31 May 2016, 16:45
އަވަށްޓެރި ސްރީ ލަންކާގެ، ކޮރަލް ޕްރޮޕަޓީ ޑިވެލޮޕާސް ކުންފުނިން ހުޅުމާލޭގައި 1.5 ބިލިއަން ރުފިޔާގެ ބޮޑު މަޝްރޫއު އެއް ފަށަން ތައްޔާރުވެއްޖެ އެވެ.
ލަންކާގެ ނޫހެއް ކަމަށްވާ ޑެއިލީ ނިއުސްގައި، ކޮރަލް ކުންފުނީގެ ޗެއާމަން ޑރ. ޕްރަބާ ސުބްރަމާނިއަން އާއި ހަވާލާދީ ބުނެފައި ވަނީ، ހުޅުމާލޭގައި 14 ބިލިއަން ރުޕީސްގެ މިކްސްޑް ޑިވެލޮޕްމަންޓް ޕްރޮޖެކްޓެއް ހިންގުމަށް ހަވާލުކޮށްފައިވާ ކަމަށެވެ.
އެ މަޝްރޫއަށް ކޮރަލް ކުންފުނިން ދީފައިވާ ނަމަކީ "ވައި ކޮރަލް ލަގްޒަރީ އެޕާޓްމަންޓް އެންޑް މޯލް" އެވެ.
ކޮރަލް ކުންފުންޏާ ހަވާލާދީ އެ ނޫހުގައި ބުނެފައި ވަނީ "ވައި ކޮރަލް" ތަރައްގީ ކުރާނީ ވަކި ތިން ޕޯޑިއަމް އަކަށް ކަމަށާއި އެއިން ކޮންމެ ޕޯޑިއަމް އެއްގައި 14 ބުރީގެ ޓަވަރެއް ހެދުމަށް ނިންމާފައިވާ ކަމަށެވެ.
އަދި ތިން ޓަވަރުގެ 12 ވަނަ ފަންގިފިލާ އަދި 10 ވަނަ ފަންގިފިލާ ގުޅުވާލެވިފައި ހުންނާނެ ކަމަށާއި އެ ޓަވަރުތަކުން މުޅި ހުޅުމާލެ ފެންނާނެ ކަމަށް އެ ނޫހުގައި ބުނެފައިވެ އެވެ.
ކޮރަލް ކުންފުންޏަށް އެ މަޝްރޫއު ހަވާލު ކުރީ ކޮން އިރަކު ކަމެއް އެ ނޫހުން ހާމަކޮށްފައެއް ނުވެ އެވެ.
ޑެއިލީ ނިއުސްގައި ބުނެފައި ވަނީ އެ މަޝްރޫއުއަކީ މިހާތަނަށް ލަންކާގެ ކުންފުންޏަކަށް ހަވާލުކުރި އެންމެ ބޮޑު މަސައްކަތް ކަމަށެވެ. އަދި އެއީ ރާއްޖޭގައި މިހާރު ކުރިއަށްދާ ދެވަނައަށް އެންމެ ބޮޑު ތަރައްގީގެ މަޝްރޫއު ކަމަށް ވެސް ބުނެފައިވެ އެވެ.