19 May 2016, 16:54
މިދިޔަ ހަފްތާގެ ހޯމަ ދުވަހު ރާއްޖޭގެ އިރުމަތީ ފަރާތުގައި އުދެފުނު ކޮޅިގަނޑު ބާރުގަދަވެ، އުފެދުނު "ރޯނު" ރޯނު ތޫފާން އިތުރަށް ބާރުގަދަވެ، އިތުރު ތޫފާންތަކެއް އުފެދުމުގެ ފުރުސަތު ވަރަށް އަވަހަށް އެބަ އޮތް ކަމަށް މޫސުމާ ބެހޭ ރިޕޯޓްތައް ބުނެފި އެވެ.
މޫސުމާ ބެހޭ ހަބަރު ގެނެސްދޭ އިންޑިއާގެ އަމިއްލަ ސްކައިމެޓް އިން ބުނީ، ރޯނު މިހާރު ދަތުރުކުރަމުން ދަނީ ގަޑިއަކު 15 ކިލޯ މީޓަރުގެ ބާރު މިނުގައި ކަމަށާއި އަދި ކުރިއަށް އޮތް 12 ގަޑިއިރުގެ ތެރޭގައި އެ ތޫފާންގެ ބާރު އެތައް ގުނައެއް އިތުރުވާނެ ކަމަށް ބެލެވޭ ކަމަށެވެ.
ނަމަވެސް، ރާއްޖޭގެ މޫސުމާ ބެހޭ އިދާރާ އިން ބުނީ، ރޯނު ތޫފާން މިހާރު ރާއްޖެ ފަހަނަ އަޅާ ވަރަށް ދުރަށް ގޮސްފައިވާ ކަމަށާއި ތޫފާންގެ އަސަރު ރާއްޖެއަށް ނުކުރާނެ ކަމަށެވެ. ނަމަވެސް ރާއްޖެއަށް މިހާރު ކުރަމުންދަނީ ހުޅަނގު މޫސުމުގެ ވިއްސާރަކަމަށް އެ އިދާރާއިން ބުނެއެވެ.
ރާއްޖޭގެ މޫސުން ކުރިއަށް ލަފާކުރާ ގޮތަށް ބަލާއިރު، ރާއްޖޭގެ އެކި ހިސާބަށް ގުގުރުމާއެކު ވިއްސާރަކުރާނެ އަދި ބައެއް ރަށްތަކަށް ބޯކޮށްވާރޭވެހޭނެ ކަމަށް ލަފާކުރެވޭ ކަމަށް މެޓް އޮފީހުން ބުނެއެވެ.
މީގެ އިތުރުން، އުތުރުގެ އަތޮޅުތަކަށް ހުޅަނގާއި ހުޅަނގު އުތުރުން ގަޑިއަކު ހަތް މޭލާ 17 މޭލާ ދެމެދުގުބާރުމިނުގައި އަދި އެހޭން ހިސާބުތަކަށް ހުޅަނގުދެކުނާއި ހުޅަނގުން ގަޑިއަކު 15 މޭލާއި 25 މޭލާއި ދެމެދުގެބާރުމިނުގައި ވައިޖެހޭނެ ކަމަށް ބެލެވޭއިރު، ވިލާގަނޑުގައި ގަޑިއަކު ގާތްގަޑަކަށް 50 މޭލާއި 55 މޭލާއި ދެމެދުގެ ބާރުމިނަށް ވައިގަދަވުން އެކަށީގެންވާ ކަމަށް ވެސް އެ އިދާރާއިން ބުނެއެވެ.
މެޓް އޮފީހުން ބުނީ، ރާއްޖޭގެ ކަނޑުތައް އާއްމުގޮތެއްގައި ގަދަވާނެ ކަމަށެވެ.
ސްކައި މެޓް އިން ބުނީ، ރޯނުގެ ސަބަބުން މިހާރު ވެސް އަންދުރަ ޕްރަދޭޝްގެ ބައެއް ހިސާބުތަކަށް ގަދަ ވަޔާއެކު ގުގުރުމާއެކު ބޯކޮށް ވާރޭވެހެމުންދާ ކަމަށެވެ. ރޯނު ދަތުރުކުރާނެ ކަމަށް ބެލެވެނީ އިރުއުތުރަށް ކަމަށާއި އަދި އެ ތޫފާން މިމަހުގެ 21 ނުވަތަ 22 ވަނަ ދުވަހު ބަންގާޅު ކަނޑުގެ ސަރަހައްދަށް އަރާނެ ކަމަށް އެ އިދާރާއިން ބުނެއެވެ.