26 Apr 2016, 15:32
އިންޑިއާ އަސްކަރީ މަނަވަރު "އައިއެންއެސް ބިއާސް" އިއްޔެ ރާއްޖެ އަތުވެއްޖެ އެވެ.
އައިއެންއެސް ބިއާސްގެ އެ ދަތުރުގައި، ދިވެހި ރާއްޖޭގެ އިގްތިސާދީ ކަނޑުުގެ ސަރަޙައްދުގައި އެމްއެންޑީއެފް ކޯސްޓްގާޑާ ގުޅިގެން މިއަދު ސަވައިލަންސް ޕެޓްރޯލެއް ފަށާފައިވާ ކަމަށް އެމްއެންޑީއެފުން މިއަދު ބުންޏެވެ.
އެމްއެންޑީއެފް ކޯސްޓްގާޑާއި އިންޑިއަން ނޭވީ ގުޅިގެން ކުރިއަށްގެންދާ ޖޮއިންޓް ސާވިސް ޕެޓްރޯލަކީ، ދިވެހި ރާއްޖޭގެ ކަނޑައެޅޭ ވަކި ސަރަޙައްދެއްގައި ސިލްސިލާކޮށް ހިންގަމުންދާ ޕެޓްރޯލްތަކުގެ ތެރެއިން ހިންގޭ ޕެޓްރޯލެއް ކަމަށް އެމްއެންޑީއެފުން ބުންޏެވެ.
އެ ސަވައިލަންސް ޕެޓްރޯލްގައި ރާއްޖޭގެ ޚާއްޞަ އިޤްތިސާދީ ސަރަޙައްދުގައި ގާނޫނާއި ގަވާޢިދާ ޚިލާފަށް ކަނޑުމަތީގެ އެއްވެސް ކަމެއް ހިނގާތޯ ބެލުމަށް ވަނީ ހަމަޖެހިފައިވާ ކަމަށް އެމްއެންޑީއެފުން ބުންޏެވެ.
އައިއެންއެސް ބިއާސް ރާއްޖެކުރި ދަތުރު ނިންމާލުމަށް ފަހު ފުރުމަށް ހަމަޖެހިފައި ވަނީ މި މަހުގެ 29 ވަނަ ދުވަހު އެވެ.