24 May 2016, 23:02
މިލްކުވެރިކަމުގެ މައްސަލާގައި ހުއްޓާލާފައިވާ ދުވަހު ނޫސް "ހަވީރު"ގެ ކުރީގެ މުވައްޒަފުން ގުޅިގެން އުފެއްދިމިހާރުނޫހުގެ ވެބްސައިޓާއި ޕްރިންޓް މިރޭ ތައާރަފުކޮށްފި އެވެ.
ސެންޓްރަލް ހޮޓެލްގައި މިރޭ ބޭއްވި ރަސްމިއްޔާތެއްގައި އެ ނޫހުގެ ވެބްސައިޓް ލޯންޗުކޮށްފައިވާ އިރު ޕްރިންޓް ނޫސް ވެސް މިރެއިން ފެށިގެން ވަނީ ނެރެން ފަށައިފަ އެވެ. އަދި މިރޭގެ ހަފްލާ އަށް ދިޔަ މީހުންނަށް ވަނީ އެ ނޫހުގެ ފުރަތަމަ ކޮޕީ ބަހައިފަ އެވެ.
މިހާރު ނޫހުގެ އެޑިޓަރަކީ ނޫސްވެރިކަމުގައި 20 އަހަރު ހޭދަކޮށްފައިވާ އަދި ހަވީރުގެ ކުރީގެ މެނޭޖިން އެޑިޓަރު އިސްމާއިލް ނަސީރެވެ. އިސްމާއިލާ އެކު މަސައްކަތް ކުރާ ޓީމުގައި ހަވީރު ނޫހުގައި މަސައްކަތް ކުރި ހުރިހާ ނޫސްވެރިންހެން ހިމެނެ އެވެ.
އެ ޓީމުން ވަނީ، ނޫހުގެ އޮޕަރޭޝަންތައް ހިންގުމަށް މުޅިން އާ އޮފީހެއް ގާއިމުކޮށް އެތަނަށް ބޭނުންވާ ހުރިހާ ތަކެއްޗެއް ހޯދައިފަ އެވެ.
މިރޭގެ ތައާރަފުގައި "މިހާރު"ގެ އެޑިޓަރު ވިދާޅުވީ އެ ނޫހުގެ މަގުސަދަކީ ރާއްޖޭގެ މާހައުލުގައި ބޮޑެތި މައްސަލަތަކުގެ މައްޗަށް، ވަކި އަތަކަށް ނުޖެހި ރިޕޯޓް ކުރުން ކަމަށެވެ.
"މިހާރު" ޗާޕް ކުރަނީ "ލިތޯ ޕްރިންޓު"ނެވެ،
"ހަވީރު" ނޫހުގެ ކުރީގެ މުވައްޒަފުން އެތަނުން ވަކިވީ، އެތަނުގެ މިލްކުވެރިކަމުގެ މައްސަލައިގައި ކޯޓު އަމުރެއްގެ ދަށުން އެ ނޫސް ހުއްޓާލައި، އެތަނުގެ 75 ޕަސަންޓް ހިއްސާގެ ކޮންޓްރޯލް ނެގި ތިން ހިއްސާދާރުން، މުވައްޒަފުންނަށް މުސާރަ ދޭނެކަމުގެ ޔަގީންކަން ނެތުމުން ކަމަށް އެ ޓީމުގެ އޮފިޝަލް ބުނެ އެވެ.
އެނޫހާ ގުޅޭ ގޮތުން އަނެއް ތިން ހިއްސާދާރުންގެ ގާނޫނީ ޓީމުގެ ފަރާތުން "ސަން" އަށް މައުލޫމާތު ދެއްވި ބޭފުޅަކު ވިދާޅުވީ، "ހަވީރު"ގެ ކުރީގެ މުވައްޒަފުން ވެގެން އާ ނޫހެއް ނެރުމަކީ ގަބޫލު ކުރެވޭ ކަމެއް ނޫން ކަމަށާއި އެއީ ކޯޓުން ނެރެފައިވާ އަމުރާ ޚިލާފަށް ކުރާ ކަމެއް ކަމަށެވެ.
މާރިޗު މަހުގެ 31 ވަނަ ދުވަހު ސިވިލް ކޯޓުން ނެރުނު އަމުރެއްގައި ވަނީ ގ. ކޮއްކިރި ފާރޫގު ހަސަނާއި ހެންވޭރު މީރުބަހުރުގެއާގެ އިބްރާހީމް ރަޝީދު މޫސާގެ ބައިވެރިވުމެއް ނެތް ގޮތަށް ހަވީރު ނޫސް ހިންގުން ވަގުތީ ގޮތުން ހުއްޓާލުމަށް ހ. ނީލްވިލާ ޑރ. މުހައްމަދު ޒާހިރު ހުސައިންގެ މައްޗަށް އަމުރުކޮށްފަ އެވެ. އެ އަމުރާ އެކު، އެ ދުވަހުގެ ފަހުން ހަވީރު ނެރުން ވަނީ ހުއްޓާލައިފަ އެވެ. އަދި އޭގެ ދެ ދުވަސް ފަހުން ހަވީރު އޮންލައިން ވެސް ވަނީ ހުއްޓާލައިފަ އެވެ.