18 May 2016, 15:20
ކޮލަމްބޯ (މޭ 18): ސްރީ ލަންކާ އަށް ކުރަމުންދާ ވިއްސާރާގައި އެ ގައުމުގެ ދެ ސަރަހައްދަކުން އިއްޔެ ބިންގަނޑު ކަނޑައިގެން ދިޔުމުގެ ސަބަބުން ފަސްގަނޑުގެ ދަށުވެ، 150 މީހަކު މަރުވެފައިވާ ކަމަށް ލަފާކުރެވޭ ކަމަށް ރެޑް ކްރޮސް އިން މިއަދު ބުނެފި އެވެ.
ބޯކޮށް ވާރޭ ވެހުމުގެ ސަބަބުން ބިންގަނޑު ކަނޑައިގެން ދިޔަ ސަރަހައްދުތަކުން 19 މީހެއްގެ ހަށިގަނޑު ހޯދާފައިވާ ކަމަށާއި ހާލުގައި ޖެހިފައިވާ 350 މީހުން ސަލާމަތީ ސަރަހައްދުތަކަށް ބަދަލުކޮށްފައިވާ ކަމަށް ސަރުކާރު އޮފިޝަލުން ވިދާޅުވި އެވެ.
ބިންގަނޑު ކަނޑައިގެން ދިޔަ އެއް ސަރަހައްދު ކަމަށްވާ އަރާނަޔަކާ އަށް ޒިޔާރަތް ކުރެއްވި ސްރީ ލަންކާ ރެޑް ކްރޮސްގެ އޮފިޝަލަކު ވިދާޅުވީ މަރުވި މީހުންގެ އަދަދު މިހާރު ލަފާކޮށްފައިވާ މިންވަރަށް ވުރެ އިތުރު ވާނެ ކަމަށް ބެލެވޭ ކަމަށެވެ.
ބޯކޮށް ވާރޭ ވެހި ފެންބޮޑުވުމުގެ ސަބަބުން 350،000 ވަރަކަށް މީހުން ވަނީ އެމީހުންގެ ގެދޮރު ދޫކޮށް ދާން ޖެހިފަ އެވެ. ހާލުގައި ޖެހިފައިވާ މީހުން ސަލާމަތް ކުރުމަށް އަރަނާޔަކާގައި 300 ސިފައިން ހަރަކާތްތެރިވަމުންދާ ކަމަށް އޮފިޝަލުން ވިދާޅުވި އެވެ. (އަލްޖަޒީރާ)