27 Apr 2016, 13:20
މިއަހަރު ނިމުމުގެ ކުރިން ރާއްޖޭގެ ހުރިހާ އަތޮޅެއްގައި ރައްކާތެރިކަމާއެކު ލޭ ބެހެއްޓޭނެ ގޮތެއް ހަމަޖެއްސުމަށް މަސައްކަތް ކުރަމުން އަންނަ ކަމަށް ހެލްތު މިނިސްޓަރު ޑރ. އިރުތިޝާމް އާދަމް ވިދާޅުވި އެވެ.
ތެލެސީމިއާ ކޮންޓްރޯލްކޮށް އެކަމުން ރައްކާތެރިވުމަށް މީހުން ހޭލުންތެރިކުރުވުމަށް ސިއްހީ މާހިރުން ތަމްރީން ކުރުމަށް މިއަދު ފެށި ތަމްރީން ޕްރޮގްރާމުގައި ވާހަކަފުޅު ދައްކަވަމުން ހެލްތު މިނިސްޓަރު އިރުތިޝާމް އާދަމް ވިދާޅުވީ މިދިޔަ އޮގަސްޓް މަހުން ފެށިގެން މާލޭ ފިޔަވައި އަތޮޅު ތެރޭގައި ރައްކާތެރިކަމާއެކު ލޭ ބެހެއްޓުމަށް މަސައްކަތްތަކެއް ކުރެވިފައިވާ ކަމަށެވެ.
އެގޮތުން މިހާރު، ރާއްޖޭގެ ސިއްހީ ފަރުވާ ދޭ ފަސް މަރުކަޒެއްގައި ރައްކާތެރިކަމާއެކު ލޭ ބެހެއްޓޭނެ ގޮތް މޯލްޑިވިއަން ބުލަޑް ސާވިސް (އެމްބީއެސް) އިން ގާއިމްކޮށްފައިވާއިރު، މިއަހަރު ނިމުމުގެ ކުރިން އެ ހިދުމަތް ހުރިހާ އަތޮޅެއްގައި ގާއިމްކުރުމަށް މަސައްކަތްކުރައްވާނެ ކަމަށް ވިދާޅުވި އެވެ.
"މިއަހަރު ނިމޭއިރު، ހުރިހާ އަތޮޅެއްގައި ތެލެސީމިއާ ޕޭޝަންޓުންނަށް އަދި ތެލެސީމިއާ ޕޭޝަންޓުންގެ އާއިލާތަކަށް އެ ބަޔަކު ތިބި ރަށަކުން ލުއިފަސޭހަތަކެއް އިންތިޒާމް ކުރެވި ހިދުމަތް ލިބޭނެ ކަމަށް މަސައްކަތްކުރާނެ،" މިނިސްޓަރު ވިދާޅުވި އެވެ.
އެކަމަނާ ވިދާޅުވީ، ތެލެސީމިއާ ޕޭޝަންޓުންނަށް ބުލްޑް ޓްރާންސްފިއުޝަންތަކަށް ބޭނުންވާ މިޒަމާނުގެ ވަސީލަތްތައް ސަރުކާރުގެ ހަރަދުގައި އަތޮޅުތެރޭގައި ގާއިމްކުރުމުގެ މަސައްކަތްތަކެއްވެސް ދަނީ ކުރަމުންނެވެ.
އެގޮތުން، މިދިޔަ އަހަރު ތެލެސީމިއާއަށް ޓެސްޓު ކުރުމުގެ ހިދުމަތް ހުޅުމާލޭގެ އިތުރުން ރާއްޖޭގެ ހަ ސިއްހީ މަރުކަޒެއްގައި ފަށާފައިވާ ކަމަށް މިނިސްޓަރު ފާހަގަކުރެވި އެވެ.
މޯލްޑިވިއަން ބްލަޑް ބޭންކު (އެމްބީބީ)އާއި ދުނިޔޭގެ ސިއްހަތު ޖަމިއްޔާ، ވޯލްޑް ހެލްތް އޯގަނައިޒޭޝަން (ޑަބްލިއުއެޗްއޯ)އާ ގުޅިގެން ދެ ދުވަހުގެ މުއްދަތަށް ކުރިއަށްގެންދާ އެ ތަމްރީން ޕްރޮގްރާމުގައި ވ. އަތޮޅު ފިޔަވައި ރާއްޖޭގެ ކޮންމެ އަތޮޅަކުން ދެ ބައިވެރިންނާއި މޯލްޑިވިއަން ބްލަޑް ބޭންކުގެ ހަތަރު އޮފިޝަލުންނާއެކު ޖުމްލަ 41 މީހުން ބައިވެރިވެ އެވެ.
އެ ތަމްރީން ޕްރޮގްރާމުގައި ތެލެސީމިއާ ކެރިއަރުންނަށް ކައުންސިލިން ދިނުމުގެ މުހިއްމުކަމާއި ތެލެސީމިއާ އަށް ދެވެން ހުރި ފަރުވާތަކާގުޅޭ މައުޟޫތަކަށް މައުލޫމާތުދޭނީ ޑަބްލިއުއެޗްއޯގެ ދެ ކޮންސަލްޓުންނެވެ.
ރާއްޖޭގެ އާބާދީގެ 16.2 ޕަސެންޓު މީހުންނަށް ތެލެސީމިއާގެ އަސަރުކޮށްފައިވާއިރު، މިއަދާ ހަމައަށް 844 ތެލެސީމިއާ ޕޭޝަންޓުން އެމްބީބީ ގައި ރަޖިސްޓްރީކޮށްފައިވާ ކަަމަށް އެމްބީއެސް އިން ބުނެ އެވެ.
އޭގެ ތެރެއިން 250 އަށްވުރެއް ގިނަ ޕޭޝަންޓުން މާލޭގައި އުޅޭއިރު، ކޮންމެ އަހަރަކު 26 މީހަކު ތެލެސީމިއާ ޕޭޝަންޓުންގެ ގޮތުގައި އެމްބީއެސްގައި ރަޖިސްޓްރީ ކުރެއެވެ. އަދި ތެލެސީމިއާ ޕޭޝަންޓަކަށް ކޮންމެ މަހަކު ސަރުކާރުން 12000 ރުފިޔާ ހަރަދުކުރާ ކަމަށް އެމްބީއެސް އިން ބުނެއެވެ.