ރާއްޖެއަށް މިހާރު ކުރަމުންދާ ވިއްސާރައިގައި ފެންބޮޑުވެ ގެއްލުންތަކެއް ލިބެމުންދާ ފަރާތްތަކަށް ސަރުކާރުން މާލީ އެހީތެރިކަމެއް ވެދެއްވާނެ ކަމަށް ޑިފެންސް މިނިސްޓަރު އާދަމް ޝަރީފް އުމަރު ވިދާޅުވެއްޖެ.

މިނިސްޓަރު "ސަން" އަށް މިއަދު ވިދާޅުވީ، ވިއްސާރައިގައި ގެއްލުންވި ގެތަކަށް ޑިޒާސްޓާ މެނޭޖްމަންޓް ސެންޓަރުން ކަނޑައަޅާފައިވާ ގޮތުގެ މަތިން މާލީ އެހީތެރިކަން ވެދެއްވާނެ ކަމަށް. އަދި މާލީ އެހީތެރިކަން ދެއްވާނީ ގެތަކަށް ލިބުނު ގެއްލުން ބެލުމަށް ޑިޒާސްޓާ އިން ހަދާ އެސެސްމެންޓަށް ބެލުމަށްފަހު ކަމަށް މިނިސްޓަރު ވިދާޅުވި.

ގަދަ ވާޔާ އެކު ބޯކޮން ވާރޭވެހި ރަށްތަކަށް ގެއްލުންވުން--- ފޮޓޯ : ކިޔުންތެރިއެއް

"އެސެސްމަންޓް ހެދުމަށްފަހު ގާތްގަނޑަކަށް ތިން ހަތަރު ދުވަހުގެ ތެރޭގައި ހާލުގައި ޖެހުނު ފަރާތްތަކަށް ސަރުކާރުން މާލީ އެހީތެރިކަން ދެއްވާނެ،" ޑިފެންސް މިނިސްޓަރު ވިދާޅުވި.

ބޯކޮށް ވާރޭވެހި ފެންބޮޑުވެފައިވާ ބައެއް ރަށްތަކުގެ ސްކޫލްތައް ބަންދުކޮށްފައިވާ ކަމަށް އެ ރަށްރަށުން ބުނި ނަމަވެސް، އެއްވެސް ސްކޫލެއް ބަންދުކުރަން އެޑިއުކޭޝަން މިނިސްޓްރީން އަންގާފައިނުވާނެ ކަމަށާއި އަދި އެއްވެސް ސްކޫލެއް ބަންދު ކޮށްފައިވެސް ނުވާނެ ކަމަށް އެ މިނިސްޓްރީން ބުނެފި.

އެޑިއުކޭޝަން މިނިސްޓްރީގެ މީޑިއާ އޮފިސަރު މަރިޔަމް ސަނާ "ސަން" އަށް ވިދާޅުވީ، އެއްވެސް ސްކޫލެއް ބަންދުކޮށްގެން އެފަދަ މައުލޫމާތެއް އެ މިނިސްޓްރީއަށް އަންގާފައިނުވާ ކަމަށް.

އއ. ރަސްދޫ ސުކޫލު ގޯތި ތެރޭގައި ފެން ބޮޑުވެފައި: އެ ސުކޫލުގެ ގޯތި ތެރޭގައި ފެން ބޮޑުވެ، ބައެއް ކުލާސް ރޫމުތަކަށް ފެން ވަދެފައިވާތީ އެ ސުކޫލުގެ ކިޔެވުން މިއަދު ވަނީ ހުއްޓާލައިފައި -- ފޮޓޯ/ ޓުވީޓާ

ނަމަވެސް، ފައުންޑޭޝަން ސްޓޭޖްގައި ހިމެނޭ ނާސަރީގެ ކުދިން ސްކޫލްތަކަށް ގެނައުމަށް ދަތިތަކެއްކުރިމަތިވާތީ، އެ ސްކޫލްތަކުން އެ ސްޓޭޖްގެ ކިޔެވުން ބަންދުކޮށްފައިވާ ކަމަށް އޮފިޝަލް ވިދާޅުވި.

ސަނާ ވިދާޅުވީ، ވިއްސާރައިގެ ސަބަބުން ބައެއް ދަރިވަރުން ސްކޫލަށް ފޮނުވުމަށް ބެލެނިވެރިން ފަސް ޖެހެމުންދާތީ، ސްކޫލަށްދިޔަ މަދު ދަރިވަރުންނާއެކު ވެސް ސްކޫލްތަކުގައި ކިޔަވައިދެމުންދާ ކަމަށް

ވިއްސާރައާ ގުޅިގެން އިސްދޫ ސްކޫލް ވެސް ބަންދުކޮށްފި

ލ. އިސްދޫއަށް ބޯކޮށް ވާރޭވެހި ފެންބޮޑުވުމުގެ ސަބަބުން، ކިޔަވައި ދިނުމަށް ދަތިވެ ސްކޫލްގެ ކިޔެވުން ބަންދުކޮށްފި އެވެ.

އިސްދޫ ކައުންސިލްގެ ޒިންމާދާރުވެރިޔާ އިބްރާހިމް ވަހީދު "ސަން"އަށް ވިދާޅުވީ، ނާސަރީން ފެށިގެން ގްރޭޑް 10 އަކަށް ކިޔަވައިދެމުން އަންނަ އެ ސްކޫލު ހުޅުވޭނެ ވަކި ތާރީހެއް ނޭނގޭ ކަމަށެވެ.

އިސްދޫ އަށް ބޯކޮށްވާރޭވެހި އެރަށު ބޮޑު މަގުގައި ވެސް ޗަކަ ހެދިފައިވާ ކަމަށް އިސްދޫ ކައުންސިލްގެ ޒިންމާދާރުވެރިޔާ ވިދާޅުވި އެވެ.

15 ރަށަކަށް ގެއްލުންވެ، 42 މީހަކު ހާލުގައި ޖެހިއްޖެ

ފެންބޮޑުވެ 15 ރަށަކަށް ގެއްލުންވެ، 42 މީހަކު ހާލުގައި ޖެހިއްޖެ

ރާއްޖެއަށް މިހާރު ކުރަމުންދާ ވިއްސާރައިގާ 15 ރަށެއްގައި ފެންބޮޑުވެ ގެއްލުންތަކެއް ލިބިގެން ރިޕޯޓްކޮށްފައިވާއިރު، 42 މީހަކު ހާލުގައި ޖެހިފައިވާ ކަމަށް ޑިޒާސްޓާ މެނޭޖްމަންޓް ސެންޓަރުން ބުނެފި އެވެ.

ވިއްސާރާގައި ފެންބޮޑުވެ، ގެއްލުންވެގެން ރިޕޯޓު ކުރި ރަށްތައް:

• ތ. ތިމަރަފުށި، ތ. ހިރިލަންދޫ، ތ. ވޭމަންޑޫ، ތ. ކިނބިދޫ، މ. މުލި، ގއ. ވިލިނގިލި، އއ. އުކުޅަސް، ލ. ކުނަހަންދު، ލ. ފުނަދޫ، ލ. ގަން، ސ. ފޭދޫ، ސ. ހިތަދޫ، ދ. މީދޫ، ދ. ކުޑަހުވަދޫ، އއ. ބޮޑުފުޅަދޫ

ޑިޒާސްޓާ މެނޭޖްމަންޓް ސެންޓަރުގެ މީޑިއާ އޮފިސަރު ހިސާން ހަސަން ވިދާޅުވީ، އިއްޔެގެ ނިޔަލަށް ޖުމްލަ 12 ރަށެއްގައި ފެންބޮޑުވެ ގެއްލުންތަކެއް ލިބިފައިވާ ކަމަށެވެ. އަދި މިއަދުގެ މިހާތަނަށް އިތުރު ތިން ރަށަކަށް ގެއްލުންތަކެއް ލިބިފައިވާ ކަމުގެ ރިޕޯޓެއް ލިބިފައިވާ ކަމަށް އޭނާ ވިދާޅުވި އެވެ.

މިއަދު ގެއްލުންތަކެއް ލިބިގެން ރިޕޯޓްކޮށްފައި ވަނީ ދ. އަތޮޅުގެ ދެ ރަށް ކަމަށްވާ މީދޫ އަދި ކުޑަހުވަދޫގެ އިތުރުން އއ. ބޮޑުފުޅަދޫ ކަމަށް ޑިޒާސްޓާ ސެންޓަރުން ބުނެއެވެ.

ހިސާން ވިދާޅުވީ، އެ ސެންޓަރުން އެންމެ ބޮޑު އިސްކަމެއް ދީގެން ހަރަކާތްތެރިވަމުން އަންނަ ތ. ތިމަރަފުށީގެ 15 އާއިލާއަކުން 42 މީހަކު ހާލުގައި ޖެހި، ރަށުގެ އެހެން ގެތަކަށް ބަދަލުކޮށްފައިވާ ކަމަށެވެ.

މީގެ އިތުރުން، އެ ރަށު ކައުންސިލް އިދާރާ އިން ހާލުގައި ޖެހުނު ތިން އާއިލާއަކަށް ހުރުން ހަމަޖައްސައިދީފައިވާ ކަމަށް އޭނާ ވިދާޅުވި އެވެ. ވާރޭވެހި ފެންބޮޑުވުމުގެ ސަބަބުން ގެއްލުން ލިބުނު އެހެން ރަށްތަކުން ހާލުގައި ޖެހުނު މީހުންގެ ރިޕޯޓް އަދި އެ ސެންޓަރާ ހިއްސާކޮށްފައިނުވާ ކަމަށް ވެސް ވިދާޅުވި އެވެ.