18 Apr 2016, 11:11
ކުރީގެ ޑިފެންސް މިނިސްޓަރު ކާނަލް ރިޓަޔާޑު މުހައްމަދު ނާޒިމްގެ ބޭސްފަރުވާގެ މުއްދަތު އިތުރުކޮށްނުދޭން ނިންމައި ކުރިއަށްއޮތް 48 ގަޑިއިރު ތެރޭ އެނބުރި ރާއްޖެ ވަޑައިގަތުމަށް ނާޒިމް އަށް މޯލްޑިވްސް ކަރެކްޝަނަލް ސާވިސް އިން އަންގައިފިއެވެ.
ކަރެކްޝަންސްގެ އިންފޮމޭޝަން އޮފިސަރު ވަނީ ސަން އަށް އެކަން ކަށަވަރުކޮށް ދެއްވާފައެވެ. ނަމަވެސް އެގޮތަށް ނިންމީ ކީއްވެގެން ކަމެއް އޭނާ ވިދާޅެއް ނުވެއެވެ.
ނާޒިމުގެ ގާނޫނީ ވަކީލް ހުސްނުއް ސުއޫދު މިއަދު ސަން އަށް ވިދާޅުވީ ނާޒިމަކީ ގާނޫނާ ޚިލާފަށް އުޅުއްވާ ބޭފުޅެއް ނޫން ކަމަށާއި އެމުއްދަތުގެ ތެރޭގައި ނާޒިމް އެނބުރި ރާއްޖެ ވަޑައިގަންނަވާނެ ކަމަށެވެ.
މިހާރު ސިންގަޕޫރުގައި ހުންނެވި ނާޒިމްގެ ބޭސްފަރުވާގެ ދަތުރުކުރުކޮށް އެނބުރި ރާއްޖެ ވަޑައިގަތުމަށް މިމަހު އެއް ވަަނަ ދުވަހުވެސް ކަރެކްޝަންސް އިން ވަނީ އަންގާފައެވެ.
ނާޒިމް 11 އަހަރަށް ޖަލަށްލާފައި ވަނީ އެމަނިކުފާނު ދިރިއުޅުއްވި އެޕާޓްމަންޓުން ފިސްތޯލައެއް ފެނުނު ކަމަށް ފުލުހުން ކޯޓުގައި ހެކިބަސް ދިނުމުންނެވެ. އެ މައްސަލާގައި ދައުލަތުން އޭނާގެ މައްޗަށް އުފުލީ ހަނގުރާމަވެރި ހަތިޔާރު ރާއްޖެ އެތެރެކޮށް ގެންގުޅުމުގެ ކުށުގެ ދައުވާ އެވެ.
ކްރިމިނަލް ކޯޓުން ނާޒިމަށް އިއްވި ހުކުމަށް ހައިކޯޓުން ވަނީ ތާއީދުކޮށްފައެވެ. އަދި އެ ހުކުމް ސުޕްރީމް ކޯޓުގައި އިސްތިއުނާފުކުރަން ނާޒިމް ވަނީ ނިންމާފައެވެ.