27 Apr 2016, 09:51
ވޮޝިންޓަން (އޭޕްރިލް 27): އެމެރިކާގެ ފަސް ސްޓޭޓެއްގައި އިއްޔެ ބޭއްވި ޕްރައިމަރީތަކުން ބިލިއަނަރު، ޑޮނަލްޑް ޓްރަމްޕް، ފަސް ސްޓޭޓަކުން ކުރި ހޯއްދެވި އިރު ހަތަރު ސްޓޭޓަކުން ޑިމޮކްރަޓިކް ޕާޓީގެ ކެނޑިޑޭޓް ހިލަރީ ކްލިންޓަން ކުރި ހޯއްދަވައިފި އެވެ.
ކަނެކްޓިކަޓާއި ޑެލްވެއާ އާއި މެރީލޭންޑާއި ޕެނިސެލްވީނިއާ އާއި ރޯޑް އައިލެންޑުގެ ޕްރައިމަރީތައް ކާމިޔާބު ކުރެއްވުމަށް ފަހު ޓްރަމްޕް ވަނީ އޭނާ އަކީ ރިޕަބްލިކަން ޕާޓީގެ ކެނޑިޑޭޓަކަށް ހޮވޭނެ ކަމަށް "އެންމެ ބޮޑަށް ލަފާ ކުރެވޭ" ކެނޑިޑޭޓުކަމަށް ވިދާޅުވެފަ އެވެ. އަދި ވެރިކަމަށް ހޮވުމުން އޭނާގެ ސިޔާސަތުތަަކަށް ބަދަލު ނުގެންނަވާނެ ކަމަށް ވިދާޅުވި އެވެ.
"އަޅުގަނޑު ބަދަލެއް ނުވާނެ. ތިއެންމެންނަށް އިނގޭނެ އަޅުގަނޑު ދިޔައީ އެންމެ ރަނގަޅު ސްކޫލުތަކަށް ކަން. އަޅުގަނޑަކީ ވަރަށް ވިސްނުންތޫނު މީހެއް. އަަޅުގަނޑުމެންގެ ގައުމު އަޅުގަނޑު ރަމްޒުކޮށްދޭނީ ގަދަރުވެރިކަމާ އެކު، ވަރަށް ރަނގަޅަށް،" ޓްރަމްޕް ވިދާޅުވި އެވެ.
ޑިމޮކްރަޓިކް ޕާޓީން ވެސް ވަނީ އެ ފަސް ސްޓޭޓުގައި ޕްރައިމަރީތައް ބާއްވައިފަ އެވެ. އޭގެ ތެރެއިން ރޯޑް އައިލެންޑްގެ ޕްރައިމަރީ ފިޔަވާ ބާކީ ސްޓޭޓުތައް ކާމިޔާބު ކުރެއްވީ އެމެރިކާގެ ކުރީގެ ސެކްރެޓަރީ އޮފް ސްޓޭޓް، ހިލަރީ ކްލިންޓަން އެވެ. ރޯޑް އައިލެންޑުގެ ޕްރައިމަރީން ކުރި ހޯއްދެވީ ވާމަންޓުގެ ސެނެޓަރު، ބާނީ ސޭންޑާސް އެވެ.
ހިލަރީ އާއި ޓްރަމްޕަށް ލިބިވަޑައިގަތް ބޮޑު ކާމިޔާބީއާ އެކު ދެބޭފުޅުންނަަށް ތާއިދު ކުރައްވާ ޑެލިގޭޓުންގެ އަދަދު މިހާރު ވަނީ ވަރަށް ބޮޑުތަން އިތުރުވެފަ އެވެ. ހިލަރީ އަށް މިހާރު ތާއިދު ކުރާ ޑެލިގޭޓުންގެ އަދަދަކީ 2،141 އެވެ. ޑިމޮކްރަޓިކް ޕާޓީގެ ރިޔާސީ ކެނޑިޑޭޓަކަށް ވުމަށް ބޭނުންވަނީި 2،383 ޑެލިގޭޓުންނެވެ.
ޓްރަމްޕަށް ތާއިދު ކުރާ ކެނޑިޑޭޓުންގެ އަދަދު ވަނީ 950 އަށް އަރާފަ އެވެ. ރިޕަބްލިކަން ޕާޓީގެ ރިޔާސީ ކެނޑިޑޭޓަކަށް ވުމަށް 1،237 ޑެލިގޭޓުން ބޭނުންވެ އެވެ.
ރިޕަބްލިކަން ޕާޓީގައި ޓްރަމްޕާ ވާދަ ކުރައްވަމުން ގެންދަވާ ޓެޑް ކްރޫޒާއި ޖޯން ކޭސިކް ވަނީ ދެބޭފުޅުން އެއްބައިވެގެން ޓްރަމްޕާ ދެކޮޅަށް މަސައްކަތް ކުރެއްވުމަށް ނިންމާފަ އެވެ. އެގޮތުން ދެބޭފުޅުން ވަނީ ކުރިއަށް އޮތް ނިއު މެކްސިކޯގެ ޕްރައިމަރީއަށް ބޮޑަށް ކެމްޕެއިން ކުރައްވާނީ ކްރޫޒް ކަމަށް ނިންމަވާފަ އެވެ. އަދި އިންޑިއާނާ އާއި އޮރެގަންގެ ޕްރައިމަރީތަކަށް ބޮޑަށް ކެމްޕެއިން ކުރައްވާނީ ކޭސިކް ކަމަށް ނިންމަވާފަ އެވެ. (ބީބީސީ)