30 May 2016, 14:19
ގަތަރުގައި ކުރިއަށްދާ ތޭރަ ވަނަ އޭޝިއަން ރީޖަން އިންޓަ ގަވަމަންޓް މިނިސްޓަރުންގެ، ކުޅިވަރުގެ އެންޓި ޑޯޕިން ބައްދަލުވުމުގައި ދިވެހި ސަރުކާރުގެ ފަރާތުން ކުޅިވަރާބެހޭ ވަޒީރު އަހްމަދު ޒުހޫރު ބައިވެރިވެ ވަޑައިގެންފި އެވެ.
މިއަދު ފެށި އެ ބައްދަލުވުމުގައި ސަރުކާރުގެ ފަރާތުން ޒުހޫރުގެ އިތުރުން ބައިވެރިވެ ވަޑައިގެންނެވީ ޔޫތު މިނިސްޓްރީގެ ޑެޕިއުޓީ މިނިސްޓަރު ޝާހު އިސްމާއިލް އެވެ.
އަންނަ ބުދަ ދުވަހުގެ ނިޔަލަށް ގަތަރުގައި ކުރިއަށްދާ އެ ބައްދަލުވުމުގައި މަޝްވަރާކުރެވެނީ ކުޅިވަރުގައި މަނާ ބޭސް ބޭނުންކުރުން ހުއްޓާލުމުގެ ގޮތުން ކުރެވިދާނެ ކަންތައްތަކާ ބެހޭގޮތުންނެވެ. އެ ބައްދަލުވުމުގައި އޭޝިއާ ސަރަހައްދުގެ އިސް ވެރިން ބައިވެރިވެ ވަޑައިގަންނަވަ އެވެ.
ގަތަރުގައި ކުރިއަށްދާ ތޭރަ ވަނަ އޭޝިއަން ރީޖަން އިންޓަ ގަވަމަންޓް މިނިސްޓަރުންގެ ކުޅިވަރުގެ އެންޓި ޑޯޕިން ބައްދަލުވުމުގެ ތެރެއިން --- ފޮޓޯ: ޔޫތު މިނިސްޓްރީ
ބައިނަލްއަގުވާމީ ކުޅިވަރުތަކުގައި ބައިވެރިވުމަށް ގިނަ އަދަދެއްގެ އެތުލީޓުން މަނާ ބޭސް ބޭނުން ކުރަމުންދާކަން ފާހަގަކޮށްލެވެ އެވެ. އެގޮތުން އޮލިމްޕިކްސް 2012ގައި ރަޝިއާގެ އަށް އެތުލީޓަކު ވަނީ މަނާ ބޭސް ބޭނުންކުރި ކަމަށް ޕޮސިޓިވް ވެފަ އެވެ.
މަނާ ބޭހަށް ކުރިން ޕޮސިޓިވްވި މަޝްހޫރު އެތުލީޓުންގެ ތެރޭގައި ކުރީގެ ޓެނިސް ކުޅުންތެރިޔާ މާޓިނާ ހިންގިސް އާއި، ކުރީގެ ކްރިކެޓް ކުޅުންތެރިޔާ ޝޭން ވޯން އާއި، ދުނިޔޭގެ ކުރީގެ ދެ ފަހަރުގެ ސްޕްރިންޓް ޗެމްޕިއަން ޓައިސަން ގޭ އާއި، ރެސްލިން ތަރި ހަލްކް ހޯގަން އާއި، އުސައިން ބޯލްޓުގެ ޓްރެއިނިން ޕާޓްނަރު ޔޯހަން ބްލޭކް އާއި، ޕާކިސްތާނުގެ ކުރީގެ ކްރިކެޓް ކުޅުންތެރިޔާ ޝުއައިބު އަޚްތަރާއި، ޓެނިސް ކުޅުންތެރިޔާ މާރިއާ ޝަރަޕޯވޯ އަދި ލިވަޕޫލުގެ ފުޓްބޯޅަ ތަރި މަމަދޫ ސަކޯ ފާހަގަކޮށްލެވެ އެވެ.