11 Apr 2016, 20:19
ވޭސްޓު މެނޭޖްމަންޓު ކޯޕަރޭޝަން (ވެމްކޯ) އިން މި އަހަރުގެ ފަހުކޮޅު މާލޭގެ ބައެއް ސަރަހައްދު ތަކުގެ ގޭބީސީތަކުން ކުނި ނެގުމުގެ މަސައްކަތް ފަށާނެ ކަމަށް އެންވަޔަރަންމަންޓު މިނިސްޓަރު ތޯރިގު އިބްރާހިމް ވިދާޅުވެއްޖެ އެވެ.
ވެމްކޯގެ ވޭސްޓު ކަލެކްޝަން ސާވޭ ރިޕޯޓު އިފްތިތާހު ކުރުމަށާއި "ސާފް ރާއްޖެ" ކެމްޕޭން އިފްތިތާހު ކުރުމަށް މިއަދު އެންވަޔަރަންމަންޓު މިނިސްޓްރީގައި ބޭއްވި ހާއްސަ ރަސްމިއްޔާތުގައި ވާހަކަ ދައްކަވަމުން އެންވަޔަރަންމަންޓު މިނިސްޓަރު ވިދާޅުވީ، މި އަހަރު ނިމޭއިރު މާލޭގެ ހުރިހާ ސަރަހައްދުތަކުގެ ގޭބީސީތަކުން ކުނި ނެގުމުގެ މަސައްކަތް ވެމްކޯ އިން ފަށާނެ ކަމަށެވެ.
"އެކަމަށް ތައްޔާރު ވުމުގެ ގޮތުން ވެމްކޯއިން ދަނީ ވަރަށް ގިނަ މަސައްކަތްތަކެއް ކުރަމުން. އަޅުގަނޑަށް މައުލޫމާތު ލިބިފައި އޮތް ގޮތުގައި މިހާރު ވަނީ ވޭސްޓު މެނޭޖު ކުރަން ބޭނުންވާ އިކިއުޕްމަންޓު ގަތުމުގެ ވެސް ބައެއް ޓެންޑާތައް ކުރެވި އެ ޓެންޑާތައް އިވަލުއޭޓު ކުރެވި ބައެއް އިކިއުޕްމަންޓުތައް ގަންނަން މިހާރު ކޮންޓްރެކްޓްވެސް ކުރެވިފައި،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، މާލެ އަކީ ބިން ކުޑަ އަދިި ރައްކާތެރި ގޮތުގައި ކުނި މެނޭޖު ކުރާނެ ހާލަތެއް ހޯދަން ޖެހިފައިވާ ތަނެއް ކަމަށެވެ.
"ހައުސިން މިނިސްޓްރީން މަސައްކަތްތަކެއް ފައްޓަވާފަ މި ވަނީ މާލޭގެ ހުޅަނގު ދެކުނު ފަރާތުގެ ސަރަހައްދެއް ބިން ހިއްކައިގެން އެތަނުން ވޭސްޓް މެނޭޖްމަންޓަށް ބޭނުންވާ ގޮތަށް ބިން ހޯދުމުގެ މަސައްކަތްތައް ކުރެވެމުންދަނީ،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، އެ ސަރަހައްދު ހިއްކުމުން މާ ގިނަ ދުވަސްތަކެއް ނުވެ ވެމްކޯ އަށް އެ ސަރަހައްދުން ބިން ހަމަޖެހިގެން ދާނެ ކަމަށެވެ.
"އިރާދަ ކުރެއްވިއްޔާ މި އަންނަ އަހަރު ސަރުކާރުން އަދި ވެމްކޯ އިން މަސައްކަތް ކުރާނީ ތިލަފުށި މިހާރު ހުރި ސަރަހައްދުން ރިހަބިލިޓޭޓްކޮށް އަދި ރައްކާތެރި ގޮތުގައި ކުނި މެނޭޖު ކުރުމަށް ބޭނުންވާ ސިސްޓަމްސް ގާއިމު ކުރުން،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، ކުރިއަށް އޮތް ތާނގައި ހއ، ހދ، އަދި ށ އަތޮޅުގައިވެސް ކުނި މެނޭޖު ކުރުމުގެ މަސައްކަތް ކުރުމަށް ބަޖެޓު ހަމަޖެހިފައިވާ ކަމަށެވެ.