25 May 2016, 10:33
ބޭންކް އޮފް މޯލްޑިވްސް އިން ނަގާފައިވާ 2،300،000ަ ރުފިޔާގެ ލޯނެއް ނުދައްކައި އޮތުމުން އެ ލޯނު ދެއްކުމަށް ފަތުހު ހައްޖު އެންޑް އުމުރާ ގުރޫޕާއި އިތުރުބައެއްގެ މައްޗަށް ސިވިލް ކޯޓުން ހުކުމް ކޮށްފި އެވެ.
ސިވިލް ކޯޓުން މިމަހުގެ 19 ވަނަ ދުވަހު ކުރި ހުކުމުގައި ބުނެފައި ވަނީ އަލްފަތުހު ހައްޖު ގުރޫޕުން 2،300،000 ރުފިޔާގެ ލޯނު ނަގާފައި ވަނީ ހ. އެކްސެލް މުހައްމަދު މުސްތަފާ ދީދީ އާއި ހ. ސިއްކަގޭހުޅަގުގޭ މަރިޔަން ރަޝީދާ އިބްރާހިމް އާއި ހަމަ އެގޭ ހަސަން ރަޝީދުގެ އިތުރުން ކްލެސިކް ޓްރެވަލް މޯލްޑިވްސް ޕްރައިވެޓް ލިމިޓެޑުން ގެރެންޓީދީގެންކަން އެނގެން އޮންނަ ކަމަށެވެ.
އެލޯނު ފަތުހު ގުރޫޕުން ނަގާފައި ވަނީ ގެރެންޓީދީފައިވާ މީހުންގެ ތެރެއިން ހ. ސިއްކަގޭހުޅަގުގޭ މަރިޔަން ރަޝީދާ އިބްރާހިމް އަށް އޭނާގެ ގެއިންވާ ބައި ރަހުނުގެ ގޮތުގައި ބޭއްވުމަށް ފަހު ކަމަށް ވެސް ހުކުމުގައި ވަނީ ބުނެފަ އެވެ.
މިމަހުގެ 16 ވަނަ ދުވަހާ ހަމައަށް ބީއެމްއެލް އަށް ފަތުހު ހައްޖު ގުރޫޕުން ދައްކަންޖެހި ނުދައްކާ ފައިސާގެ އަދަދު 2،222،517.55 ރުފިޔާ އަރާފައިވާކަމަށް ހުކުމުގައިވެ އެވެ. އަދި އެފައިސާ ނުދައްކާ ހުރިކަން ޝަރީއަތަށް ސާބިތުވާތީ މިމަހުގެ 19 ވަނަ ދުވަހުން ފެށިގެން ހަތް މަސް ދުވަހުގެ ތެރޭގައި އެ ފައިސާ ދައްކައި ހަލާސްކުރުމަށް ފަތުހު ހައްޖު ގުރޫޕާއި ގެރެންޓީ ދިން މީހުންގެ މައްޗަށް ކޯޓުން ވަނީ ހުކުމް ކޮށްފަ އެެވެ.
ހަތް މަސް ދުވަސް ހަމަވާ އިރު އެ ފައިސާ ދައްކާ ނުނިމިއްޖެ ނަމަ ރަހުނު ކުރެވިފައިވާ ހ. ސިއްކަގޭހުޅަގުގޭ މަރިޔަން ރަޝީދާ އިބްރާހިމްއަށް އޭނާގެ ގެއިންވާ ބައި ވިއްކާ ލުމުގެ ހުއްދަ ބޭންކަށް ލިބޭނެ ކަމަށް ހުކުމުގައިވެ އެވެ. އަދި އެރަހުނު ވިއްކާލުމަށް ހިނގާ ހަރަދާއި ރަހުނު ވިއްކާލުމަށް ފަހު ބާކީ ދައްކަން ޖެހޭ ފައިސާވެސް އަލްފަތުހު ހައްޖު ގުރޫޕާއި ގެރެންޓީ ދިން މީހުން ދައްކަން ޖެހޭނެކަމަށް ކޯޓުން ވަނީ އަންގާފަ އެވެ.