12 Apr 2016, 15:18
މިނިވަން ނޫހުގެ ނޫސްވެރިޔާ އަހްމަދު ރިލްވާން އަބްދުﷲ ގެއްލުނު މައްސަލާގައި މިއަދު ބާއްވަން ތާވަލު ކުރި ސަލާމަތީ ހިދުމަތްތަކާ ބެހޭ ކޮމިޓީގެ ބައްދަލުވުން ސިއްރުކޮށްފި އެވެ.
ކޮމިޓީ ތާވަލުކޮށްފައި ވަނީ މިއަދު 11:00 އަށެވެ. ކޮމިޓީ ސިއްރު ކުރި އިރު، މިއަދު ހަމަޖެހިފައި އޮތީ ރިލްވާނުގެ މައްސަލަ ދިރާސާކުރި ސަބް ކޮމިޓީގެ ރިޕޯޓާ މެދު ގޮތެއް ނިންމުމެވެ.
އަދި ރިލްވާން ގެއްލުނު މައްސަލައިގެ ތަހުގީގު ހިންގުމުގައި ފުލުހުން އިހުމާލުވެފައިވާ ކަމަށާއި ގަސްތުގައި ހަގީގަތް ފޮރުވުމަށް މަސައްކަތް ކޮށްފައިވާކަން ބަޔާންކޮށް، ކަމާ ބެހޭ ފަރާތްތައް ކޮމިޓީ އަށް ހާޒިރުކޮށް އެ މައްސަލަ ބަލައިދިނުމަށް އެދިފައި ވާތީ އެ މައްސަލަ ދިރާސާކުރުން ވެސް މިއަދުގެ ކޮމިޓީގައި ވަނީ ތާވަލުކޮށްފަ އެވެ.
ރިލްވާން ގެއްލުނުތާ 606 ދުވަސް ފަހުން، އެ މައްސަލާގައި ދެ މީހަކު ވަނީ ހައްޔަރުކޮށްފަ އެވެ.
އެ މައްސަލައާ ގުޅިގެން މި މަހުގެ ފަސް ވަނަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ ރިލްވާން ގެއްލުނު ދުވަހު އޭނާ އަށް ފާރަލަމުން ބަޔަކު ދިޔަ ކަމަށާއި އެކަން ކުރީ ކުޑަހެންވޭރަށް ނިސްބަތްވާ ބައެއް ކަމަށެވެ. ރިލްވާން އަށް ފާރަލުމުގައި އިސްކޮށް އުޅުނީ ސ. ހުޅުދޫ، އަތިރިއާގެ، މުހައްމަދު ސުވައިދު ކަމަށާއި އޭނާ މިހާރު ރާއްޖޭގައި ނެތް ކަމަށް ފުލުހުން ވަނީ ބުނެފަ އެވެ. ސުވައިދުއަކީ ރިލްވާންގެ މައްސަލާގައި ހައްޔަރު ކުރުމުން ކޯޓުން ދޫކޮށްލި މީހެކެވެ.
އެ ކާރުން ފެނުނު އިސްތައްޓެއްގެ ޑީއެންއޭ، ރިލްވާންގެ މަންމަގެ ޑީއެންއޭއާ ދިމާވާ ކަމަށް ވެސް ފުލުހުން ވަނީ ބުނެފަ އެވެ.