20 Apr 2016, 15:03
ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް ކަމަށްވާ ކްލަބު މޯލްޑިވްސް ކަޕްގެ އަންހެން ބައި، 18/30 ވިމެންސް ފުޓްސަލް ފިއެސްޓާގެ ފައިނަލަށް ކްލަބު އިމިގްރޭޝަނާއި ޓީމް ފެނަކަ ދަތުރުކޮށްފި އެވެ.
ވިމެންސް ފުޓްސަލް ފިއެސްޓާގެ ފައިނަލަށް ކްލަބު އިމިގްރޭޝަނާއި ޓީމް ފެނަކަ ދަތުރުކުރީ ރޭ ކުޅުނު ސެމީ ފައިނަލު މެޗުތަކުން މޮޅުވެގެންނެވެ.
ފައިނަލުގެ ޖާގައެއް އިމިގްރޭޝަނުން ހޯދީ ސެމީ ފައިނަލުގެ ފުރަތަމަ މެޗުގައި ރޭ ޕޮލިސް ކްލަބުގެ މައްޗަށް 8-1 ލަނޑުން ކުރި ހޯދައިގެންނެވެ. އެ މެޗުގައި އިމިގްރޭޝަނުގެ ބިދޭސީ ކުޅުންތެރިޔާ ސިރްމަނީ އޮރަތައި ފަސް ލަނޑު ކާމިޔާބުކުރިއިރު، އެޓީމުގެ ބިދޭސީ ކުޅުންތެރިޔާ ރާނީ މުލްޔާ ސަރީ ތިން ލަނޑު ކާމިޔާބުކުރި އެވެ. ޕޮލިސް ކްލަބުގެ ހަމައެކަނި ލަނޑު ކާމިޔާބުކޮށްދިނީ ފާތިމަތު ޒާހިރާ އެވެ.
އެ މުބާރާތުގެ ފައިނަލުގެ ޖާގައެއް ފެނަކައިން ހޯދީ ސެމީގެ ދެވަނަ މެޗުގައި 3-1 ލަނޑުން އެމްއޭސީއެލްގެ މައްޗަށް ކުރި ހޯދައިގެންނެވެ. ފެނަކައިން ކާމިޔާބުކުރި ތިން ލަނޑުގެ ތެރެއިން ދެ ލަނޑު ބިދޭސީ ކުޅުންތެރިޔާ ޖިރަޕްރަޕާ ޓުޕްސޫރީ ޖެހިއިރު، އަނެއް ލަނޑު ކާމިޔާބުކޮށްދިނީ ޝަހުލާ ތައުފީގު އެވެ. މެޗުގައި އެމްއޭސީއެލްއިން ޖެހި ހަމައެކަނި ލަނޑު ކާމިޔާބުކޮށްދިނީ ފާތިމަތު ހަސްމާ އެވެ.
ފައިނަލްގައި ކްލަބު އިމިގްރޭޝަނާއި ޓީމު ފެނަކަ ބައްދަލުކުރުމަށް ހަމަޖެހިފައިވަނީ އަންނަ އާދީއްތަ ދުވަހުގެރޭ އެވެ. ޓްރެފިކް ޕޮލިސް ކުރިމަތީ އޮންނަ މާފަންނު ސްޓޭޑިއަމް ވެލިދަނޑުގައި ކުޅޭ އެ މެޗު ފެށޭނީ އެ ދުވަހުގެ ރޭ 9:00 ގައެވެ.