11 May 2016, 13:16
ދެހާސް ސާދަ ވަނަ އަހަރުގެ ޑިސެމްބަރު މަހުގެ 13 ވަނަ ދުވަހުގެ ރޭގެ ވަގުތެއްގައި މއ. ބޭރުމަތީގޭގެ ހަ ވަނަ ފަންގިފިލާއިން މަގުމައްޗަށް ވެއްޓި ހ. ދޫހިމެރިގެ، ނަދާލް ރަޝީދު،25، މަރުވި މައްސަލައާ ގުޅިގެން ހައްޔަރުކުރި ހަތަރު މީހެއްގެ މައްސަލަ އިސްތިއުނާފުކޮށްފި އެވެ.
އެ މައްސަލާގައި ޖުމްލަ ފަސް މީހަކު ވަނީ ހައްޔަރުކޮށްފަ އެވެ.
އެ ހަތަރު މީހުންގެ ގާނޫނީ ވަކީލު އަހުމަދު ނާޒިމް އަބްދުއްސައްތާރު މިއަދު ސަން އަށް ވިދާޅުވީ އެމީހުންގެ ބަންދުގެ މުއްދަތު 15 ދުވަހަށް އިތުރުކުރި މައްސަލަ ހައިކޯޓުގައި އިސްތިއުނާފު ކުރުމަށްޓަކައި ކްރިމިނަލް ކޯޓަށް އިއްޔެ ލިޔުންތައް ހުށަހަޅާފައިވާ ކަމަށެވެ.
އެމީހުންގެ މައްޗަށް ފުލުހުން ކުރާ ތުހުމަތަކީ އެނގިހުރެ މީހަކު މެރުމުގެ ތުހުމަތެވެ.
އިސްތިއުނާފު ކުރި މައްސަލާގައި ބުނެފައި ވަނީ ހައްޔަރުކުރި މީހުންގެ ތެރޭގައި ހިމެނޭ އެކަކު އޭނާ ވައްޓާލި ކަމަށް ތުހުމަތުކޮށްފައިވާއިރު، ކޯޓު އަމުރުގައި ތުހުމަތު ކުރެވުނު ކުށުގެ ސީޣާގައި ބުނެފައި ވަނީ ނަދާލް ވެއްޓި މަރުވި ކަމަށެވެ.
އެ މީހުންގެ ބަންދުގެ މުއްދަތު އިތުރުކޮށްފައި ވަނީ ގާނޫނު އަސާސީގެ 49 ވަނަ މާއްދާގައި ބަޔާންކުރާ ކުށްކުށަށް ތުހުމަތު ކުރެވޭ މީހުން މިނިވަންކުރުމުގެ އުސޫލުތަކުގެ ތެރެއިން ބަންދުގައި ބަހައްޓައިގެން މައްސަލަ ކުރިއަށްގެންދެވޭ ޝަރުތުތަކުގެ ތެރެއިން އެއްވެސް ޝަރުތަކަށް ނުފެތެނީސް ކަމަށް އެ މައްސަލާގައިވެ އެވެ.