31 May 2016, 15:45
ރާއްޖޭގެ އިސްލާމިކް ޔުނިވާސިޓީ (އައިޔޫއެމް) އަށް ފަންނީ އަދި މާލީ އެހީތެރިކަން ފޯރުކޮށްދިނުމަށް ވޯލްޑް ފެޑަރޭޝަން އޮފް އަރަބިކް އިސްލާމިކް އިންޓްނޭޝަނަލް ސްކޫލްސް އާއެކު އެއްބަސްވެއްޖެ އެވެ.
އެ އެއްބަސްވުމުގައި ސޮއިކޮށްފައިވަނީ، އިސްލާމިކް މިނިސްޓަރުގެ ދައުވަތަކަށް ރާއްޖެ މިހާރު ވަޑައިގަތް އުޅުއްވާ އެ އިންސްޓިޓިއުޓްގެ ވަފްދުގެ ސެކްރެޓަރ ޖެނެރަލް، ޕްރޮފެސަރ އަބްދުލް ފައްތާހު ސުލައިމާން އަހުމަދު އަބްދުލް ފައްތާހު އައިޔޫއެމް އަށް މިއަދު ކުރެއްވި ރަސްމީ ޒިޔާރަތުގައެވެ.
އިސްލާމިކް ޔުނިވާސިޓީ އިން ބުނީ، އައިޔޫއެމް އާއި ފެޑަރޭޝަން އޮފް އަރަބިކް އިސްލާމިކް އިންޓްނޭޝަނަލް ސްކޫލްސް އާ ދެމެދު ސޮއިކުރި އެއްބާރުލުންދިނުމުގެ އެ އެއްބަސްވުމުގެ ދަށުން ޔުނިވާސިޓީ އަށް ބައިނަލްއަގުވާމީ ފަންނީ އަދި މާލީ އެހީތެރިކަން ހޯދުމާ ޔުނިވާސިޓީ ގެ އުސްތާޒުން ތަމްރީނުކުރުން ހިމެނޭ ކަމަށެވެ.
މީގެ އިތުރުން، ޔުނިވާސިޓީގެ އުސްތާޒުން ތަމްރީނުކުރުމާއި ޔުނިވާސިޓީ ގައި އަރަބި ބަސް ކިޔައިދިނުމުގެ ނިޒާމު ހަރުދަނާކުރުމާއި ޓެކްސް ފޮތްތައް ފޯރުކޮށްދިނުމާ ބެހޭ ގޮތުން އެހީތެރިކަން ފޯރުކޮށްދިނުމަށް ވެސް އެ އެއްބަސްވުމުގައި ފާހަގަކޮށްފައިވެ އެވެ.
މިއަދުގެ ޒިޔާރަތުގައި އިސްލާމިކް ޔުނިވާސިޓީގެ ވައިސް ޗާންސެލަރު ޑރ. މުހައްމަދު ޝަހީމް އަލީ ސައީދު ޔުނިވާސިޓީ ގެ ފަސްމަންޒަރާއި ތަސައްވަރު ވަފްދުގެ ސެކްރެޓަރީ ޖެނެރަލް އާ ހިއްސާކޮށްފައެވެ.