19 Apr 2016, 10:02
ޑުއާލާ (އޭޕްރިލް 19):ބޯކޯ ހަރާމުން ހިންގަމުންދާ ޖަރީމާތަކުގެ ސަބަބުން ހާލުގައި ޖެހިފައިވާ ކެމެރޫންގެ ރައްޔިތުންނާ ބައްދަލު ކުރެއްވުމުގެ ގޮތުން އެމެރިކާއިން ޔޫއެންއަށް ހަމަޖައްސާފައި ހުންނަ ސަފީރު، ސަމަންތާ ޕަވާ އެގައުމަށް ކުރެއްވި ދަތުރުފުޅެއްގައި އެކަމަނާގެ މޮޓޯކޭޑުގެ އުޅަނދެއްގައި ޖެހި ކުޑަކުއްޖަކު މަރުވެއްޖެ އެވެ.
އެހާދިސާ ހިނގީ ބޯކޯ ހަރާމްގެ އަމަލުތަކުގެ ސަބަބުން ގެދޮރު ނެތިފައިވާ ރައްޔިތުންނާއި ރެފިއުޖީންނާ ބައްދަލު ކުރައްވަން ޕަވާ އާއި އޭނާގެ އެހީތެރިންނާއި ނޫސްވެރިން، ކެމެރޫންގެ އުތުރުގައި އޮންނަ މޮކޮލޯ ޝަހަރަށް ކުރެއްވި ދަތުރުފުޅުގަ އެވެ.
ޕަވާއަށް މަރުހަބާ ކިޔާން ކެމެރޫންގެ ރައްޔިތުން މަގުގެ ދެފަރާތުގައި ތިބޭ އިރު ޕަވާގެ މޮޓޯކޭޑު ދުއްވާފައި ދަނީ ވަރަށް ބާރު ސްޕީޑުގަ އެވެ. ހަތް އަހަރުގެ ފިރިހެން ކުއްޖާ މޮޓޯކޭޑުގެ ހަވަނަ ކާރުގައި ޖެހުނީ އެކުއްޖާ ކުއްލިއަކަށް މަގުމައްޗަށް ދުވެފައި ނިކުތުމުން ކަމަށް ރިޕޯޓުތަކުގައިވެ އެވެ. އެކްސިޑެންޓުވި ކާރު ދުއްވަން އިނީ ކެމެރޫންގެ ރައްޔިތެކެވެ.
އެކްސިޑެންޓު ވުމުން އެކާރު މަޑު ކުރި ނަމަވެސް، އެސަރަހައްދަކީ ސަލާމަތީ ކަންތައްތައް ވަރުގަދަކޮށްފައި ނުވާ ސަރަހައްދެއް ކަމުން އެމެރިކާގެ ސަލާމަތީ ފައުޖުތަކުން ވަނީ އެކާރު ސަރަހައްދުން ދުރަށް ފޮނުވާލާފަ އެވެ.
ޕަވާ ވަނީ ހާދިސާ ހިނގި ފަހުން ކުޑަކުއްޖާގެ މައިންބަފައިންނާ ބައްދަލު ކުރައްވައި ތައުޒިޔާ ވިދާޅުވެފަ އެވެ. އަދި އެއީ "ވަރަށް ހިތާމަވެރި" ހާދިސާއެއް ކަމަށް ވިދާޅުވެފަ އެވެ.
ކުޑަކުއްޖާގެ މަރުގެ ބަދަލު އެކުއްޖާގެ އާއިލާއަށް ދޭނެ ގޮތެއް އެމެރިކާގެ އޮފިޝަލުން އަދި ހާމަކޮށްފައެއް ނުވެ އެވެ. (އޭޕީ)