Last Updated: 10 year 7 month ago
މަޖީދީމަގުގައި ހުންނަ ކޯސްޓުލައިން ހާޑުވެއާ ފިހާރައިގައި އަލިފާން ރޯވެ އަނދަން ފަށައިފި އެވެ.
އަނދައި ހުލިވި އިމާރާތް ހުރީ އިންޝުއަރެންސްކޮށްފައި
ކޯސްޓްލައިންގެ ޑިރެކްޓަރު ހުސައިންފުޅު "ސަން"އަށް މިއަދު ވިދާޅުވީ ގިނަ އަދަދެއްގެ މުދަލާއެކު އަނދައި ހުލިވި އިމާރާތް ހުރީ އިންޝުއަރެންސްކޮށްފައި ކަމަށާއި އެތަން އަނދައި ހުލިވުމުން ލިބުނު ގެއްލުން ވެސް ބުނަން ނޭނގޭ ކަމަށެވެ.
ލިބުނު ގެއްލުމަށްވުރެ އަޅުގަނޑު ކަންބޮޑުވޭ އަވަށްޓެރިންނަށް ލިބިގެން ދިޔަ ގެއްލުމާ މެދު. އެބޭފުޅުންގެ ހާލު ބެލުމަށް ކަމާ ބެހޭފަރާތްތަކާ ގުޅިގެން އަޅުގަނޑުމެން މި ދަނީ މަސައްކަތް ކުރަމުން.
އަލިފާންގަނޑު ފެތުރިގެން އެނދި ގެ ވެސް ބޭނުން ނުކުރެވޭ ވަރަށް އަނދާފައިވާ ކަމަށް އެމްއެންޑީއެފްގެ އަލިފާން ނިއްވާ ސިފައިންގެ މީހަކު ބުނި.
ކޯސްޓުލައިން ހާޑުވެއާ ގައި މިއަދު ހިނގި އަލިފާނުގެ ހާދިސާއާ ގުޅިގެން ބޯހިޔާވަހިކަން ބޭނުންވާ ފަރާތްތަކަށް އިސްލާމީ ޔުނިވާސިޓީ އޮފް މޯލްޑިވްސް (އައިޔޫއެމް) ގައި އެކަންތައް ހަމަޖައްސައިދޭނެ ކަމަށާއި އެހީތެރިކަން ފޯރުކޮށްދިނުމުގައި އައިޔޫއެމް ގެ ދަރިވަރުންގެ ގުޅުމުން އެހީތެރިކަން ފޯރުކޮށްދޭނެ ކަމަށް އެ ޔުނިވާސިޓީން ބުނެފި.
އަލިފާން ނިއްވުމުގައި ހަރަކާތްތެރިވަނިކޮށް، އަނިޔާވެގެން ހޮސްޕިޓަލަށް ގެންދިޔަ ފުލުހެއްގެ އަތުގެ ކޮނޑުހުޅު ނެއްޓިފައިވާ ކަމަށް ފުލުހުން ބުނެފި.
އަލިފާން ކޮންޓްރޯލް ކުރެވިއްޖެ. އެމްއޭސީއެލްގެ އަލިފާން ނިއްވާ ލޮރީން ޖަހަމުންދަނީ ފޯމް. އެ ފޯމުން ފަސޭހަކަމާއެކު އަލިފާން ނިއްވޭނެ.
ދައުލަތުގެ މީޑިއާ، ޓީވީއެމުން ބުނީ އަލިފާން ރޯވި ސަރަހައްދަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ޒިޔާރަތް ކުރެއްވި ކަމަށް. އެ ސަރަހައްދަށް ޑިފެންސް މިނިސްޓަރު އާދަމް ޝަރީފު އުމަރ ުވެސް ވަޑައިގެންނެވި.
މޯލްޑިވްސް އެއާޕޯޓް ކޮމްޕެނީ (އެމްއޭސީއެލް)ގެ ފަަޔާ ލޮރީއެއް ބޭނުންކޮށްގެން ބާރު ސްޕީޑުގައި ފެން ޖަހައި އަލިފާން ނިއްވުމުގެ މަސައްކަތް ދަނީ ކުރަމުން.
އިމާރާތް އަނދައި ހުލިވެއްޖެ. އިމާރާތުގެ ތެރޭގެ އެކި ދިމަދިމާލުގައި އަލިފާނުގެ ރޯވެފައި އެބަހުރި. ދަގަނޑުން ހަނދާފައިވާ ތަނަކަށްވުމުން، ދަގަނޑު ހޮޅިތައް ހުރީ ހޫނުގަދަކަމުން "ދޮން"ވެފައި.
އެ ސަރަަހައްދުގައި ކުޅިބަލަން ނުތިބެ، ފުލުހުންނާއި ސިފައިންނަށް އެހީތެރިވުމަށް މާފަންނު ސަހަރާއާ ދިމާލަށް ދިއުމަށް ވަނީ އިލްތިމާސްކޮށްފައި. މީޑިއާގެ ފަރާތްތަކަށް ވެސް އެ އިލްތިމާސްވަނީ ކޮށްފައި.
އަލިފާނުގެ އަސަރުކޮށްފައިވާ ގެތަކުގެ މީހުން ޑިޒާސްޓާ މެނޭޖުމަންޓް ސެންޓަރަށް ގެންދިއުމުގެ މަސައްކަތް ކުރަމުންދާ ކަމަށް ފުލުހުން ބުނެފި. އަނިޔާވި ފުލުހަކާއި އިތުރު މީހަކު ވަނީ ހޮސްޕިޓަލަށް ގެންގޮސްފައި.
އެއްވެސް ބަޔަކު އެހީއަށް ބޭނުންވާ ކަމުގައިވާނަމަ ޑިޒާސްޓާ މެނޭޖުމަންޓުގެ ހޮޓްލައިން 115 އަށް ގުޅުމަށް އެ ސަރަހައްދުގައި އަޑުގަދަ ކުރާ ބޭނުންކޮށްގެން ވަނީ އިއުލާންކޮށްފައި. ނަޒާކީ ޓްރޭޑާސްއިން އެއްޗެހި ނެރެ ހުސްކުރަމުންދަނީ
އަލިފާންގަނޑު ފެތުރުން ހުއްޓުވައިފި. އަލިފާންގަނޑު ފެތުރި ޖެހިގެން ހުރި ފިހާރައިގައި ރޯވި އަލިފާންގަނޑު ވަނީ ކޮންޓްރޯލްކޮށްފައި. ނަމަވެސް ކޯސްޓްލައިން ފިހާރައިގައި ރޯވި އަލިފާންގަނޑު ކޮންޓްރޯލެއް ނުވޭ. ޖެހިގެން ހުރި ތަންނަތަށް އަލިފާން ފެތުރުން ހުއްޓުވުމަށްޓަކައި ފިޔަވަޅުތަކެއް ވަނީ އަޅާފައި.
ރޯވި އިމާރާތުގެ ކައިރީގައި ހުރި ގޭސް ފުޅިތައް އެ ސަރަހައްދުން ދުރަަށް ޖެއްސުމަށް ދަނީ އަންގަމުން. އެ ސަރަހައްދުގެ ގެތަކުގައި ދިރިއުޅޭ ގިނަ މީހުން ވަނީ މަގުތަކަށް ނުކުމެފައި.
ކުރިއަށް ވުރެ ބޮޑަށް އަލިފާންގަނޑު ވަނީ ހިފާފައި. އެމްއެމްޑީއެފްގެ ފަޔާ ލޮރީތަކުން ޖަހާ ފެނުން އަލިފާންގަނޑަކަށް އަސަރެއް ނުކުރޭ. އިމާރާތުގެ ތެރޭގައި ގަދައަށް ވަނީ ހުޅުހިފާފައި.
އަލިފާން ރޯވިތާ ގަޑިއެއްހާއިރު، އަދިވެސް ކޮންޓްރޯލެއް ނުކުރެވޭ
ކޯސްޓްލައިންގައި އަލިފާން ރޯވިތާ ގަޑިއެއްހާއިރުވީއިރު އަދިވެސް އަލިފާންގަނޑު ކޮންޓްރޯލެއް ނުކުރެވޭ. ހަލުވިކަމާއެކު އަލިފާންގަނޑު ރޯވެ، އަނދަން ފެށުމުން، އެމްއެމްޑީއެފަށް އެ އަލިފާންގަނޑު ކޮންޓްރޯލް ކުރެވޭ ގޮތެއް ނުވި. އަލިފާން ނިއްވުމަށްޓަކައި އެމްއެންޑީއެފްގެ ހަތަރު ވެހިކަލް އެބަ އޮތް.
ކަރަންޓް ޑިސްޓްރިބިއުޝަން ފޮއްޓެއްގައި ވަނީ ރޯވެފައި
އެ ސަރަހައްދުގައި ހުރި ކަރަންޓް ޑިސްޓްރިބިއުޝަން ފޮށްޓެއްގައި ވެސް ވަނީ އަލިފާން ރޯވެފައި. އެ ސަރަހައްދުގައި ކަރަންޓެއް ނެތް.
ރައްކާތެރިކަމުގެ ފިޔަވަޅެއްގެ ގޮތުން އެ ސަރަހައްދުގެ 10 ވަރަކަށް ގެއަކުން ވަނީ ކަރަންޓު ކަނޑާލާފައި
އިމާރާތުގައި ރޯވި އަލިފާންގަނޑު ޖެހިގެން ހުރި އެހެން ތަންތަނަށް ފެތުރިއްޖެ. ހާޑްވެއާ ފިހާރައާ ޖެހިގެން ހުރި ފިހާރައެއްގައި ވަނީ ރޯވެފައި. ކޯސްޓްލައިން ފިހާރައިގެ ފާރުތައް ވެއްޓި، ހުޅުގަނޑު ވަނީ ބޮޑުވެފައި. އަލިފާން ރޯވިތަނުގެ ތެރެއިން އެއްޗެހި ގޮވާއަޑު ވެސް އިވޭ.
ރޯވިތަނުގެ ތެރޭގައި ކެމިކަލާއި ޕްލާސްޓިކް އެބަހުރި
ރޯވި އިމާރާތުގެ ބޮޑު ބައެއް އަނދައި ހުލިވަނީ. އަދިވެސް އަލިފާންގަނޑު ކޮންޓްރޯލް ކުރެވޭ ގޮތެއް ނުވޭ. އަލިފާންގަނޑު ކޮންޓްރޯލް ނުކުރެވިގެން އުޅެނީ ރޯވި ހާޑްވެއާ ފިހާރައިގެ ތެރޭގައި ގިނަ އަދަދެއްގެ ކެމިކަލް ހުރުމުން ކަމަށް ބެލޭވޭ.
ވެހިކަލްތައް ދުރަށް ޖައްސަނީ
އަލިފާން ރޯވި ކޯސްޓްލައިން އިމާރާތުގެ ކައިރީގައި ޕާކުކޮށްފައިވާ ވެހިކަލްތައް ދުރަށް ޖެއްސުމުގެ މަސައްކަތް ވެސް ވަނީ ފަށާފައި. އަލިފާން ރޯވެ، އަނދަމުންދާއިރު މާލެއަށް ތުނިކޮށް ވާރޭ ވެހެމުންދޭ.
އަލިފާން ރޯވި އިމާރާތަކީ މަޖީދީމަގުގެ ގިނަ އަދަދެއްގެ ފިހާރަ ހުރި ސަރަހައްދަކަށްވުމުން، އަލިފާންގަނޑު އިތުރަށް ފެތުރިދިޔަ ނުދިނުމަށް އާންމުން ދަނީ ސިފައިންނާއި ފުލުހުންނާ ގުޅިގެން މަސައްކަތް ކުރަމުން.
އަލިފާންގަނޑު އަދިވެސް ކޮންޓްރޯލެއް ނުކުރެވޭ. ޖެހިގެން ހުރި ފިހާރަތަކަށް އަލިފާންގަނޑު ފެތުރިދާނެ ކަމުގެ ބިރުވަނީ ހީވެފައި.
މުޅި ސަރަހައްދުގައި ވަނީ ދުންގަނޑު ފެތުރިފައި. އަލިފާން ނިއްވުމުގައި ފުލުހުންނާއި ސިފައިން ދަނީ އަވަދިނެތި ހަރަކާތްތެރިވަމުން.
އަލިފާން ރޯވި އިމާރާތުން ހޭނެތިފައި އޮތް މީހަކު ނެރެފި
އަލިފާން ރޯވި އިމާރާތުން މީހަކު ނެރެގެން ގޮސްފި. ބެލެވޭ ގޮތުން އޭނާ އޮތީ ހޭނެތިފައި. މުޅި ސަރަހައްދުގައި ވަނީ ދުން ބޯވެފައި.
އަލިފާން ރޯވި އިމާރާތުން ވަރަށްބޮޑަށް ދުން އަރަމުންދަނީ. އިމާރާތުގެ ތެރޭގައި ވަރަށް ބޮޑަށް ރޯވެފައިވާ ކަމަށް ބެލެވޭ. ސަލާމަތީ ބާރުތަކުން އެ ސަރަހައްދުގައި ހަރަކާތްތެރިވަމުންދޭ.
