19 Jul 2017, 01:29
ސުޕްރީމް ކޯޓުގެ ހުކުމާ އެއްގޮތަށް ރައްޔިތުންގެ މަޖިލީހުގެ މެމްބަރުންގެ ގޮނޑި ގެއްލޭނީ އެ މެމްބަރަކު ޕާޓީން ވަކިކުރިކަން މަޖިލީހުގެ ރިޔާސަތުން އެންގުމުން ކަމަށް ޕީޕީއެމްގެ ޕާލަމެންޓްރީ ގްރޫޕްގެ ލީޑަރު އަދި ވިލިމާލެ ދާއިރާގެ މެމްބަރު އަހުމަދު ނިހާން ހުސައިން މަނިކު ވިދާޅުވެއްޖެއެވެ.
ރައީސް އަބްދުﷲ ޔާމީންގެ ރިޔާސަތުގައި މިރޭ ބޭއްވި ޕީޕީއެމް ކައުންސިލްގެ ކުއްލި ބައްދަލުވުމަށްފަހު ޕީޕީއެމް އޮފީސް ކުރިމަތީގައި ނޫސްވެރިންނާ ވާހަކަފުޅު ދައްކަވަމުން ނިހާން ވިދާޅުވީ ޕާޓީއަކުން އާންމު މެމްބަރެއް ވަކިވުމާއި މަޖިލީހުގެ މެމްބަރަކު ވަކިވެވޭ ގޮތް ތަފާތު ވާނެ ކަމަށެވެ. މަޖިލީހުގެ މެމްބަރަކު ޕާޓީން ވަކިވާނީ އިލެކްޝަން ކޮމިޝަނުން މަޖިލީހަށް އެންގުމުން ކަމަށް ވެސް އޭނާ ވިދާޅުވިއެވެ.
ނިހާން ވިދާޅުވީ އެއްވެސް މީހެއްގެ ފިކުރަކީ "ބަނދެގެން ގެންގުޅެވޭނެ އެއްޗެއް ނޫން" ކަމަށާއި ކޮންމެ މެމްބަރަކަށް ވެސް ޕާޓީން ވަކިވާން ބޭނުންވީމަ ވަކިވެވޭނެ ގޮތްތަކެއް ކަނޑައަޅާފައިވާ އުސޫލުތަކެއް ވެސް އޮންނާނެ ކަމަށެވެ.
"މެމްބަރަކު ޕާލިމެންޓަރީ ގްރޫޕަކުން ވަކިވި ކަމަށް އަޅުގަނޑުމެން ކަނޑައަޅަނީ މަޖިލީހުގެ ސެކެޓްރިއޭޓަށް ނުވަތަ އަމީންއާމަށް އިލެކްޝަންސް ކޮމިޝަނުން، އެ މެމްބަރަކު އިލެކްޝަން ކޮމިޝަނުގެ ދަފްތަރުން އެޕާޓީން އުނިކޮށްފީމޭ ބެނެފަ ސިޓީ ލިބުނީމަ،" ނިހާން ވިދާޅުވިއެވެ.
18 ޖުލައި 2017: ޕީޕީއެމް ކައުންސިލް ގެ ކުއްލި ބައްދަލުވުން---ސަން ފޮޓޯ/ މުހައްމަދު އަފްރާޙް
ހަމައެހެންމެ މަޖިލިސް މެމްބަރަކު ޕާޓީއަކަށް ސޮއިކުރިޔަސް އެބޭފުޅަކީ ޕާލަމެންޓްރީ ގްރޫޕްގެ މެމްބަރެއްކަމަށް ރަސްމީކޮށް ކަނޑައެޅޭނީ މަޖިލީހުގެ ރިޔާސަތުން އެކަން އިއުލާންކުރުމުން ކަމަށް ވެސް ނިހާން ވިދާޅުވިއެވެ.
އޭނާ ވިދާޅުވީ މެމްބަރަކު ޕާޓީން ވަކިކުރިކަން އަންގައި އިލެކްޝަންސް ކޮމިޝަނުން ފޮނުވާ ސިޓީ މަޖިލީހުގެ ރިޔާސަތަށް ލިބުމުން އެބޭފުޅެއްގެ ގޮނޑި ގެއްލޭނެ ކަމަށެވެ.
"އަޅުގަނޑު ގަބޫލުކުރާ ގޮތުގައި މަޖިލީހުގެ ރިޔާސަތާއި ހަމައަށް ނުވަތަ މަޖިލީހަށް އެސިޓީ އިލެކްޝަން ކޮމިޝަނުންގެ ފަރާތުން މިއީ ޕީޕީއެމްގެ މެމްބަރެއް ނޫންކަމަށް ލިބުނީމަ އެހިސާބުންހެން އެ މެމްބަރަކު ވަކިވެގެންދާނީ،" ނިހާން ވިދާޅުވިއެވެ.
މަޖިލިސް މެމްބަރުންގެ ގޮނޑި ގެއްލޭނެ ތިން ހާލަތެއް ކަނޑައަޅައި ސުޕްރީމް ކޯޓުން ހުކުމް ކުރުމުގެކުރިން މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތް ކަމަށް ހުށަހެޅި މައްސަލާގައި ސޮއިކުރެއްވި ޕީޕީއެމްގެ 10 މެމްބަރަކު ވަނީ އެ ޕާޓީން ވަކިވާން ޕާޓީގެ އޮފީހަށް ސިޓީ ފޮނުވާފައެވެ.
ނިހާން މިހެން ވިދާޅުވެފައިވާއިރު، އިލެކްޝަންސް ކޮމިޝަނުން ވަނީ ޕީޕީއެމްގެ ހަތަރު މެމްބަރަކު އެޕާޓީގެ މެމްބަރުކަމުން ވަކިކޮށް ސިޓީއަކުން އެކަން ރައްޔިތުންގެ މަޖިލީހަށް އަންގާފައެވެ. އެ މެމްބަރުންނަކީ މަޑުއްވާރީ ދާއިރާގެ މެންބަރު މުޙައްމަދު އަމީތުއާއި، ތުލުސްދޫ ދާއިރާގެ މެންބަރު މުޙައްމަދު ވަހީދު އިބްރާހީމާއި، ވިލިނގިލި ދާއިރާގެ މެންބަރު ސައުދު ހުސައިން އާއި ދިއްދޫ ދާއިރާގެ މެންބަރު އަބްދުއްލަތީފު މުހައްމަދެވެ.
ސުޕްރީމް ކޯޓުން ދާދިފަހުން ކުރި ހުކުމްގައި ބުނެފައި ވަނީ އެ ހުކުމް ކުރި ދުވަހުން ފެށިގެން ރައްޔިތުންގެ މަޖިލީހުގެ މެމްބަރަކު، އެ މެމްބަރަކު އިންތިޚާބުވި ޕާޓީގެ މެމްބަރުކަމުން ވަކިވުން ނުވަތަ އަމިއްލައަށް ޕާޓީން ވަކިވުން ނުވަތަ އިންތިޚާބުވި ޕާޓީ ނޫން އެހެން ޕާޓީއަކަށް ބަދަލުވެއްޖެނަމަ އެ މެމްބަރެއްގެ ގޮނޑި ގެއްލޭނެ ކަމަށެވެ. އަދި ގޮނޑި ގެއްލޭނީ އިންތިޚާބުވި ޕާޓީން ވަކިވެއްޖެކަން އިލެކްޝަންސް ކޮމިޝަނުން ރައްޔިތުންގެ މަޖިލީހަށް އަންގާ ދުވަހުން ކަމަށް ވެސް އެ ހުކުމްގައިވެއެވެ.
އެ ހުކުމަށްފަހު ސުޕްރީމް ކޯޓުން ނެރުނު އަމުރެއްގައި މެމްބަރުންގެ ގޮނޑި ގެއްލޭކަމަށް އެ ހުކުމްގައިވާ ތިން ހާލަތު އިތުރަށް ތަފްސީލުކޮށްދީފައެވެ.
އެ އަމުރުގައި ބުނެފައި ވަނީ އެ ހުކުމްގައި ބަޔާންކޮށްފައިވާ ތިން ހާލަތުން ކުރެ ހާލަތަކީ އެ ހުކުމްކުރި ތާރީޚުގެ ކުރީގައި ވުޖޫދުވެފައިވާ، ހާލަތެއް ނަމަ، ނުވަތަ އެއިން ހާލަތަކާ ގުޅޭ އެއްވެސް އިޖުރާއާތެއްގެ މައްޗަށް ބިނާކޮށް އެޅިފައިވާ ނުވަތަ އަޅާ އެއްވެސް ފިޔަވަޅެއް ނަމަ އެފަދަ އެއްވެސް ހާލަތެއްގެ މައްޗަށް ނުވަތަ އެފަދަ އެއްވެސް ހާލަތަކާ ގުޅިފައިވާ އިޖުރާއާތެއް ނުވަތަ ކަމެއްގެ މައްޗަށް އެ ޤަޟިއްޔާގެ ހުކުމުގެ އަސަރު އެއްވެސްގޮތަކުން މާޒީއަށް ރުޖޫއަވާގޮތަށް ރެޓްރޯސްޕެކްޓިވް ކޮށް ތަޠްބީޤު ނުވަތަ ތަންފީޛު ކުރުން ހުއްދަކުރެވިފައި ނުވާކަން އެ ޙުކުމުން ސާފުކޮށް އެނގެން އޮންނަ ކަމަށެވެ.