15 May 2016, 18:39
އޭޓީއެމް އަދި އިންޓަނެޓް ބޭންކިންގެ އިތުރުން، ބީއެމްއެލް މޯބައިލް އެޕްލިކޭޝަން މެދުވެރިކޮށް ފޯނަށް ފައިސާ ރީޗާޖު ކުރެވޭ ޚިދުމަތް ދިނުން ބޭންކް އޮފް މޯލްޑިވްސްއިން ވަގުތީ ގޮތުން މެދުކަނޑާލައިފި އެވެ.
ބީއެމްއެލުން އެގޮތަށް ނިންމާފައި ވަނީ، އޭޓީއެމް މެދުވެރިކޮށް ފައިސާ ރީޗާޖު ކުރެވޭ އަދަދު ލިމިޓް ކުރުމަށް ދިރާގު އަދި އުރީދޫ މޯލްޑިވްސްއަށް ހޯމް މިނިސްޓަރު އުމަރު ނަސީރު އަންގަވާފައި ވަނިކޮށެވެ.
ބީއެމްއެލުން މިއަދު ނެރުނު ބަޔާނެއްގައި ބުނެފައި ވަނީ، އެ ކުންފުނީގެ އޭޓީއެމްތަކުން ދެމުން ދިޔަ ޚިދުމަތަކީ ރީޗާޖު ކުރުމުގެ ޚިދުމަތް ނޫން ކަމަށާއި އޭޓީއެމުން ދެމުން ދިޔަ ޚިދުމަތަކީ ފިހާރަތައް ފަދައިން، މުވާސަލާތީ ކުންފުނިތަކުން ރީޗާޖު ވައުޗާތައް ނުވަތަ ފޯނު ކާޑުތައް ވިއްކުން ކަމަށެވެ.
"ކަސްޓަމަރުން އޭޓީއެމް މެދުވެރިކޮށް ރިޗާޖް ވައުޗާ ގަންނަނީ އޭޓީއެމް އިން ފައިސާގެ މުޢާމަލާތް ކުރާގޮތަށް ކާޑާއި ޕިން ބޭނުންކޮށްގެން ނުހަނު ރައްކާތެރިކަމާއެކުގަ އެވެ. ކަސްޓަމަރުން ވައުޗަރ ގަތުމަށްފަހު ބޭނުންކުރާ ގޮތް ވައުޗަރ ވިއްކާ ފަރާތްތަކަށް ބެލެން ނޯންނަ ފަދައިން ބޭންކަށްވެސް ބެލެން ނޯވެއެވެ،" ބީއެމްއެލްގެ ބަޔާނުގައި ބުނެފައި ވެ އެވެ.
ބީއެމްއެލުން ބުނީ، ޕްރޮމޯޝަންތަކުގެ ނަމުގައި ބައެއް ފަރާތްތަކުން ފޯނުކޯލުތަކެއް ކޮށްގެން މިފަދައިން ރީޗާޖު ވައުޗާ ފޮނުވަމުންދާ ކަމަށާއި އެކަމާ ގުޅިގެން ފައިސާ ރީޗާޖު ކުރެވޭ އަދަދު ލިމިޓު ކުރުމަށް އެދި ހޯމް މިނިސްޓްރީން މުވާސަލާތީ ކުންފުނިތަކަށް ފޮނުވި ސިޓީގެ ކޮޕީއެއް ބީއެމްއެލްއަށް ވެސް ފޮނުވާފައިވާ ކަމަށެވެ.
ބޭންކުން ބުނީ، އެކަން ހުއްޓުވުމަށް މިވަގުތު ބޭންކުން އަޅަންޖެހޭ ފިޔަވަޅަކީ، އެ ޚިދުމަތް ދިނުން ވަގުތީ ގޮތުން ހުއްޓާލުން ކަމަށް ފެންނަ ކަމަށެވެ.
"މިކަން ހުއްޓުވުމަށް ބޭންކުން އަޅަން ޖެހޭ ފިޔަވަޅަކީ މި އިންޓަރނެޓް ބޭންކިން އަދި ،ޚިދުމަތް ވަގުތީ ގޮތުން ހުއްޓާލުންކަމަށް ބޭންކަށް ފެންނާތީވެ، މިވަގުތުން ފެށިގެން އޭޓީއެމް ބީއެމްއެލް އެޕް މެދުވެރިކޮށް މޮބައިލް ފޯން ރިޗާޖް ވައުޗާސް ލިބެން ނުހުންނާނެ ވާހަކަ ކަސްޓަމަރުންގެ މައޫލާމަތަށްޓަކައި ދަންނަވަމެވެ،" ބީއެމްއެލްއިން ބުނެ އެވެ.
އެކި މީހުންގެ ފޯނުތަކަށް ގުޅައިގެން އޮޅުވާލައިގެން އެމީހުންގެ ބޭންކު އެކައުންޓުގައި ހުންނަ ފައިސާ ފޯނުތަކަށް ރީޖާޗު ކުރަމުން އަންނައިރު، އެކި ޕްރޮމޯޝަންތަކުގެ ނަމުގައި އެކި މީހުންގެ ފޯނުތަކަށް ގުޅައިގެން ރީޗާޖު ކުރުމުގެ މައްސަލަތައް ވެސް ރާއްޖޭގައި ވަނީ ވަރަށް ބޮޑަށް އިތުރުވެފަ އެވެ.
އެއްވެސް ރައްޔިތެއްގެ އަތުން ފައިސާ ހޯދުމަށް އެއްވެސް ކުންފުންޏަކުން ނުވަތަ އެއްވެސް އިދާރާއަކުން ނުގުޅާނެ ކަމަށާއި އެފަދަ ފޯން ކޯލުތަކަށް އިޖާބާ ނުދިނުމަށް ކަމާބެހޭ ފަރާތްތަކުން ވަނީ އިލްތިމާސް ކޮށްފައެވެ.