27 Apr 2016, 10:33
ޔޫއެފާ ޗެމްޕިއަންސް ލީގުގެ ސެމީ ފައިނަލުގެ ފުރަތަމަ ލެގުގައި އިނގިރޭސި ކްލަބު މެންޗެސްޓާ ސިޓީ އާއި ސްޕެއިން ކްލަބު ރެއާލް މެޑްރިޑް ކުޅުނު މެޗުގައި ކެމެރާތަކަށް އެންމެ ބުރަ މަސައްކަތުން ނެގި މަންޒަރަކީ ރެއާލްގެ ޕޯޗުގަލް ތަރި ކްރިސްޓިއާނޯ ރޮނާލްޑޯ ވީޑިއޯއެއް ބަލައިލުމުގައި ވަގުތު ހޭދަކޮށްލި މަންޒަރެވެ.
ޗެމްޕިއަންސް ލީގުގައި ރޭ ލަނޑެއް ނުޖެހި އެއްވަރުވެގެން ނިމުނު ސިޓީ އާއި ރެއާލް ބައްދަލުކުރި މެޗު، ބެލުމަށްވުރެ ރޮނާލްޑޯ ހާއްސަ އިސްކަމެއް ދިނީ ވީޑިއޯއެއް ބަލައިލުމުގަ އެވެ. އަނިޔާގެ ސަބަބުން މެޗު ބަލަން އިންނަން ޖެހުނު، ރޮނާލްޑޯއަށް ފޫހިކަމެއް ނެތި ބަލައިލެވުނީ އެ ވީޑިއޯކަން ކެމެރާތަކުން ދައްކަ އެވެ.
ހެޑްފޯން އަޅައިގެން ރޮނާލްޑޯ ބަލަން އިނީ ކޮން އެއްޗެއްކަން ކެމެރާތަކަށް ފުރަތަމަ ފާހަގަކުރެވިފައެއް ނުވެ އެވެ. ނަމަވެސް އެ ކުރު ވީޑިއޯ ބަލައިލުމަށްފަހު، ހެޑްފޯން ނައްޓާލުމަށް ރޮނާލްޑޯގެ ފޯނު އަނބުރާލި ވަގުތު ކެމެރާއަށް އެއީ ވީޑިއޯއެއް ކަމާއި އެއީ ކޮން ވީޑިއޯއެއްކަން އެނގިގެންދިޔަ އެވެ.
ޔޫއެފާ ޗެމްޕިއަންސް ލީގުގެ ސެމީ ފައިނަލުގެ ފުރަތަމަ ލެގުގައި މެންޗެސްޓާ ސިޓީއާއި ރެއާލް މެޑްރިޑް ބައްދަލުކުރި މެޗުގެ ތެރެއިން ޝައުގުވެރިކަމާއެކު ރޮނާލްޑޯ ބަލަން އިން ވީޑިއޯ ބަލައި ނިންމާލަނީ --- ފޮޓޯ: ގެޓީ އިމޭޖަސް
ޝައުގުވެރިކަމާއެކު ރޮނާލްޑޯ ބަލަން އިނީ ކުރީގެ ފުޓްބޯޅަ ކުޅުންތެރިޔާގޭރީ ލިނެކާގެ އިންސްޓްގްރާމް އެކައުންޓްގައިޕޯސްޓްކޮށްފައިވާ ވީޑިއޯ އެކެވެ. އެއީ ރޮނާލްޑޯގެ އަމިއްލަ މަންޒަރު ދައްކުވައިދޭ ވީޑިއޯއެކެވެ. އެއީ މެޗުގެ ކުރިން ރޮނާލްޑޯގެ ސަޕޯޓަރުންނަށް އޭނާއަށް މެޗުގައި ބައިވެރިނުވެވޭކަން އިޝާރާތުން ދައްކާލި މަންޒަރެވެ.
ރޮނާލްޑޯއަކީ މި ސީޒަނުގެ ޗެމްޕިއަންސް ލީގުގައި މިހާތަނަށް އެންމެ ގިނަ ލަނޑު ޖަހާފައިވާ ކުޅުންތެރިޔާ އެވެ. އޭނާ ވަނީ ޗެމްޕިއަންސް ލީގުގައި މިހާތަނަށް ކުޅުނު 10 މެޗުން 16 ލަނޑު ކާމިޔާބުކޮށްފަ އެވެ. އޭނާއާ އެންމެ ގާތުން ރަން ބޫޓަށް ވާދަކުރާ މަކާބީ ޓެލް އަވިވް އާއި، ބަޔާން މިއުނިކްގެ ތޯމަސް މުލާ އާއި، އެ ޓީމުގެ ރޮބާޓް ލެވަންޑޯސްކީ އަދި ބާސެލޯނާގެ ލުއިސް ސުއަރޭޒަށް ކާމިޔާބުކުރެވިފައި ވަނީ އަށް ލަނޑެވެ. އޭގެ ތެރެއިން މިހާރު ދެން ރަން ބޫޓަން އެންމެ ކައިރިން ވާދަކުރެވޭނީ ބަޔާންގެ މުލާ އާއި ލެވަންޑޯސްކީ އެވެ.
ޗެމްޕިއަންސް ލީގުގެ ސެމީގެ ދެވަނަ ލެގުގައި ރެއާލާއި ސިޓީ ބައްދަލުކުރާ މެޗު ކުޅުމަށް ހަމަޖެހިފައިވަނީ އަންނަ މަހުގެ ހަތަރު ވަނަ ދުވަހު އެވެ. އެ މެޗު ކުޅޭނީ ރެއާލްގެ ސެންޓިއާގޯ ބެރްނެބުއޭގަ އެވެ.