01 May 2016, 14:46
ބަައިނަލްއަގުވާމީ މަސައްކަތްތެރިންގެ ދުވަސް ފާހަގަ ކުރުމުގެ ގޮތުން މަދަނީ ޖަމިއްޔާތައް ގުޅިގެން މިއަދު ހަވީރު ބާއްވަން ނިންމާފައިވާ ހިނގާލުން ކުރިއަށްދާނެ ކަމަށް އެ ޖަމިއްޔާތަކުން ބުނެފި އެވެ.
ޖަމިއްޔާތައް ގުޅިގެން ނެރުނު ނޫސްބަޔާނެއްގައި ހިނގާލުން ކުރިއަށް ގެންދާނެ ކަމަށް ބުނެފައިވާ އިރު، އެ ހިނގާލުން ކުރިޔަށް ގެންދަން ފުރުސަތު ނުދޭން ނިންމާފައިވާ ކަމަށް ފުލުހުން ވަނީ ބުނެފަ އެވެ.
ނަމަވެސް މަދަނީ ޖަމިއްޔާތަކުން ގުޅިގެން މިއަދު ނެރުނު ނޫސްބަޔާނުގައި ބުނެފައި ވަނީ އެ ހިނގާލުން ބޭއްވުމަށް އިއުލާންކޮށްފައިވަނިކޮށް، ސުލްޙަވެރި ހިނގާލުން ބޭއްވުމަށް ފުރުސަތު ނުދޭނެ ކަމަށް ފުލުހުން ބުނެފައި ވަނީ ގާނޫނު އަސާސީ އާއި ފުލުހުންގެ ގާނޫނާއި ސުލްހަވެރިކަމާ އެކު އެއްވެއުޅުމުގެ ގާނޫނާ ހިލާފަށް ކަމަށެވެ.
"މިއަދު ބޭއްވުމަށް އިއުލާންކޮށްފައިވާ ސުލްހަވެރި ހިނގާލުމަށް ފުރުސަތު ނުދޭނެ ކަމަށް އިއުލާންކޮށްފައި ވަނީ އެއްވެއުޅުމުގެ ގާނޫނުގައި ބަޔާންކުރާ، އެއްވެއުޅުމުގެ ހައްގު ހަނިކުރެވޭނެ އުސޫލުތަކާ ހިލާފަށް ކަމުގައި ފާހަގަ ކުރަމެވެ." ނޫސްބަޔާނުގައިވެ އެވެ.
ފުލުުހުންގެ އިންޓާނަލް ސެކިއުރިޓީ ކޮމާންޑުގެ ހެޑް ޗީފްސުޕްރިންޓެންޑެންޓް އޮފް ޕޮލިސް ހަމްދޫން ރަޝީދު އިއްޔެ ސަން އަށް ވިދާޅުވީ، އެފަދަ ހިނގާލުމެއް ބޭއްވުމުން މާލޭގެ މަގުތަކުގައި ހިނގައި ބިނގައިވާ މީހުންނަށާއި ދުއްވާ ތަކެތި ދުއްވުން ހުއްޓި އޭގެ ސަބަބުން އެތައް ބަޔަކަށް ދަތިތައް ފޯރަމުންދާނެތީ ހިނގާލުން ކުރިޔަށް ގެންދަން ފުރުސަތު ނުދޭނެ ކަމަށެވެ.
މާލޭގެ މަގުތަކަކީ ކާރޫބާރު ބޮޑު މަގުތަކަކަށް ވެފައި ގިނަ ވަގުތުތަކަކަށް މަގުތައް ބަންދުކުރަން ޖެހުމުން ދަތުރުފަތުރުގެ ނިޒާމަށް ދަތިތައް ފޯރައި ހިނގައިބިނގައިވާ ފަރާތްތަކަށް ދަތިތައް ފޯރާތީ މިފަދަ ހިނގާލުންތައް ކުރިޔަށް ގެންދަން ފުރުސަތު ނުދޭން ފުލުހުން ވަނީ ނިންމާފަ އެވެ.
ޖަމިއްޔާތަކުން ބުނީ މީގެ ކުރިން އެފަދަ އެހެން މުނާސަބު ދުވަސްތައް ފާހަގަކުރުމަށް ފުރުސަތު ދީފައިވާ ކަމަށާއި އެހެން ނަމަވެސް އެ ހިނގާލުމަށް ހުރަސް އެޅުމަކީ ތަފާތުކުރުންކަމުގައި ދެކޭ ކަމަށެވެ.
މިއަދު ބާއްވަން ނިންމާފައިވާ ހިނގާލުމުގެ މަގުސަދަކީ މަސައްކަތްތެރިންނަކީ އެބައިމީހުންގެ ކަންކަން ނިންމުމުގައި ބަސްކިޔޭ ބަޔަކަށް ހެދުމަށާއި، މަސައްކަތުގެ މާހައުލަކީ ބިރުވެރިކަމެއްނެތި ހިޔާލު ފާޅުކުރުމުގެ މިނިވަންކަށް ލިބިދީފައިވާ، ކުރެވޭ ތުހުމަތު ތަކުން ބަރީއަވުމައް މަސައްކަތް ކުރެވޭނެ ހަރުދަނާ ނިޒާމެއްގެ ތެރޭގައި ތަފާތުކުރުންތަކުން އެއްކިބާވާ، ކޯޓުތަކާއި ވަޒީފާއާއި ބެހޭ ޓްރައިބިއުނަލް އިން ނިންމާ ނިންމުން ތަންފީޒްކުރެވި، ހަމަހަމަ ކަމާއި އެކު ދިރިއުޅެވޭނެ އުޖޫރައެއް ލިބިދެވޭ ފަދަ، ފަހުރުވެރި ބަޔަކަށް ހެދުމަށް ގޮވާލުން ކަމަށް ހިނގާލުން އިންތިޒާމް ކުރި ފަރާތުން ބުނެ އެވެ.
ހަމަ އެއާ އެކު ބިދޭސީ މަސަތްކަތްތެރިންނަކީ ވެސް އިންސާނުންކަމާއި ދިވެހި ގާނޫނުން ރައްކާތެރިކަން ލިބިދޭ ބައެއްކަމާއި، އެމީހުނާމެދު ކުރެވޭ ބޭއިންސާފު ނައްތާލާ އިހުތިރާމް ލިބިގެންވާ ބަޔަކަށް ހެދުމަށް، ވަޒީފާ ދޭ ފަރާތްތަކާއި ސަރުކާރާއި ކަމާބެހޭ މުއައްސަސާތަކަށް ގޮވާލުން ވެސް ހިނގާލުމުގެ މަގުސަދުތަކުގެ ތެރޭގައި ހިމެނެ އެވެ.
ހިނގާލުން ބޭއްވުމަށް ހަމަޖެހިފައި ވަނީ މިއަދު ހަވީރު، ސޯޝަލް ސެންޓަރުން ފެށިގެން މަޖީދީމަގުން ގޮސް އާޓިފިޝަލް ބީޗް އަށް ނިންމާގޮތަށެވެ. ހިގާލުން ކުރިއަށްދާނީ 16:00 އިން 18:00 އަށް ކަމަށް އެ ހިނގާލުން އިންތިޒާމުކުރާ ފަރާތުން ބުންޏެވެ.
ހިނގާލުން އިންތިޒާމު ކުރަނީ އަށް މަދަނީ ޖަމިއްޔާ އަކާއި މާލެ ސިޓީ ކައުންސިލްގެ އަންހެނުން ކުރިއަރުވާ ކޮމިޓީ ގުޅިގެންނެވެ.
އެއީ ޓުއަރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް (ޓީމް)، ޓީޗަސް އެސޯސިއޭޝަން އޮފް މޯލްޑިވްސް (ޓީއޭއެމް)، މޯލްޑިވްސް ޕޯޓް ވޯކަސް ޔޫނިއަން (އެމްޕީޑަބްލިއުޔޫ)، މޯލްޑިވިއަން ޑިމޮކްރަސީ ނެޓްވޯކް (އެމްޑީއެން)، ޓްރާންސްޕޭރެންސީ މޯލްޑިވްސް (ޓީއެމް)، ދި ޔޫތު މޫވްމެންޓް (ޑީވައިއެމް)، ޔޫތު އިންޓެގްރިޓީ ނެޓްވޯކް (ވައިއައިއެން)، މޯލްޑިވްސް އެސޯސިއޭޝަން ފޯ ފިޒިކަލް ޑިސްއޭބަލްސް (އެމްއޭޕީޑީ) އެވެ.