08 May 2016, 11:21
ބިން ހިއްކުމުގެ މަސައްކަތުގައި ރާއްޖޭގެ އިތުރުން މި ސަރަހައްދުގައި ވެސް ފާހަގަކޮށްލެވޭ ކުންފުންޏަކަށްވުމަށް އެމްޓީސީސީން މިއަހަރުގެ ފަހުކޮޅު ގެނައުމަށް ހަމަޖެހިފައިވާ ޑުރެޖަރުގެ ކުރެހުމެއް ދައްކާލައިފި އެވެ.
އެމްޓީސީސީން އެ ޑުރެޖަރު ކުރެހުން ދައްކާލައިފައި ވަނީ އެ ކުންފުނިން އާއްމުކޮށްފައިވާ މިދިޔަ އަހަރުގެ އަހަރީ އާއްމު ރިޕޯޓުގަ އެވެ. މިއަހަރުގެ ފަހުކޮޅު ރާއްޖެ ގެންނަ އެ ޑުރެޖަރުގެ ސަބަބުން ބިން ހިއްކުމަށް ނަގާ މުއްދަތު އަވަސް ވެގެންދާނެ ކަމަށް އެމްޓީސީސީން ބުންޏެވެ.
އެ ޑުރެޖަރަކީ 36 މިލިއަން ޑޮލަރަށް އެމްޓީސީސީން ގެންނަ ޑުރެޖަރެކެވެ. އެ ފައިސާ ދައްކާ ހަލާސްކޮށްފައިވާ ކަމަށް އެމްޓީސީސީން ވަނީ ބުނެފަ އެވެ.
މިދިޔަ އަހަރުގެ ޖޫން މަހުގެ ތެރޭގައި އެމްޓީސީސީން ބޭއްވި އަހަރީ އާއްމު ޖަލްސާގައި ވާހަކަފުޅުދައްކަވަމުން އެކުންފުނީގެ ޗެއާމަން ހުސައިން ސާލިމް މުހައްމަދު ވިދާޅުވީ ބިން ހިއްކުމުގެ މަސައްކަތްކުރާ މި ސަރަހައްދުގެ އިސްކުންފުންޏެއްގެ ގޮތުގައި އެމްޓީސީސީ ގާއިމުކުރުމަށް ޕްލޭނެއް އެކުލަވާލާފައިވާ ކަމަށެވެ. އެ ޑްރެޖާގެ ސަބަބުން އެމްޓީސީސީ އިން ބިން ހިއްކުމުގެ މަސައްކަތް މުޅިން ބަދަލުވެގެންދާނެ ކަަމަށެވެ.
ރައްޔިތުންގެ މަޖިލިސް މިއަހަރަށް ހުޅުވުމުގެ ގޮތުން ރިޔާސީ ބަޔާން އިއްވަމުން ރައީސް އަބްދުﷲ ޔާމީނު ވިދާޅުވީ ބިން ހިއްކުމަށްޓަކައި ޑްރެޑްޖަރެއް ސަރުކާރުން ގަތުމަށް ފައިސާ ދައްކާފައިވާ ކަމަށެވެ.
އެމްޓީސީސީން ގެންނަ އެ ޑުރެޖަރަކީ ދެ ދުވަހުގެ ތެރޭގައި ހެކްޓަރެއްގެ ބިން ހިއްކާލެވޭ ވަރުގެ ޑުރެޖަރެކެވެ.