04 May 2016, 13:10
މަދަނީ މައްސަލަތަކުގައި ކުރާ ހުކުމް ތަންފީޒުކުރުމަށް މެޖިސްޓްރޭޓް ކޯޓުތަކުގައި ޑިވިޝަންތައް ގާއިމް ކުރުމަށް ކަނޑައަޅާފައިވާ ކަމަށް އުއްތަމަ ފަނޑިޔާރު އަބްދުﷲ ސައީދު ވިދާޅުވެއްޖެ އެވެ.
މަދަނީ މައްސަލަތަކުގައި ކުރާ ހުކުމް ތަންފީޒުކުރުމަށް މިހާރު ހުށަހަޅަން ޖެހެނީ ސިވިލް ކޯޓަށެވެ. ވޭތުވެ ދިޔަ އަހަރު ސިވިލްކޯޓުގައި ވެސް ވަނީ ހުކުމް ތަންފީޒުކުރުމަށް ވަކި ޑިވިޝަނެއް ގާއިމްކޮށްފަ އެވެ. ޖުޑިޝަރީ އަހަރު 2016 އިފްތިތާހުކުރުމަށް ރޭ ޕެރަޑައިސް އައިލެޑް ރިސޯޓުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން އުއްތަމަފަނޑިޔާރު އަބްދުﷲ ސައީދު ވިދާޅުވީ މަދަނީ މައްސަލަތަކުގައި ކުރާ ހުކުމް ތަންފީޒު ކުރުމަށް މެޖިސްޓްރޭޓް ކޯޓުތަކުގައި ޑިވިޝަންތައް ގާއިމް ކުރުމަށް ހަމަޖެހިފައިވާ ކަމަށެވެ.
އުއްތަމަ ފަނޑިޔާރު ވިދާޅުވީ ސިވިލްކޯޓުގައި ވެސް ހުކުމް ތަންފީޒު ކުރުމަށް ވަކި ޑިވިޝަނެއް ގާއިމްކުރުމުގެ ސަބަބުން ވިޔަފާރި އާއި މާލީ މުއާމަލާތާ ގުޅޭ މައްސަލަތައް ފަދަ މަދަނީ މައްސަލަތަކާއި ކޯޓުތަކުން ކުރާ ހުކުމް ތަންފީޒުނުކުރެވި ދިގުލައިގެން ދިއުމުގެ މައްސަލައަށް ހައްލެއް ލިބިފައިވާ ކަމަށެވެ.
"އަޅުގަނޑުގެ އުންމީދަނީ ހުކުމް ތަންފީޒުކުރުމުގެ ނިޒާމު އިތުރަށް ހަރުދަނާކުރެވި. ހުކުމްތައް މިހާރަށް ވުރެ ވެސް އަވަސްކަމާއި ހަލުވިކަމާއެކީ ތަންފީޒުކުރެވުން،" އުއްތަމަފަނޑިޔާރު އަބްދުﷲ ސައީދު ވިދާޅުވި އެވެ.
ސިވިލްކޯޓުގައި މިިދިއަ އަހަރު ވަނީ ފަސް ޑިވިޝަނެއް އެކުލަފާލާފަ އެވެ. އޭގެ ތެރޭގައި މުދަލާ ފައިސާއާ ބެހޭ ކުދި މައްސަލަތައް ބަލައި ޑިވިޝަނަކާ ބޮޑެތި މައްސަލަތައް ބަލާ ޑިވިޝަނެއް ވެސް ހިމެނެ އެވެ. އުއްތަމަ ފަނޑިޔާރު ވިދާޅުވީ ޑިވިޝަންތައް ގާއިމްކުރުމަކީ ޝަރުއީ ނިޒާމު ހަރުދަނާ ކުރުމަށް އެޅުނު ވަރަށް މުހިންމު ފިޔަވަޅެއް ކަމަށެވެ.
ހައިކޯޓުގެ ދެކުުނު ގޮފީގެ ތަފާސް ހިސާބުތަކަށް ބަލާ އިރު ހަމައެކަނި އެސަރަހައްދުން ވެސް އިސްތިއުނާފުކުރާ މައްސަލަ 100 ޕަސެންޓަށް އިތުރުވެފައިވާ ކަމަށް އުއްތަމަ ފަނޑިޔާރު އަބްދުﷲ ސައީދު ވަނީ ރޭ ފާހަގަކުރައްވާފަ އެވެ.
މީގެ ކުރިން އެކި އެކި މައްސަލަތަކާއި ގުޅިގެން އިސްތިއުނާފު މަރުހަލާއަށް ނުގޮސް ދޫކޮށްލަން ޖެހޭ މައްސަލަތައް މަދުކުރެވިފައިވާ ކަމަށެވެ. ހައިކޯޓުގެ ދެކުނު ގޮފި ގާއިމް ކުރެވިގެން ދިއުމުން އިސްތިއުނާފުގެ މަރުހަލާގައި "އެކްސެސް ޓު ޖަސްޓިސް އިތުރުކުރެވިފައިވާ ކަން ފާހަގަކުރެވޭ ކަމަށް އުއްތަމަ ފަނޑިޔާރު ވަނީ ވިދާޅުވެފަ އެވެ.
ދިވެހިރާއްޖޭގެ ހައިކޯޓުގެ ދެގޮތްޕެއް ދިވެހިރާއްޖޭގެ އުތުރާއި ދެކުނުގައި ގާއިމް ކުރުމަށް ގާނޫނު ގޮތުން ހަމަޖެހިގެން ދިޔަ ދިޔުމަކީ ޝަރުއީ ދާއިރާ އަށް ލިބުނު ކުރިރުމެއްގެ ގޮތުގައި އުއްތަމަފަނޑިޔާރު ވަނީ ފާހަގަކުރައްވާފަ އެވެ.
"ހައިކޯޓުގެ ދެކުނުގޮފީގެ ތަފާސް ހިސާބުތަކަށް ބަލާއިރު ހަމައެކަނި އެ ސަރަހައްދުން ވެސް އިސްތިއުނާފުކުރާ މައްސަލަ 100 ޕަސެއްޓަށް އިތުރުވެފައިވުމުން ކުރީގައި އެކިއެކި ހުރަސްތަކާއި ހުރެ އިސްތިއުނާފުގެ ހައްގު ދޫކޮށްލަން ޖެހޭ ޖެހުން މަދުކުރެވި. އިސްތިއުނާފުގެ މަރުހަލާގައި އެކްސެސްޓު ޖަސްޓިސް އިތުރުވެފައިވާކަން އެނގޭ." އުއްތަމަ ފަނޑިޔާރު އަބްދުﷲ ސައީދު ވިދާޅުވި އެވެ.
ހައި ކޯޓުގެ ދެކުނު ގޮފިން ބަލާނީ އައްޑޫ ސިޓީ އާއި ގދ. އަދި ފުވައްލުމަކުގައި ހުންނަ ފުރަތަމަ މަރުހަލާގެ ކޯޓުތަކާއި ޓުރައިބިއުނަލްތަކުން ނިންމާ މައްސަލަތަކެވެ.
ކޯޓުތަކާ ބެހޭ ގާނޫނަށް ގެނައި އިސްލާހުގެ ދަށުން ކުޅުދުއްފުށީގައި ގާއިމުކުރަން ޖެހޭ ކަމަށް ގާނޫނުގައި ބުނާ ހައި ކޯޓުގެ އުތުރު ގޮފި މިހާތަނަށް ގާއިމްކޮށްފައެއް ނުވެ އެވެ. އަދި އެގޮތްޕަށް ފަނޑިޔާރުން ވެސް ހަމަޖައްސާފައެއް ނުވެ އެވެ.