މާދަމާ މީރާއިން މުދަލު ޒަކާތް ބަލައިގަންނަން ފަށަނީ

31 May 2016, 10:27

މާދަމާ އިން ފެށިގެން މުދަލު މޯލްޑިވްސް އިންލެންޑު ރެވެނިއު އޮތޯރިޓީ (މީރާ) އިން މުދަލު ޒަކާތް ބަލައިގަންނަން ފަށާނެ ކަމަށް އެ އޮތޯރިޓީ އިން ބުނެފި އެވެ.

މީގެ ކުރިން މުދަލު ޒަކާތް ބަލައިގަންނަމުން ދިޔައީ އިސްލާމިކް މިނިސްޓްރީ އާއި ކައުންސިލް އިދާރާތަކުންނެވެ.

ނަމަވެސް، މުދަލު ޒަކާތަށް ވަރަށް ގިނަ ބަޔަކު އިހުމާލުވަމުން އަންނާތީ، މުދަލު ޒަކާތް ނެގުމުގެ ކަންކަން ހަރުދަނާ ކުރުމަށް އެ މަސައްކަތް މީރާ އާ ހަވާލުކޮށް އެއްބަސްވުމުގައި ސޮއި ކުރީ މިދިޔާ މާޗު މަހު އެވެ.

މީރާ އިން ބުނީ މާލެ ނޫން ރަށްރަށުގައި ގާއިމުކޮށްފައިވާ މީރާގެ އޮފީސްތަކުން ވެސް މުދަލު ޒަކާތް ބަލައިގަންނާނެ ކަމަށެވެ. އަދި މީރާގެ އޮފީހެއް ގާއިމުކޮށްފައި ނުވާ ރަށްރަށުގެ ރަށު ކައުންސިލްގެ އިދާރާއިން ވެސް މުދަލު ޒަކާތް ބަލައިގަންނާނެ ކަމަށް މީރާ އިން ބުންޏެވެ.

ޒަކާތުގެ ފައިސާ ދައްކާއިރުMIRA 510ނަންބަރު ފޯމު ހުށަހަޅަންޖެހޭނެ ކަމަށާއި އެ ފޯމު މީރާގެ ވެބްސައިޓުންނާއި ޓެކްސްޕޭޔަރު ސާވިސް ސެންޓަރުން ލިބޭނެ ކަމަށް މީރާ އިން ބުނެ އެވެ.

މުދަލު ޒަކާތުގެ ގޮތުގައި މީރާއިން ބަލައިގަންނަ ފައިސާ ޖަމާކުރާނީ ދައުލަތުން އެކަމަށްޓަކައި ކަނޑައަޅާފައިވާ ހާއްސަ އެކައުންޓަކަށް ކަމަށް އިސްލާމިކް މިނިސްޓްރީ އިން ވަނީ ބުނެފަ އެވެ. މިނިސްޓްރީން ބުނީ ޒަކާތް ނެގުމުގެ މަސައްކަތް މީރާ އިން ކުރި ނަމަވެސް ޒަކާތް ބެހުމުގައި ހަރަކާތްތެރިވާނީ ހަމައެކަނި އިސްލާމިކް މިނިސްޓްރީން ކަމަށެވެ.

މުދަލު ޒަކާތް މީރާއިން ބަލައިގަންނަ ގޮތަށް ހަމަޖެހިފައިވީ ނަމަވެސް ކުރިއަށް އޮތް ތަނުގައި ވެސް ފިތުރު ޒަކާތް ބަލައިގަންނާނީ މިނިސްޓްރީ އޮފް އިސްލާމިކް އެފެއާޒްއިންނެވެ.