25 Apr 2016, 10:30
އެކަލޭގެފާނުގެ ބޮޑުދައިތާފުޅުأمّ حكيم بيضاء بنت عبد المطّلبގެ ދަރިކަނބަލުންأروى بنت كريزގެ ދަރިކަނބަލުންالسّيّدة أمّ كلثوم بنت عقبة رضى اللّـه عنــهاއާزيد بن حارثة رضى اللّـه عنــهއާ ކާވެނިކޮށްދެއްވިއެވެ. އެކަމަނާއަކީ
أميرالمؤمنين عثمان ذوالنّورينرضى اللّـه عنــهގެ އެއްބަނޑު އުޚުތެކެވެ. އެކަމަނާزيد بن حارثةއަށް ދެބޭފުޅުން ރައްކާވިއެވެ.زيد بن زيدއާއިرقيّة بنت زيدއެވެ.
އަނެއްކޮޅުން މިކާވެނިފުޅާ ގުޅިގެން ޚުދުالسّيّدة زينبއާއި އެކަމަނާގެ ޢާއިލާގެ ބޭފުޅުންގެ ހިތްޕުޅުގައި އުފެދުނު ޝަކުވާތައް ޙައްލުކުރެއްވޭނެ ހަމައެކަނި ގޮތަކަށްއޮތީ، ޚުދު ކައުސާހިބާصلّى اللّـه عليه وسلّم،السّيّدة زينبއާ ކާވެނިބައްލަވައިގެންނެވުމެވެ.
ކުރިންވެސް ދެންނެވި ފަދައިންالسّيّدة زينب رضى اللّـه عنــهاއާއި އެކަމަނާގެ ޢާއިލާގެ ބޭފުޅުން ކުރީއްސުރެ ދެކެވަޑައިގަންނަވަމުން ވަޑައިގެންނެވި ހުވަފެންފުޅަކީ، ޚުދު ކައުސާހިބާصلّى اللّـه عليه وسلّم،السّيّدة زينبއާ ކާވެނިބައްލަވައިގެންނެވުމެވެ. މި މައްސަލައިގައި އިސްލާމީ ޝަރީޢަތުގައި ކަންއޮތްގޮތް ނުހަނު ސާފެވެ. ޝަރީޢަތުގައި މިކަމުގެ އެއްވެސް ހުރަހެއްނެތެވެ. ނަމަވެސް، ކުރީގެ ޖާހިލީ އާދަކާދައާއި ޤަބޫލުކުރުންތަކުގެ ސަބަބުން އުފެދިގެން އަންނާނެކަން ޔަޤީންވާ ޕްރޮޕެގެންޑާގެ ޠޫފާނެއްގެ އެކަށޭނަކަން ވަރަށްބޮޑަށް އޮތެވެ.
زينب- أمّ المؤمنين
ކައުސާހިބާصلّى اللّـه عليه وسلّمއެކަލޭގެފާނުގެ ދެބީނުންގެ ދެދަރި ކޮއްކޯފުޅުالسّيّدة زينب بنت جحش رضى اللّـه عنــهاމެދުވެރިކުރައްވައި ޤާއިމުކުރައްވަން މަސައްކަތްޕުޅު ކުރެއްވި އިސްލާމީ މުސާވަތާއި ހަމަހަމަކަމުގެ ރީތި މިސާލު އެންމެ އެދެވޭގޮތުގައި ޤާއިމުކުރެއްވޭގޮތް ނުވުމުން، އިތުރު ސާހިބާصلّى اللّـه عليه وسلّمދެންވެސް ޤަޞްދުކުރެއްވީ އެކަމަނާ މެދުވެރިކުރައްވައި ނުހަނު މަތިވެރި އިސްލާމީ މަޤްޞަދެއް ޙާޞިލު ކުރެއްވުމަށެވެ. އެކަމަކީ މުތަބަންނީކުރުމާގުޅޭ ޖާހިލީ އާދަކާދަ އުވާލެއްވުމަށްޓަކައިزينب رضى اللّـه عنــهاޚާއްޞަކުރެއްވުމެވެ. މުތަބަންނީ ކުރުމަކީ ޢަޤީދީގޮތުންނާއި އިޖްތިމާޢީގޮތުން ނުހަނު ގެއްލުންހުރި ކަމެކެވެ.أمّهات المؤمنينގެ ޙަޔާތްޕުޅުގެ މައްޗަށް އަޅުގަނޑު ލިޔަމުންމިގެންދާ ސިލްސިލާގެ މުޤައްދިމާއެއްގެ ގޮތުން އަޅުގަނޑު ލިޔުނު ފޮތެއްކަމުގައިވާ "ކައުސާހިބާصلّى اللّـه عليه وسلّمގެ ކާވެނިފުޅުތަކާމެދު ކުރެވޭ އިޢުތިރާޟުގެ ޖަވާބުގައި" މިފޮތުގައިވާނީ އެކަމުގެ މައްޗަށް އަލިއަޅުވައިފައެވެ. ނަމަވެސް މި މަޒުމޫނުގައިވެސް ޚުލާޞާ ގޮތެއްގައި އެކަމާބެހޭގޮތުން ބައެއް މަޢުލޫމާތު ހުށަހަޅައިލާނަމެވެ. މަޒުމޫނު ވިދާޅުވާ ބޭފުޅުން "މަގުކުރުކޮށްލެއްވުމަށްޓަކައެވެ."
ޢަރަބި ޤަބީލާތަކުގެ މެދުގައި އާދަވެފައި އޮތްގޮތުގައި މުތަބަންނީކޮށް ދަރިޔަކަށް ހަދައިފައިވާ މީހެއްގެ ހުވަފަތް އަންހެނުން ނުވަތަ އޭނާ އިނދެވަރިކުރި މީހަކާ މުތަބަންނީކުރި ބައްޕަ ކާވެނިކުރުމަކީ ހުތުރު ކަމެކެވެ. އައިބު ކަމެކެވެ. އާދެ، ޖާހިލީ އާދަކާދައިގައި ޙަރާމް ކަމެކެވެ. އުފަން ދަރިޔެއްގެ ހުވަފަތް އަނތްބަކާ ނުވަތަ އޭނާ އިނދެވަރިކުރި މީހަކާ ބައްޕަޔަކު ކާވެނިކުރުންފަދަ ކަމެކެވެ. ނަމަވެސް ކާއިނާގެ ވެރިރަސްކަލާނގެ އިރާދަފުޅުގައިވަނީ ޖާހިލިއްޔަތުގެ މުތަބަންނީކުރުން ނިމުމަކަށް ގެންނެވުމަށެވެ. އެކަމާގުޅޭ އެހެނިހެން އާދަކާދަތައްވެސް މުލުން ލުއްސަވައި ނައްތައިލެއްވުމަށެވެ. އެހެންކަމުން އެއްދުވަހަކުجبريل الأمينވަނީالسّيّدة زينب بنت جحش رضى اللّـه عنــهاއިތުރު ސާހިބާގެ އަނބިކަނބަލަކަށް ވެވަޑައިގަންނަވާނެކަމުގެ ޚަބަރު ދެއްވައިފައެވެ. ކުރީންވެސް ދެންނެވިފަދައިން ކައުސާހިބާصلّى اللّـه عليه وسلّمވެސް ހުންނެވީ މުތަބަންނީކުރުމުގެ ހަލާކުން މުޖްތަމަޢު ސަލާމަތްކުރައްވަން ޢަޒުމު ކަނޑައަޅުއްވައިގެންނެވެ. ނަމަވެސް އިތުރު ސާހިބާصلّى اللّـه عليه وسلّمހުންނެވީ އެކަން އެކަލޭގެފާނުގެ ހިތްޕުޅުގައި ވަންހަނާ ކުރައްވައިގެންނެވެ. އިސްލާމްދީނުގެ ދުޝްމަނުން ފަތުރާނެ ވާހަކަތަކާއި އުފައްދާނެ ޠޫފާނުގެ ބޮޑުކަން އެނގިވަޑައިގަންނަވާތީއެވެ.
ނަމަވެސް އަރަހުށި މާތްاللّـه سبحانه وتعالىގެ ޙުކުމްފުޅަށް އެކަލާނގެ ނަބިއްޔާ ސާބިތުކަމާއެކު އެފިޔަވަޅު ނާޅުއްވައިފިނަމަ، ދެން އެކަމާ ކުރިމަތިލާން ކެރޭނީވެސް ކާކަށްތޯއެވެ. ޖާހިލިއްޔަތުގެ އެ ފަސާދަ އިޞްލާޙު ކުރާނީވެސް ކާކުތޯއެވެ؟ އިތުރު ސާހިބާصلّى اللّـه عليه وسلّمގެ ބިޢުޘަތުގެ އެއްމަޤްޞަދަކީ ހުރިހާ ވައްތަރެއްގެ ޖާހިލީ އާދަކާދަތަކާއި، ޢަޤީދާތަކާއި، ޚިޔާލުތައް މުލުން ލުއްސައިލައްވައި ނައްތައިލެއްވުމެވެ. ފަސާދައިގެ އަސްލަކަށްވަމުންދާ ކޮންމެކަމެއް މުޖްތަމަޢުން ފޮހެލެއްވުމެވެ. މުޖްތަމަޢުގައި އިޞްލާޙާއި ހެޔޮކަމުގެ އަލިކަން ފަތުރުއްވައި ޢާއްމުކުރެއްވުމެވެ.
މުޖްތަމަޢެއްގައި ކަމެއް އާދަވެ އެ ޖަމާޢަތެއްގެ ތެރޭގައި އެކަމެއް މޫލައިފިނަމަ މީހުންގެ ހިތްތަކުގައި އެކަމަކާމެދު ލޯބިޖެހެއެވެ. އެކަމެއް ދޫކޮށްލުމަކީ ޖަމާޢަތަށް ކުރެވޭ އިހާނެތިކަމެއްކަމުގައި ދެކޭންފަށައެވެ. ކިތަންމެ ތާކުންތާކުނުޖެހޭ ކަމެއްކަމުގައިވިޔަސް ވެހެވެ. ކިތަންމެ ވިޔާނުދާ އާދައެއްކަމުގައިވިޔަސް ވެހެވެ. ޢާއްމުން އެފަދަ ކަންތައް ހުއްޓުވުމާ ދެކޮޅުހަދަނީ ކާބަފައިންގެ ގޮތުގައި ހިފެހެއްޓުމުގެ މަޤްޞަދުގައެވެ. ޚާއްޞުން އެކަންކަމާ އިދިކޮޅުހަދަނީ ޖަމާޢަތުގެ ނިޒާމުތަކަށް ބުރޫއަރައިފާނެކަމަށް ހީކޮށެވެ. ފިކުރީ ބައިބައިވުމެއްގެ ތެރެއަށް ޤައުމު އޮޔާލެވިދާނެކަމަށް ފެންނާތީއެވެ. ޤާނޫނު މުގުރުމަކީ މުޖްތަމަޢުގެ ޢާއްމު އާދަޔަކަށް ވެދާނެތީއެވެ. "މުށެއްހައިތަން ދޫކޮށްލިޔަސް ކެނބެއްހައިތަން ދަމައިގަންނާނެ" ތީއެވެ. އެހެންކަމުން މީހަކު އެފަދަ ކަމެއް އިޞްލާޙުކުރާން އުޅެފިނަމަ މުޅި ޖަމާޢަތް އެމީހަކާ ދެކޮޅަށް ތެދުވެއެވެ. އެންމެން އެކަމާ ދެކޮޅަށް ހޯބޯލަވަން ފަށައެވެ.
ކުރީންވެސް ދެންނެވިފަދައިން ޢަރަބީންގެ ތެރެއަށް މޫލައިފައިހުރި ޖާހިލީ އާދަކާދަތަކުގެ ތެރޭގައި ހިމެނޭ އެއްކަމަކީ، މީހަކު އަނެކެއްގެ ދަރިޔަކު މުތަބަންނީ ކޮށްފިނަމަ އެ މުތަބަންނީއަކަށް ޙަޤީޤީ އުފަން ދަރީންނަށް ލިބޭ ހުރިހާ ޙައްޤުތަކަކާއި ޤާނޫނީ ބާރުތަކެއް ލިބުމެވެ. މުތަބަންނީކުރާ މީހާ މަރުވެއްޖެނަމަ، އޭނާގެ ވާރިޘަކަށްވަނީ މުތަބަންނީކުރެވުނު މީހާއެވެ. މުތަބަންނީކުރެވުނު މީހާގެ އަންހެނުންނަށް ޙަޤީޤީ ޅީދަރިއެއްގެ ޙައިޘިއްޔަތު ލިބެއެވެ. އެކަމުގެ ސަބަބުން އެތަކެއް ފިތުނަތަކަކާއި ފަސާދަތަކެއް އައީ އުފެދެމުންނެވެ. ނަސަބު އޮޅެމުންނެވެ. ވާރިޘުންގެ ޙައްޤުތައް ގެއްލެމުންނެވެ. ޢަރަބީންގެ ވިސްނުންތެރިން އެކަން ޤަބޫލުކުރެއެވެ. ނަމަވެސް އެކަކަށްވެސް އެކަމާ ދެކޮޅަށް ތެދުވާކަށެއް ނުކެރެއެވެ.
ޤަދީމީ ޒަމާނުގެ އާދަކާދަޔާ އެއްގޮތްވާގޮތުން ނަބީބޭކަލުންގެ ފަޚުރެއްކަމުގައިވާ ސާހިބާصلّى اللّـه عليه وسلّمވެސް ވަނީزيد بن حارثة رضى اللّـه عنــهމުތަބަންނީ ކުރައްވައިފައެވެ. އެގޮތުންزيدވަނީ ކައުސާހިބާގެ ވާރިޘަކަށް ވެވަޑައިގެންފައެވެ. އެހެންކަމުން ކައުސާހިބާصلّى اللّـه عليه وسلّمزيدއިނދެވަރިކުރެއްވި މީހަކާ ކާވެނި ބައްލަވައިގެންނެވުމަކީ ޢަރަބީންގެ ޖާހިލީ އާދަކާދައިގައި ޙަރާމްކަމެކެވެ. ކައުސާހިބާصلّى اللّـه عليه وسلّمހުންނެވީ ޢާއްމުން (ޚާއްޞަކޮށް މުނާފިޤުން) ކޮށްފާނެ އިޢުތިރާޟުތަކަށްޓަކައިالسّيّدة زينب رضى اللّـه عنــهاއާ ކާވެނިބައްލަވައިގެންނެވުން ކުޑަކޮށް މަޑުޖައްސައިލައްވައިގެންނެވެ. އެހެންކަމުން، ކީރިތި ޤުރްއާނުގެ އަންނަނިވި އާޔަތް ބާވައިލެއްވިއެވެ.
"އަދިاللّـهފާޅުކުރައްވާނޭ ކަންތައް، ކަލޭގެފާނުގެ ހިތްޕުޅުގައި ވަންހަނާކުރައްވަމުއެވެ. އަދި މީސްތަކުންދެކެ ކަލޭގެފާނު ބިރުފުޅުގަނެތެވެ. އަދި ކަލޭގެފާނު ބިރުފުޅުގަތުން ޙައްޤުކަންބޮޑީاللّـهދެކެއެވެ."(سورة الأحزاب: 37)
ހަމަ އެފަދައިން މުތަބަންނީކުރުމަކީ އެއްވެސް އަސްލެއްނެތް ބިލާހެއްކަންވެސް، ކީރިތި ޤުރްއާނުގެ ޒަރީޢާއިން ބަޔާންކުރެއްވިއެވެ. ވަޙީކުރައްވައިފައިވަނީ:
"އެއްވެސް މީހަކަށް، އެމީހެއްގެ އެތެރެހަށީގައި،اللّـهދެހިތެއް ނުލައްވައެވެ. އަދި ތިޔަބައިމީހުންގެ އަނބީންގެ ތެރެއިން ތިޔަބައިމީހުން ޡިހާރުކުރާ (އެބަހީ: މަޔަކާ ހަމަކުރާ) އަނބީންނަކީ، ތިޔަބައިމީހުންގެ މައިންކަމުގައިވެސް ނުލައްވަތެވެ. އަދި ތިޔަބައިމީހުންގެ ދަރީންކަމުގައި ހަދައިގެންއުޅޭ ދަރީންނަކީ، ތިޔަބައިމީހުންގެ ދަރީންކަމުގައިވެސް ނުލައްވަތެވެ. އެއީ ތިޔަބައިމީހުންގެ އަނގަތަކުން ބުނާ ބުނުމެކެވެ. އަދިاللّـهޙައްޤު ބަސްފުޅު ވަޙީކުރައްވަތެވެ. އަދި އެކަލާނގެ ތެދުމަގަށް މަގުދައްކަވަތެވެ."(سورة الأحزاب: 4)
މިފަދައިންނެވެ. އަދި މިއަށްވުރެވެސް މާ ޞަރީޙުކޮށް ވަޙީކުރައްވައިފައިވެއެވެ.
"ތިޔަބައިމީހުންގެ ބޮޑެތި ފިރިހެނުންގެ ތެރެއިން އެކެއްގެވެސް ބަފައިކަލަކު ކަމުގައި
محمّدގެފާނު ނުވެއެވެ. އަދި ކީއްހެއްޔެވެ! (އެކަލޭގެފާނީ)اللّـهގެ ރަސޫލާއެވެ. އަދި ނަބީކަން ޚަތިމުކުރެއްވި ކަލޭގެފާނުވެސްމެއެވެ. އަދި ކޮންމެކަމެއް މޮޅަށް ދެނެވޮޑިގެންވާ ކަލަކު ކަމުގައިاللّـهވޮޑިގެންވެއެވެ."(سورة الأحزاب:40)
ހަމައެފަދައިންزيد بن حارثة رضى اللّـه عنــهއަށްزيد بن محمّدގެ ނަންފުޅުން މުޚާޠަބުކުރުންވެސް މަނާކުރެއްވިއެވެ. ވަޙީކުރައްވައިފައިވަނީ:
"އެ ދަރީން އެއުރެންގެ ބަފައިންނަށް ނިސްބަތްކުރާށެވެ! އެގޮތްاللّـهގެ ޙަޟުރަތުގައި ޢަދުލުވެރިކަން ބޮޑެވެ. އެދަރީންގެ ބަފައިން ތިޔަބައިމީހުންނަށް ނޭނގޭނަމަ، ފަހެ، އެއީ ދީނުގެ ފަރާތުން ތިޔަބައިމީހުންގެ އަޚުންނެވެ. އަދި ތިޔަބައިމީހުންގެ އެހީތެރީންނެވެ. އަދި ތިޔަބައިމީހުންނަށް ނޭނގިގެން (ކުށުން) ކުރެވުނުކަމެއްގެ ފާފައެއް ތިޔަބައިމީހުންގެ މައްޗަކަށް ނެތެވެ. އެހެނެއްކަމަކު، ފާފަވެރިކަން އޮންނާނީ، ތިޔަބައިމީހުންގެ ހިތްތައް ޤަޞްދުކުޅަ ކަމަކާ މެދުގައެވެ."(سورة الأحزاب:5)
މިފަދައިންނެވެ.
ކީރިތި ޤުރްއާނުގެ މި ޞަރީޙު ބާރުއެޅުއްވުމާއި، މުތަބަންނީކުރުމުގެ އަސްލެއްނެތްކަން ބަޔާންކުރެއްވުމާ ވިދިގެން، ކައުސާހިބާصلّى اللّـه عليه وسلّم،السّيّدة زينب بنت جحشގެ ކާވެނިފުޅުގެ ކަންތައް ކުރިޔަށް ގެންދެވިއެވެ.
(ނުނިމޭ)