09 May 2016, 16:19
ވޮލީ ބޯލް އެސޯސިއޭޝަން އޮފް މޯލްޑިވްސް އިން ކުރިއަށް ގެންދިޔަ އިންޓާ ކޮލެޖް އަދި ޔުނިވަސިޓީ ވޮލީ މުބާރާތުގެ ފިރިހެން އަދި އަންހެން ބައިގެ ޗެމްޕިއަންކަން ވެސް މޯލްޑިވިސް ނޭޝަނަލް ޔުނިވަސިޓީ (އެމްއެންޔޫ) ހޯދައިފިއެވެ.
ސޯސަލް ސެންޓަރު އެތެރޭ ކޯޓްގައި ރޭ ކުޅުނު ފިރިހެން ބައިގެ ޗެމްޕިއަންކަން އެމްއެންޔޫ ހޯދީ ސީދާ ތިން ސެޓުން ސައިރެކްސް ކޮލެޖުގެ މައްޗަށް ކުރި ހޯދައިގެންނެވެ. މެޗުގެ ސެޓްތަށް އެމްއެންޔޫ ގެންދިއައީ 20-25، 24-26، 22-25 އިންނެވެ. ފައިނަލް މެޗުގެ މޮޅު ކުޅުންތެރިއަކަށް ހޮވުނީ އެމްއެންޔޫގެ ޖަޒްލާން މުޙައްމަދު އެވެ.
އިންޓަރ/ ކޮލެޖް ޔުނިވަސިޓީ ވޮލީ މުބާރާތުގެ ފިރިހެން ބައިގެ އެންމެ މޮޅު ކުޅުންތެރިން ---
ފައިނަލް މެޗަށް ފަހު ފިރެހެންބައިގެ އެންމެ މޮޅު ހަ ކުޅުންތެރިން ހޮވިއިރު އޭގެ ތެރޭގައި ހިމެނެނީ އެމްއެންްޔޫގެ އަޙްމަދު މާޒް އާއި ޖަޒްލާން މުޙައްމަދު އާއި މުޙައްމަދު ފައިސަލް އާއި ނަޝީދު އަބްދުﷲ އާއި ސައިރިކްސް ކޮލެޖްގެ ހަސަން އަގްލީން އާއި އާދަމް ހަލީމް އެވެ. އެންމެ މޮޅު ކޯޗަކީ އެމްއެންޔޫގެ ކޯޗު މައުމޫރު މުހައްމަދު އެވެ.
އިންޓަރ/ ކޮލެޖް ޔުނިވަސިޓީ ވޮލީ މުބާރާތުގެ އަންހެން ބައިގެ ޗެމްޕިއަންކަން އެމްއެންޔޫ ހޯދުމަށް ފަހު ---
އަންހެން ބައިގެ ޗެމްޕިއަންކަން އެމްއެންޔޫ ހޯދީ ވާދަވެރި ކުޅުމަކަށް ފަހު ފައިނަލްގައި 3-1 ސެޓުން ވިލާ ކޮލެޖްގެ މައްޗަށް ކުރި ހޯދައިގެންނެވެ. އެ މެޗުގެ ފުރަތަމަ ސެޓް 22-25 އިން އެމްއެންޔޫ ގެންދިޔައިރު ދެ ވަނަ ސެޓް ކާމިޔާބް ކުރީ ވިލާ ކޮލެޖެވެ. އަދި ފަހު ދެ ސެޓް އެމްއެންޔޫ އިން ކާމިޔާބް ކުރީ 25-19 އިންނެވެ.
އިންޓަރ/ ކޮލެޖް ޔުނިވަސިޓީ ވޮލީ މުބާރާތުގެ އަންހެން ބައިގެ އެންމެ މޮޅު ކުޅުންތެރިން ---
އަންހެން ބައިގެ އެންމެ މޮޅު ކުޅުންތެރިންނަށް ހޮވުނީ އެމްއެންޔޫގެ އައިމިނަތު ނަސްމާ އާއި ފާތިމަތު ސާދާ އާއި އައިމިނަތު ހުޝާމާ އާއި ފަޒްލާ އަބޫބަކުރު އާއި ވިލާ ކޮލެޖްގެ ފާތިމަތު ޒީނިޔާ އާއި އައިޝަތު އިމްތިނާނެވެ. އަދި އެންމެ ލިބަރޯ ކުޅުންތެރިއަކަށް ހޮވުނީ އެމްއެންޔޫގެ ސިލްމާ ޒާހިރުއެވެ. އެންމެ މޮޅު ކޯޗަކީ އެމްއެންޔޫގެ ސޮފްވާން އަޙްމަދު އެވެ.