14 Apr 2016, 15:43
ގާނޫނާ ހިލާފަށް ވެކްސިންގެ ވިޔަފާރި ކުރި މައްސަލައެއްގައި ޗައިނާގެ 357 އޮފިޝަލުންނާ މެދު ފިޔަވަޅު އަޅައި އޭގެ ތެރެއިން ބައެއް މީހުންގެ މައްޗަށް ޖިނާއީ ދައުވާ ކުރުމަށް ނިންމާފައިވާ ކަމަށް ޗައިނާ ސަރުކާރުން ބުނެފި އެވެ.
ހަބަރުތައް ބުނާގޮތުން 59 ސިއްހީ ހިދުމަތް ދޭ ތަންތަނަށް ރަނގަޅަށް ބަންދުކޮށްފައި ނުވާ އަދި ރައްކާތެރި ނޫން ގޮތަކަށް ވެކްސިން ފޮނުވި ކަމަށް ބުނެ އޮފިޝަލުންނާ ދެކޮޅަށް 192 ޖިނާއީ މައްސަލަ މިހާރު ވަނީ ފައިލް ކޮށްފަ އެވެ.
ވެކްސިންތަކުގެ މައްސަލައިގައި ޗައިނާ ރައްޔިތުން އަންނަނީ ވަރަށް ބޮޑަށް ނުރުހުން ފާޅުކުރަމުންނެވެ.
ގާނޫނާ ހިލާފަށް ވެކްސިން ވިއްކުމުގެ މަސައްކަތް 2011 ވަނަ އަހަރުން ފެށިގެން ކުރަމުން އަންނަ އިރު، އެ މައްސަލައިގައި ދެ އަންހެނުން ވަނީ ހައްޔަރުވެސް ކޮށްފަ އެވެ. އެމީހުންގެ އަތުން 88 މިލިއަން ޑޮލަރުގެ ވެކްސިންވެސް އަތުލާފައިވެ އެވެ.
މީގެ ފަސް އަހަރު ކުރިން މައްސަލަ ފެންމަތިވި ނަމަވެސް، އެކަމާ ގުޅޭ ތަފްސީލު ހާމަކޮށްފައި ވަނީ މިދިޔަ މެހުގެ ތެރޭގަ އެވެ. ޗައިނާ ސަރުކާރުން ބުނީ ވެކްސިން ރައްކާތެރިކޮށް ބެލެހެއްޓުމުގެ މަސައްކަތް އިތުރަށް ހަރުދަނާ ކުރާނެ ކަމަށެވެ.
ޗައިނާގެ ސްޓޭޓް ކައުންސިލުން ބުނީ އެކަމުގައިވާ ބައިވެރިވި 357 އޮފިޝަލުންނަށް އަދަބެއްގެ ގޮތުން މަގާމު ދަށްކުރާނެ ކަމަށާއި ނުވަތަ ވަޒީފާއިން ވަކިކުރާނެ ކަމަށެވެ. އަދި އޭގެ ތެރެއިން 202 މީހުން ބަންދުކޮށްފައިވާ ކަމަށްވެސް ކައުންސިލުން ބުނެ އެވެ.