08 Apr 2016, 19:32
މީގެ ކުރިން ކާމިޔާބު ފިލްމުތަކެއް ޕްރޮޑިއުސްކޮށްފައިވާ ބޮލީވުޑްގެ މަޝްހޫރު ތަރި، ޝާހް ރުކް ޚާން، ފިލްމު ޑައިރެކްޓަރެއްގެ މަގާމް އަދާކުރަން ބިރު ގަންނަ ކަމަށް ބުނެފި އެވެ.
ޑައިރެކްޓަރަކަށް ވެދާނަންތޯ މީޑިއާ އަކުން އެހި ސުވާލަކަށް ޖަވާބު ދެމުން ޝާހު ބުނީ، އެއީ ވަރަށް އެކަނިވެރި ވަޒީފާއެއް ކަމަށެވެ.
"އަހަރެން ޑައިރެކްޓްކުރާ ނަމަ، އަހަރެންގެ ނަފްސަށް ކުރިއަށް އޮތް ފަސް އަހަރުގެ ތެރޭގައި އިތުބާރުކުރަން ދަސްކުރަންޖެހޭ. މިހާރަށް ބަލާނަމަ ޑައިރެކްޓްކުރަން ވަރަށް ބިރުގަނޭ. އަހަންނަކަށް ނޭނގޭނެ، އޯކޭ! ކަޓް ބުނާކަށް،" ޝާހު ބުނެފައިވެ އެވެ.
އޭނާ ބުނީ، ކުރިއަށް އޮތް ދެ ތިން އަހަރުގެ ތެރޭގައި ޑައިރެކްޓްކުރުމަށް، ކޯސްތަކެއް ހަދައި، ޑައިރެކްޓަރެއްގެ މަގާމުގައި ހުރެ ވާހަކައެއް ކިޔައިދިނުމަކީ ކިހާ ޝައުގުވެރިކަމެއްކަން ބަލާލަން ބޭނުންވާ ކަމަށެވެ.
ޝާހު މިދުވަސްކޮޅު އަވަދިނެތި އުޅެނީ އޭނާގެ އެންމެ ފަހުގެ ފިލްމު، "ފޭން" ގެ ޕްރޮމޯޝަންގައެވެ. އެ ފިލްމު ރިލީޒްކުރަން ހަމަޖެހިފައިވަނީ މިމަހުގެ 15 ވަނަ ދުވަހުއެވެ.
ޝާހް ރުކް ޚާން ޕްރޮޑިއުސްކުރި ބައެއް ފިލްމުތަކުގެ ތެރޭގައި، "ޗަލްތޭ ޗަލްތޭ" އާއި "މެއި ހޫ ނާ" އަދި "ޑޮން 2" ފާހަގަކޮށްލެވެއެވެ.