އިތުރު ތިން މީހެއްގެ މައްޗަށް މޮނިކޮން އަމުރު ނެރެ، އެކެއްގެ ފައިގައި ޓެގް އަޅުވައިފި

08 Apr 2016, 20:18

ޓެރަރިޒަމް މަނާ ކުރުމުގެ ގާނޫނުގެ ދަށުން އިތުރު ތިން މީހެއްގެ މައްޗަށް މޮނިކޮން އަމުރު ނެރެން ހޯމް މިނިސްޓަރު އުމަރު ނަސީރު ނިންމެވުމާ ގުޅިގެން، ހައި ކޯޓުން އެ ތިން މީހުންގެ މައްޗަށް މޮނިކޮން އަމުރު ނެރެފި އެވެ.

ހައިކޯޓުން މިފަހަރު މޮނިކޮން އަމުރު ނެރެފައިވާ ތިން މީހުންނަކީ ގއ. ވިލިނގިލި، ހަނދުވަރުދޭގެ، އަހުމަދު ފިރާޝް (32އ) އާއި، ސ. ހިތަދޫ، އުދާސް، އަހުމަދު މުހައްމަދު (30އ) ގެ އިތުރުން ގއ. ކޮނޑޭ، ދާރުލްގަރާރު، އަބްދުﷲ ނާސިހް (20އ) އެވެ.

އެ ތިން މީހުންގެ ތެރެއިން އަބްދުﷲ ނާސިހްގެ ފައިގައި މިހާރު ޓެގް އަޅުވާފައިވާ ކަމަށާއި، ޓެގް އެޅުވުމަށް އަނެއް ދެ މީހުން ހޯދުމުގެ މަސައްކަތް ކުރަމުން އަންނަ ކަމަށް ފުލުހުން ވަނީ ބުނެފަ އެވެ.

އެ ތިން މީހުންނަކީ ވެސް ރާއްޖޭގައި ބޮޑެތި ކުށްތަކެއް ތަކުރާރުކޮށް އެމީހުންގެ އަމަލުތަކުގެ ސަބަބުން މުޖުތަމައުގެ ސަލާމަތަށް ނުރައްކާވެފައިވާ ބައެއް ކަމަށް ފުލުހުން ބުނެ އެވެ.

މޮނިކޮން އަމުރުނެރެން ހޯމި މިނިސްޓަރު ނިންމެވުމާއެކު ދިވެހިރާއްޖޭގެ ހައިކޯޓުން ނެރުނު މޮނިކޮން އަމުރުގެ ދަށުން މީގެ ކުރިން 11 މީހެއްގެ ފައިގައި ވަނީ ޓެގް އަޅުވާފަ އެވެ.

މޮނިކޮން އަމުރު ހިންގާ މީހުންގެ ކަންކަން ބަލަހައްޓައި މޮނިޓާ ކުރެވޭނެ ހަރުދަނާ ނިޒާމެއް ފުލުހުންގެ މުއައްސަސާގައި ވަނީ ގާއިމް ކޮށްފަ އެވެ. އެގޮތުން އެ މީހުންނަށް އަމުރުގެ ދަށުން ކަނޑައަޅާފައިވާ ކަންކަން ފުރިހަމަ ކުރުންމަތީ ދެމިތިބޭތޯ ބަލައި ދުވަހުން ދުވަހަށް އަދި ވަގުތުން ވަގުތަށް އެކަންކަން ބެލެހެއްޓިގެން ދާނެ ކަމަށް ފުލުހުން ބުނެ އެވެ.