08 Apr 2016, 16:19
ބޮޑުމަހެއް ކާލި، ސްޕޭން މަސްވެރިއަކު ވަރަށް ހަނިގޮތަކަށް އެމަހުގެ ބަނޑުން ސަލާމަތްވެއްޖެ އެވެ. ސްޕޭންގެ އެ މަސްވެރިޔާ ކަނޑަށް ގެއްލިގެން ހޯދާތާ ތިންދުވަސްފަހުން އޭނާ ފެނިފައިވަނީ އެގައުމުގެ ކޯސްޓް ގާޑުގެ އުޅަނދަކަށެވެ.
އެއުޅަނދުން އޭނާ ސަލާމަތް ކުރުމުން އޭނާ ބުނިގޮތުގައި އޭނާ ކަނޑުގައި އުޅެނިކޮށް ވަރަށް ބިޔަ ބޮޑުމަހެއް (ބްލޫ ވޭލްއެއް) އޭގެ އަގައިގެ ތެރެއަށް އޭނާގެ ހަށިގަނޑުލައި ދިރުވާލީ އެވެ. މިއާއެކު އޭތީގެ ސްޓޮމަކްގެ ތެރެއަށް އޭނާ ދިޔައެވެ. އަދި ދެދުވަސް ބައިވަންދެން އެބިޔަ މަހުގެ ސްޓޮމަކް ނުވަތަ މައިދާ ގެ ތެރޭގައި އޭނާ އުޅެންޖެހުނުއިރު ސްޓޮމަކުން ނެރޭ ގެސްޓްރިކް ޖޫސް (ހަޖަމުކުރާ ތޫނު ޖޫސްތަކާއި އެންޒައިމް) ތަކުން ދުވާ ނުބައި ވަހުންނާއި އެޖޫސްތަކުގައި ހަންގަނޑު ޖެހުމުން ހަންގަނޑަށް ތަދުވެ މަރުވާ ހިސާބަށް ހާލަތު ދިޔަކަމަށާއި ނަމަވެސް ސަލާމަތްވާނެ ކަމުގެ އުންމީދު ނުގެއްލޭކަމަށް އޭނާ ބުންޏެވެ.
ސްޕޭންގެ މިމަސްވެރިޔާ ބުނިގޮތުގައި އޭނާ ދިރުވާލި ބޮޑުމަސް ދެދުވަހާއި ބައިގެ ތެރޭގައި އޭތީގެ އަނގައިން އޭނާ ބޭރުކޮށްލި އެވެ. ބޮޑުމަހުގެ ބަނޑުތެރޭގައި އޮތްއިރު މަރުން ސަލާމަތްވީ އެސޮރުގެ ބަނޑުތެރެއަށް ވަންނަ ކުދިމަސްތައް ކައިގެންނާއި އޭތީގެ ބަނޑުގައި އޮތްހުސްތަން އޮތުމާ އަދި ކޮންމެވެސް ވަރަކަށް އޮކްސިޖަންވެސް ހުރުމާއެކު ނޭވާލާނެ ފުރްސަތު ލިބުމުންކަމަށް އޭނާ ބުންޏެވެ.
ބޮޑުމަހުގެ ބަނޑުން ނެރުނު ޖޫސްތަކުގެ ނުބައިވަހުން މަސްވެރިޔާ ސަލާމަތްވީ އޭނާގެ ހަށިގަނޑު ސާފުކުރުމަށް ޑޮކްޓަރު ދިން ދިޔާ ބޭސްތައް ބޭނުން ކުރަންފެށިތާ ތިންދުވަސްފަހުން ކަމަށް ވެއެވެ.
ސްޕޭންގެ ބައިލޮޖިސްޓެއްކަމަށްވާ ޚުވާން ކްރިސްޓޮޕާލް މީގަލް ވިދާޅުވީ، ބޮޑުމަހަކީ ބޮޑެތި ދަތްހުންނަ އެއްޗެއްނޫންކަމަށާއި އަދި ބޮޑެތި ބައެއް ތަކެތި ދިރުވާލެވިއްޖެނަމަ ފަހުން ހޮޑުލައިގެން އެތަކެތި ބޭރުކޮށްލުމަކީ ބޮޑުމަސް ކުރާކަމެކެވެ. އަދި ބޮޑުމަހުގެ ބަނޑުން ނެރޭ ގެސްޓްރިކް ޖޫސްތައް އިންސާނުންގެ ހަށިގަނޑު ހަޖަމު ކޮށްލުމަށް އެތަށް ދުވަހެއް ނަގާނެކަމަށާއި އެހެންކަމުން އެސޮރުގެ ބަނޑުތެރެއިން ސަލާމަތްވުމަކީ ކުޑަނަމަވެސް އޮތް ފުރްސަތެއް ކަމަށް އޭނާ ވިދާޅުވިއެވެ.
މީގެ ކުރިންވެސް ޕޯޗްގަލްގެ ދެ ޑައިވަރުން ބޮޑުމަހެއްގެ ބަނޑުތެރެއަށް ދިޔަކަމަށާއި އެ ދެމީހުންވެސް އޭތީގެ އަނގައިން ބޭރުކޮށްލިކަން އޭނާ ފާހަގަ ކުރިއެވެ. (އާރުޓީ)