09 May 2011, 19:03
ނުކުޅެދުންތެރިކަން ހުންނަ ފަރާތްކަށް ސަރުކާރުންދޭ ފައިސާގެ އިނާޔަތަށް އެދި މިހާތަނަށް 4000 އަށް ވުރެ ގިނަ ފަރާތުން ފޯމްލައިފި އެވެ.
ހެލްތު މިނިސްޓްރީން އާންމު ކުރި ފެކްޓް ޝީޓެއްގައި ބުނަނީ އިނާޔަތުގެ ފައިސާއަށް އެދުމުގެ ފުރުސަތު ހުޅުވައިލުމުން މިހާތަނަށް 4288 ފަރަތާކުން ފޯމް ލާފައިވާ ކަމަށާއި އޭގެ ތެރެއިން 2318 ފޯމްގެ މައުލޫމާތު ބަލައި ޗެކްކޮށް އެ ފަރާތްތަކަށް ލިބެންޖެހޭ 2000ރ. ގެ އިނާޔަތް ދޫކުރަން އެންސްޕާއަށް ފޮނުވާފައިވާ ކަމަށެވެ.
މީގެ އިތުރުން އެ ފޯމްތަކުގެ ތެރޭގައި ހިމެނޭ ނުޅެދުންތެރިކަން ހުރި މީހުންގެ ގޮތުގައި ބެލެވެން ނެތް 68 ފަރާތަކަށް އެކަން ރަސްމީކޮށް އަންގާފައިވާނެ ކަމަށް ވެސް މިނިސްޓްރީން ބުންޏެވެ. އެފަރާތްތަކުގެ ތެރޭގައި ނުކުޅެދޭ މީހުން ކަމަށް ބަލާ މިންގަނޑަށް ނުފެތޭ ތެލަސީމިޔާ ބައްޔާއި ހިތުގެ ބައްޔާއި ހަކުރު ބަލިތައް ފަދަ ބަލިތަކުގެ މީހުން ވެސް ހިމެނެ އެވެ.
މިނިސްޓްރީން ބުނީ މިހާރު ހުރި ފޯމްތަކުގެ ތެރެއިން އެންސްޕާއަށް ނުފޮނުވާ ހުރީ މެޑިކަލް ސެޓްފިކެޓާއި ބޭންކް އެކައުންޓާއި އައިޑީކާޑްފަދަ މުހިންމު ޑޮކިއުމެންޓްތަކުގެ ކޮޕީ ނުލިބުމުންނާއި ސިދާ މުއާމަލާތް ކުރާނެ ނަމްބަރެއް ނެތިގެން މަޑު ޖެހިފައިވާ ފޯމްތައް ކަމަށެވެ.
"... މިނިސްޓްރިން މިގެންދަނީ ނުނިމި ހުރި ފޯމްތަކުގެ މައްސަލަ ހައްލުކޮށް ވީއެންމެ އަވަސް ފުރުސަތެއްގައި އެ ފަރާތްތަކަށް ދޭންޖެހޭ އިނާޔަތް ދޫކުރެވޭނެ އިންތިޒާމް ހަމަޖެއްސުމަށެވެ،" ނޫސްތަކަށް މީނިސްޓްރީން މިއަދު އާންމު ކޮށްފައިވާ މައުލޫމާތު ކަރުދާހުގައި ވެ އެވެ.
ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ގާނޫނެއް ފާސް ކުރީ މިދިއަ އަހަރު އެވެ. އެ ގާނޫނާ ގުޅިގެން ނުކުޅެދޭ މީހުންގެ ދަފުތަރެއް ސަރުކާރުން ވަނީ ފުރަތަމަ ފަހަރަށް އެކުލަވައިލައިފަ އެވެ.