޑު 8:00 އިން 11:00 އަށް ކަމަށް އެ މިނިސްޓްރީން ބުނެ އެވެ.
ފެން ޑެލިވާ ކުރުމަށް އެންވާރަމެންޓް މިނިސްޓްރީން ކަނޑައެޅި ވަގުތުތަކަކީ ހެނދުނު 9:00 އިން މެންދުރުފަހު 3:00 އަށް، އަދި ރޭގަނޑު 9:00 އިން ފެށިގެން ފިހާރަތައް ބަންދު ކުރުމާ ހަމައަށެވެ.
އެ ދެ މިނިސްޓްރީން ވެސް ވަނީ، މާލޭގައި ގޭހާއި ފެން ޑެލިވާ ކުރުމުގެ ޚިދުމަތް ދޭ ކުންފުނިތަކުން އެ އެންގުމާ އެއްގޮތަށް އަމަލު ކުރުމަށް އިލްތިމާސް ކޮށްފަ އެވެ.