28 May 2016, 09:02
ޕާކިސްތާނުގެ ބޮޑު ވަޒީރު ނަވާޒް ޝަރީފުގެ ހިތުގެ އޮޕަރޭޝަނެއް އަންނަ ހަފްތާގައި ލަންޑަނުގައި ކުރައްވާނެ ކަމަށް އެމަނިކުފާނުގެ ޕާޓީ، ޕާކިސްތާން މުސްލިމް ލީގް އިން ބުނެފި އެވެ. ހިތުގެ އޮޕަރޭޝަނެއް ކުރައްވަން ނިންމާފައިވާ ކަން ނަވާޒްގެ އަންހެން ދަރިކަނބަލުންނާއި ތަރުޖަމާނަކު ވެސް ވަނީ މީޑިއާތަކަށް ކަށަވަރުކޮށްދީފަ އެވެ.
ބޮޑުވަޒީރު ނަވާޒްގެ އަންހެން ދަރިކަނބަލުން މަރިޔަމް ނަވާޒް ވިދާޅުވީ، ބައްޕާފުޅުގެ ހިތުގެ އޮޕަރޭޝަނެއް ކުރައްވަން ޑޮކްޓަރުން ލަފާދެއްވީ، ސްކޭންތަކަކާއި ޓެސްޓުތައް ވަރަށް ރަނގަޅަށް ބެއްލެވުމަށްފަހު ކަމަށެވެ. އަދި ހޮސްޕިޓަލުގައި ތިން ދުވަހު ބޭއްވުމަށްފަހު ސާޖަރީ ހަދަން ނިންމާފައިވަނީ އަންނަ އަންގާރަ ދުވަހު ކަމަށް އޭނާ ވިދާޅުވެފައިވެ އެވެ.
PM NS undergoing open heart surgery on Tuesday. Prayers are the most effect & potent medicine. Millions will pray for him. IA he'll be fine.
— Maryam Nawaz Sharif (@MaryamNSharif)May 27, 2016
ސާޖަރީ އަށްފަހު އަރާމްކޮށްލެއްވުމަށް ނަވާޒް ޝަރީފް ހޮސްޕިޓަލުގައި ހަފްތާއެއް ވަންދެން ބާއްވާނެ ކަމަށް ވެސް ދަރިކަނބަލުން ވިދާޅުވި އެވެ.
ދަރިކަނބަލުން މަރިޔަމް ނަވާޒް ވިދާޅުވި ގޮތުގައި، ބައްޕާފުޅު ނަވާޒް ހިތުގެ އާލާސްކަންފުޅެއްގައި އުޅެން ފެށީ 2011 ވަނަ އަހަރު ކުރެއްވި ކާޑިއެކް އޮޕަރޭޝަނަކަށްފަހު އެވެ.
PM in 2011 had a cardiac procedure called 'Atrial Fibrillation Ablation', during which certain complications occurred resulting in.....
— Maryam Nawaz Sharif (@MaryamNSharif)May 27, 2016
ނަވާޒްގެ ހިތުގެ ސާޖަރީ ހައްދަވަނީ ލަންޑަނުގެ ކޮން ހޮސްޕިޓަލަކުން ކަމެއް އޭނާ ވިދާޅުވެފައެއްނުވެ އެވެ. ނަމަވެސް ޕާކިސްތާނުގެ ބައެއް މީޑިއާތަކުގައި ރިޕޯޓްކޮށްްފައިވަނީ، ނަވާޒް ޝަރީފް ސާޖަރީ ހަދާނީ އިނގިރޭސި ވިލާތުގައި ހުރި އެންމެ ފެންވަރު ރަނގަޅު ހޮސްޕިޓަލް، ދަ ޕްރިންސެސް ގްރޭސް ހޮސްޕިޓަލުގައި ކަމަށެވެ.
ނަވާޒް ޝަރީފުގެ ހިތުގެ އޮޕަރޭޝަނެއް އަންނަ އަންގާރަ ދުވަހު ކުރައްވާ އިރު، އެމަނިކުފާނުގެ އަރިހުގައި ފަސްޓް ލޭޑީ ކުލްސޫމް ނަވާޒާއި ފިރިހެން ދެ ދަރިކަލުން ކަމަށްވާ ހުސެއިން އަދި ހަސަން ނަވާޒް ހުންނެވީ ލަންޑަނުގައެވެ.
މެޑިކަލް ޗެކަޕެއް ހައްދަވަން ނަވާޒް ލަންޑަނަށް ފުރާވަޑައިގަތީ މިމަހުގެ 22 ވަނަ ދުވަހު އެވެ. އަދި އެނބުރި ޕާކިސްތާނަށް އިއްޔެ ވަޑައިގަންނަވަން ހަމަޖެހިފައި އޮތް ނަމަވެސް، މެޑިކަލް ރިޕޯޓްތަކުން ހިތުގެ އޮޕަރޭޝަނެއް ކުރައްވަން ޖެހިވަޑައިގަންނަވާ ކަމަށް ދެއްކުމުން ދަތުރުފަސްކުރެއްވި އެވެ.
ނަވާޒް މިމަހުގެ ތެރޭގައި ލަންޑަނަށް ވަޑައިގެންފައިވަނީ މިދިޔަ މަހުގެ ތެރޭގައި ޕާކިސްތާނުގައި މެޑިކަލް ޗެކްއަޕެއް ހެއްދެވުމަށްފަހު އެވެ.
ބޮޑު ވަޒީރު ނަވާޒްގެ ތަރުޖަމާން ވިދާޅުވިގޮތުގައި، ނަވާޒް އެނބުރި ގައުމަށް ވަޑައިގަންނަވަންދެން އެމަނިކުފާނުގެ މަސްއޫލިއްޔަތާ ހަވާލުވެ ޕާކިސްތާނުގެ ސިޔާސީ އަދި ރަސްމީ ކަންތައްތައް ބައްލަވައި ބަލަހައްޓާނީ އެގައުމުގެ ފިނޭންސް މިނިސްޓަރު އިޝާގް ދާރް އެވެ.
މައުލޫމާތު: އެންޑީޓީވީ