17 Apr 2016, 22:59
ހއ. އިހަވަންދޫ ކުނިގޮނޑުގައި ރޯވި އަލިފާންގަނޑު ފެތުރި، ގެއްލުންތަކެއްވެއްޖެ އެވެ.
އެ ރަށު ކައުންސިލް ނައިބު ރައީސް އަބްދުލް މުއީދު އިބްރާހިމް "ސަން"އަށް ވިދާޅުވީ، އެ ރަށު ކުނި ގޮނޑުގައި ރޯވީ މިއަދު އިރުއޮއްސި 6:30 ހާއިރު ކަމަށާއި ރޯވެފައިވާ އަލިފާން ނިއްވުމުގެ މަސައްކަތް ކުރަމުން އަންނަ ކަމަށެވެ.
"ވަރަށް ބޮޑަށް ރޯވެފައި ހުރީ. އެއްކޮށްފައި ހުންނަ ދަނގަޑުތަކާއެއްކޮށް. ގާތްގަނޑަކަށް 90 ޕަސެންޓު ވަރު ގޮނޑުގެ އެއްކޮށް ރޯވެއްޖެ،" އަބްދުލް މުއީދު ވިދާޅުވި އެވެ.
އޭނޭ ވިދާޅުވީ، ކުނި ގޮނޑުގެ 300 ވަރަކަށް ފޫޓުގެ ސަރަހައްދަށް އަލިފާންގަނޑު ފެތުރިފައިވާ ކަމަށާއި ނަމަވެސް އެއްވެސް މީހަކަށް ގެއްލުމެއް ލިބިފައި ނުވާ ކަމަށެވެ.
"އެއްވެސް މީހަކަށް ގެއްލުމެއް ނުވޭ. އެ ސަރަހައްދުގައި ހުރި ގަސްގަހާ ގެއްސަށް ވަރަށް ބޮޑަށް ގެއްލުން ލިބުނީ. ފުލުހުން ވެސް ލަފާ ކުރަނީ ބަޔަކު ރޯކޮށްލީ ކަމަށް،" އަބްދުލް މުއީދު ވިދާޅުވި އެވެ.
އޭނާ ވިދާޅުވީ، ރޯވެފައިވާ އަލިފާން ނިއްވުމަށް ކުޅުދުއްފުށީގައި ތިބި އެމްއެންޑީއެފް ގެ ފަޔާ އެންޑް ރެސްކިއު މިހާރު އިހަވަންދޫ އަށް ދިއުމަށް ފުރާފައިވާ ކަމަށެވެ.