27 Apr 2016, 19:38
ރ. އުނގޫފާރުން ގޯތި ދޫކުރުމަށް އެ ރަށު ކައުންސިލުން 2013 ވަނަ އަހަރު ނިންމައި، ހެދި ޕްލޭނުގައި މައްސަލަތަކެއް އުޅޭތީ، އެރަށުން ގޯތި ދޫކުރުން މަޑުޖައްސައި، ގޯއްޗަށް އެދޭ ފޯމު ގަތް ފަރާތްތަކަށް ރިފަންޑު ދޭން ނިންމައިފި އެވެ.
އުނގޫފާރު ކައުންސިލުން ކުރި އިއުލާނެއްގައި ބުނެފައިވަނީ، 2013 ވަނަ އަހަރު އެ ކައުންސިލުން ކުރި އިއުލާނަކާ ގުޅިގެން ގޯއްޗަށް އެދި ބައެއް ފަރާތްތަކުން ފޯމު ހުށަހެޅި ނަމަވެސް، އެ ފޯމުތަކުގައި ބައެއް ފަރާތްތަކުން މައުލޫމާތު ފުރިހަމަ ނުކޮށް ހުރުމުގެ ސަބަބުން، ފޯމު ފުރިހަމަ ކުރުމަށް ދެވަނަ ފުރުސަތެއް ދިނުމަށް އެ ކައުންސިލުން ރ. އަތޮޅުގެ އަތޮޅު ކައުންސިލުގެ ލަފައަކަށް އެދުނު ކަމަށެވެ.
އުނގޫފާރު ކައުންސިލުން ބުނީ، އުނގޫފާރުން ގޯތި ދޫކުރުމުގެ މަސައްކަތް ފަށާފައި ވަނީ ވެސް، ދިވެހިރާއްޖޭގެ ބިމާ ބެހޭ ޤާނޫނާއި މި ޤާނޫނުގެ ދަށުން ދިރިއުޅުމަށްޓަކައި ބަންޑާރަގޯތި ދޫކުރުމަށް ހަދާފައިވާ ގަވައިދުގައި ކަނޑައަޅާފައިވާ އިޖުރާއަތްތަކާ ޚިލާފަށް ކަމަށް އަތޮޅު ކައުންސިލުން ބުނި ކަމަށެވެ. އަދި މޯލްޑިވްސް ލޭންޑް ސާވޭ އޮތޯރިޓީއިން ވެސް ހަމަ މިފަދައިން ބުނެފައިވާ ކަމަށް އުނގޫފާރު ކައުންސިލުން ބުނެ އެވެ.
އެހެންކަމުން، މި އަހަރުގެ ފެބްރުއަރީ މަހު އެ ކައުންސިލުން ބޭއްވި ބައްދަލުވުމެއްގައި ވަނީ، 2013 ވަނަ އަހަރުގެ އިއުލާނާ ގުޅިގެން ފޯމު ހުށަހެޅި ފަރާތްތަކުން ފޯމުތައް ބާތިލުކޮށް، އެފަރާތްތަކުން ފޯމު ގަތުމަށް ހޭދަކުރި ފައިސާގެ ރިފަންޑު ދިނުމަށް ކަމަށް އެ ކައުންސިލުން ބުނެފައި ވެ އެވެ.
އެގޮތުން، ރިފަންޑު ދޫކުރާނީ މޭ މަހުގެ ދެވަނަ ދުވަހުން 15 ވަނަ ދުވަހުގެ ނިޔަލަށް، ރަސްމީ ކޮންމެ ދުވަހެއްގެ ހެނދުނު 10:00 އިން 12:00 އަށް ކަމަށާއި، ފައިސާ ދޫކުރާނީ ފޯމު ގަތުމުން ލިބުނު ރަސީދުކޮޅު ގެނައުމުން ކަމަށް ކައުންސިލުން އިލްތިމާސް ކުރެ އެވެ.
އުނގޫފާރު ކައުންސިލުން ބުނީ، މިއަހަރުގެ މާރިޗު މަހުގެ ތެރޭގައި އުނގޫފާރުގެ ލޭންޑް ޔޫސް ޕްލޭން ހަދާފައިވާ ކަމަށާއި، 2013 ވަނަ އަހަރު ގޯތި ދިނުމަށް ކަނޑައެޅި ބައެއް ތަންތަނުން މިހާރު ގޯތި ދެވެން ނެތް ކަމަށެވެ. އަދި ގޯތީގެ މިންތަކަށް ބަދަލު އައިސްފައިވާ ކަމަށާއި، ދެވޭ ގޯތީގެ އަދަދު ވެސް އިތުރު ވެފައިވާ ކަމަށް އެ ކައުންސިލުން ބުނެ އެވެ.
އަދި، އުނގޫފާރުގެ އާ ލޭންޑް ޔޫސް ޕްލޭން ފާސް ކުރުމަށް ހައުސިންގ މިނިސްޓްރީއަށް ހުށަހަޅާފައިވާނެ ކަމަށާއި، އެ ޕްލޭން ފާސްވުމުން އުނގޫފާރުން ގޯތި ދޫކުރުމުގެ މަސައްކަތް ފަށާނެ ކަމަށް އުނގޫފާރު ކައުންސިލުން ބުނެ އެވެ.