ގެއްލުންތަކަށް ރެޑް ކްރެސެންޓުގެ އެހީތެރިކަން އަބަދުވެސް ލިބޭ: އިރްތިޝާމް

22 Apr 2016, 18:26

ކާރިސާތަކުގައި ރައްޔިތުންނަށް ލިބޭ ކުދި ބޮޑު އެންމެހާ ގެއްލުންތަކަކަށް ދިވެހި ރެޑް ކްރެސެންޓުގެ ފުރިހަމަ އެހީތެރިކަން އަބަދުވެސް ލިބެމުން އަންނަ ކަމަށް ހެލްތު މިނިސްޓަރު އިރުތިޝާމް އާދަމް މިއަދު ވިދާޅުވެއްޖެ އެވެ.

ނޭޝަނަލް އާޓް ގެލަރީގައި މިއަދު ހަވީރު އޮތް ދިވެހި ރެޑް ކްރެސެންޓުގެ އަހަރީ އާއްމު ޖަލްސާ ޝަރަފުވެރިކޮށްދެއްވައި ވާހަކަފުޅުދައްކަވަމުން އިރުތިޝާމް ވިދާޅުވީ ރައްޔިތުންގެ ފުރާނައަށް ގެއްލުންވާ ކޮންމެ ފަހަރެއްގައި ވެސް ރެޑް ކްރެސެންޓުގެ އެހީތެރިކަން ލިބެމުން އަންނަ ކަމަށެވެ. އަދި ވިދާޅުވީ ދިވެހި ރެޑް ކްރެސެންޓުގެ ހިދުމަތް މިއަދު ދިވެހި ކޮންމެ ރައްޔިތަކު ވެސް ފުރިހަމަ އަށް ބަލައިގަންނަ ކަމަށެވެ.

ދިވެހި ރެޑް ކްރެސެންޓުގެ އަހަރީ އާއްމު ޖަލްސާގެ ތެރެއިން: ސަން ފޮޓޯ/ ފަޔާޒު މޫސާ

އިރުތިޝާމް ވިދާޅުވީ ދުނިޔެއަށް އަންނަ ތަފާތު ބަދަލުތަކާއެކު ކުއްލި ނުރައްކަލުގެ އެކި ހާލަތްތައް ވެސް ދުނިޔޭގައި އިތުރުވަމުން އަންނަ ކަމަށެވެ. އެގޮތުން ދުނިޔޭގައި ކުއްލި ހާލަތު އެންމެ ގިނައިން އަންނަމުން ދަނީ ސިއްހީ ދާއިރާގައިކަން ފާހަގަކުރައްވަމުން މިނިސްޓަރު ވިދާޅުވީ އެފަދަ ހާލަތްތަކުގައި ވެސް ރައްޔިތުންނަށް އެހީތެރިކަން ފޯރުކޮށްދިނުމަށް ރެޑް ކްރެސެންޓުފަދަ ޖަމިއްޔާތަކުގެ އެހީތެރިކަން ސަރުކާރުތަކަށް ބޭނުންވާ ކަމަށެވެ.

ދިވެހި ރެޑް ކްރެސެންޓުގެ އަހަރީ އާއްމު ޖަލްސާގެ ތެރެއިން: ސަން ފޮޓޯ/ ފަޔާޒު މޫސާ

"މިސާލަކަށް ކުއްލިއަކަށް ޒިކާ ވައިރަހަށް އަޅުގަނޑުމެން ރެސްޕޮންސިވް ވާންވެގެން ދަންނަވާލާއިރު ހަމަ މިފަދަ އެމްއާރްސީ ފަދަ އެހެނިހެން އެންޖީއޯސްތައް އަޅުގަނޑުމެންނާ ބައިވެރިވެވަޑައިގެން އަޅުގަނޑުމެންނާއެކު މަސައްކަތް ކުރެއްވުމަކީ މުހިއްމު ކަމެއް. އަޅުގަނޑަށް ހީވަނީ ދައުރެއް އެބައޮތްހެން ދިވެހި ރެޑް ކްރްސެންޓުގެ ފަރާތުން މިފަދަ ހިދުމަތްތަކެއް ދެއްވަން،" އިރްތިޝާމް ވިދާޅުވި އެވެ.

މިއަދުގެ ޖަލްސާގައި މިނިސްޓަރު އިރްތިޝާމް ވަނީ ދިވެހި ރެޑް ކްރެސެންޓުގެ އާ ވެބްސައިޓުވެސް އިފްތިތާހު ކޮށްދެއްވާފަ އެވެ.

ދިވެހި ރެޑް ކްރެސެންޓުގެ އަހަރީ އާއްމު ޖަލްސާ މިއަދުން ފެށިގެން މާދަމާގެ ނިޔަލަށް ކުރިއަށްދާނެ އެވެ. އެ ޖަލްސާގައި ރާއްޖޭގެ ރަށްތަކުގައި ހުރި ދިވެހި ރެޑް ކްރެސެންޓުގެ އެކި ގޮފިތަކުން ވެސް ވަނީ ބައިވެރިވެފަ އެވެ.