11 May 2016, 11:01
ބްރަޒީލިޔާ (މޭ 11): ބްރަޒީލްގެ ރައީސާ ޑިލްމާ ރޮސޭފް، މަގާމުން ޢަޒުލުކުރުމުގެ މައްސަލާގައި އެ ގައުމުގެ ސެނެޓުން މިއަދު ގޮތެއް ނިންމާނެތީ ރިޔާސީ ގަނޑުވަރުން ނުކުމެވަޑައިގަތުމަށް އެކަމަނާ ތައްޔާރުވެ ވަޑައިގަންނަވަމުން އެބަގެންދަވަ އެވެ.
ރިޕޯޓްތައް ބުނާގޮތުން ރިޔާސީ ގަނޑުވަރުގެ ޚާދިމުން ގެންދަނީ ޑިލްމާގެ އަމިއްލަފުޅުތަކެތި ފޮށިފޮއްޓަށް އަޅައި ބަންދުކުރަމުންނެވެ. މީގެ ތެރޭގައި އެކަމަނާގެ ހެދުންކޮޅުތަކާއި އަމިއްލަ ތަކެތި ހިމެނެއެވެ. ޑިލްމާ ދިރިއުޅުއްވާ ޕްލަނަލްޓޯ ރިޔާސީ ގަނޑުވަރުގައި 300 އަށްވުރެ ގިނަ މުވައްޒަފުންނާއި ޚާދިމުން އެކަމަނާގެ ޚިދްމަތުގައި ތިބެއެވެ. މުވައްޒަފުންގެ ތެރޭގައި ޚާދިމުންގެ އިތުރުން އިދާރީ މީހުންނާއި ކައްކާއިންނާއި ބާޒާރުކުރާ މީހުންނާއި ބަނޑޭރީންފަދަ މީހުން ހިމެނެއެވެ. މީގެއިތުރުން ރިޔާސީ ގަނޑުވަރު ބެލެހެއްޓުމަށް ރިޔާސީ ގާޑުންގެ ފޯހެއް އޮވެއެވެ.
ރިޔާސީ ގަނޑުވަރުގެ ޚާދިމުންނާއި ޚާދިމާއިން ޑިލްމާގެ ފޮށިކޮޅުތަކަށް އެއްޗެހި އަޅައި ތައްޔާރުކުރަނީ ޑިލްމާ މަގާމުން ދުރުކުރުމަށް ބްރަޒީލްގެ ސެނެޓުގެ މެންބަރުގެ ގިނަ ބަޔަކު ވޯޓުދޭނެކަމުގެ އަޑުތައް ފެތުރިފައިވަނިކޮށެވެ. ބްރަޒީލްގެ ޕާލަމެންޓްގެ ދަށުގެ ކަމަށްވާ ހައުސް އޮފް ރެޕްރެޒެންޓެޓިވްގެ ބޮޑު އަޣްލަބިއްޔަތަކުން މިދިޔަ އެޕްރީލްމަހު ވަނީ ޑިލްމާ މަގާމުން ދުރުކުރުމަށް ފާސްކޮށްފަ އެވެ.
ޑިލްމާގެ މައްޗަށް ކުރެވިފައިވާ ތުހުމަތަކީ ބްރަޒީލްގެ ދައުލަތުގެ ބަޖެޓް އޮޅުވާލުމަށް މަސައްކަތް ކުރެއްވުމާއި ބަޖެޓްގެ ގާނޫނާ ޚިލާފްވުމެވެ. މި މައްސަލާގައި ޑިލްމާގެ ސަރުކާރުގެ ދިފާއުގައި ސްޕްރީމް ކޯޓު ނުކުތުމަށް އެދި ސަރުކާރުގެ ގާނޫނީ ޓީމުން ސްޕްރީމް ކޯޓަށް ކުރި އިލްތިމާސްތަކަށް ސްޕްރީމް ކޯޓުން ވަނީ ބީރުކަންފަތެއް ދީފަ އެވެ. ޑިލްމާ މަގާމުން ދުރުކުރުމަށް އެ ގައުމުގެ ކޮންގްރެސްގައި ކުރެވެމުންދާ މަސައްކަތް ހުއްޓުވޭނެ ހަމައެކަނި ފަރާތަކީ ސްޕްރީމް ކޯޓެވެ. އެކޯޓުން ވަނީ މިކަމަށް ދެކޮޅު ހަދާފަ އެވެ.
ޑިލްމާ މަގާމުން ދުރުކޮށްފިނަމަ އެކަމަނާވެގެން ދާނީ ފަހުގެ ތާރީޚެއްގައި ގާނޫނީ ގޮތުން މަގާމުން ދުރުކުރާ ބްރަޒީލްގައި ފުރަތަމަ ރައީސް ކަމުގައެވެ. އެކަމަނާ މިހާރު އަދާކުރައްވަމުން ގެންދަވަނީ ރިޔާސީ ދެވަނަ ދައުރެވެ. މަގާމުން ދުރުކުރި ނަމަވެސް ސަރުކާރުގެ އާދައިގެ ގަނޑުވަރެއްގައި ސަރުކާރުގެ ޚަރަދުގައި ސެކިއުރިޓީއާ އަދި މަދު އަދަދެއްގެ ޚާދިމުންނާއެކު ދިރިއުޅުއްވުމުގެ ފުރުސަތު ޑިލްމާއަށް ލިބިވަޑައިގަންނަވާނެ އެވެ. އެއީ މަގާމުން ދުރުކުރުމުގެ ކުރިން ރިޔާސީ ދެވަނަ ދައުރެއް އެކަމަނާ އަދާކުރައްވަމުން ގެންދަވާތީ އެވެ. (ނޫސްއެޖެންސީތައް)