24 May 2016, 10:52
ހުޅުމާލޭ ފްލެޓަކުން ފޯނަކާއި ލެޕްޓޮޕެއްގެ އިތުރުން ބައެއް ފައިސާ އާއި މުދާ ވަގަށް ނެގި މައްސަލައެއްގައި ސ. ހިތަދޫ ލާސާނީ، ހަސައިން ހަނީފު ދެ މަހާއި 12 ދުވަހަށް އަދި ހަމަ އެ ރަށު ސީލަވް، ހުސައިން ފަޔާޒު ތިން މަހަށް ޖަލަށްލާން ކްރިމިނަލް ކޯޓުން ހުކުމް ކޮށްފި އެވެ.
ހަސަން ހަނީފާއި ހުސައިން ފަޔާޒުގެ މައްޗަށް ދައުލަތުން ވައްކަންކުރުމުގެ ދައުވާ އުފުލާފައި ވަނީ ހުޅުމާލޭ ފްލެޓަކުން ސެމްސަންގް ގެލެކްސީ އެސް ތްރީ މިނީ ފޯނަކާއި، އެޗްޕީ ބްރޭންޑްގެ ލެޕްޓޮޕަކާއި 4800 ރުފިޔާ އާއި އެސްޑީ ކާޑް އެޑަޕްޓަރަކާއި ރިހި އަނގޮއްޓިއެއްގެ އިތުރުން ރިންގިޓްތަކެއް ވަގަށް ނަގާފައިވާ ކަމަށްބުނެ އެވެ.
އެ މައްސަލަ ބަލައި މިދިޔަ އާދިއްތަ ދުވަހު ކޯޓުން ކުރި ހުކުމުގައި ބުނެފައި ވަނީ ހަސަން ހަނީފާއި ހުސައިން ފަޔާޒު އެދައުވާއަށް އިންކާރުކުރި ނަމަވެސް ހުޅުމާލޭ ފްލެޓަކުން އެތަކެތި ގެއްލުނު ދުވަހުގެ ވަގުތެއްގައި ފުލުހުންނަށް އެމީހުން ފެނިގެން އަމަލުތައް ހުރި ގޮތުން ބަލައި ފާސްކުރި އިރު ހުސައިން ފަޔާޒުގެ ވޮލެޓުން ރިންގިޓްތައް ފެނިފައިވާ ކަމަށެވެ. އަދި ހަސަން ހަނީފުގެ ޖީބުން ގެއްލިގެން އުޅުނު ފޯނު ވެސް ފެނިފައިވާ ކަމަށް ކޯޓުން ހުކުމުގައި ބުނެފައިވެ އެވެ.
އޭގެ އިތުރުން ފޮރުވާފައި އޮތް ލެޕްޓޮޕެއް ވެސް ނަގައި އެމީހުން ފުލުހުންނަށް ދައްކާފައިވާ އިރު އެތަކެތި ލިބުނު ގޮތެއް އެމީހުންނަށް ސާބިތުކޮށްދެވިފައި ނުވާތީ ދައުލަތުން ކުރި ވައްކަމުގެ ދައުވާ ހަސަން ހަނީފާއި ހުސައިން ފަޔާޒުގެ މައްޗަށް ސާބިތުވާ ކަމަށް ހުކުމުގައި ބުނެފައިވެ އެވެ.
ހަސަން ހަނީފާއި ހުސައިން ފަޔާޒު ޖަލަށްލާން ހުކުމްކޮށްފައިވަނީ ކުރީގެ ގާނޫނުލްއުގޫބާތުގެ 210 ވަނަ މާއްދާގެ (ށ)ގެ ފަސްވަނަ ނަމްބަރުގެ ދަށުންނެވެ.