07 Apr 2016, 08:32
ސައުތު އެފްރިކާގައި ކުރިއަށްދާ ވޯލްޑް ޓްރޭޑް މާކެޓް އެފްރިކާ އެޑިޝަންގައި ރާއްޖެއިން ބައިވެރިވެއްޖެ އެވެ.
އިއްޔެއިން ފެށިގެން މާދަމާގެ ނިޔަލަށް ކުރިއަށްދާ ފެއާގައި މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ) އާއި ޓުއަރިޒަމް މިނިސްޓްރީ ގުޅިގެން ފަސް ކުންފުންޏަކާ ޓުއަރިޒަމް އިންޑަސްޓްރީގައި މަސައްކަތް ކުރާ 9 ފަރާތަކުން ވަނީ ބައިވެރިވެފަ އެވެ.
އެފްރިކާގެ ކޭޕް ޓައުން ކޮންވެންޝަން ސެންޓަރުގައި ކުރިއަށްދާ ފެއާގައި ރާއްޖޭގެ ފަރާތުން ތަމްސީލު ކުުރަނީ "ދަ ސަނީ ސައިޑް އޮފް ލައިފް" އެވެ. ރާއްޖޭގެ ވަފުދު ލީޑު ކުރާނީ އެމްއެމްޕީއާރުސީގެ މެނޭޖިން ޑައިރެކްޓަރު ހާރިސް މުހައްމަދެވެ.
އެ ފެއާގައި ދެކުނު އެފްރިކާގެ ފަތުރުވެރިން ޒިޔާރަތްކޮށްލުމަށް އެންމެ ހިތްގައިމު އަދި ތަފާތު މަންޒިލްތަކުގެ މައުލޫމާތު ފޯރުކޮށްދޭނެ އެވެ.
އެފްރިކާގައި ކުރިއަށްދާ ވޯލްޑް ޓްރޭޑް މާކެޓުގައި ބަހައްޓާފައިވާ ރާއްޖޭގެ ސްޓޯލް އެއް -- ފޮޓޯ: އެމްއެމްޕީއާރުސީ
ރާއްޖެއިން އެ ފެއާގައި ރާއްޖޭގެ ހިތްގައިމު މަންޒިލްތަކުގެ މައުލޫމާތު ދިނުމުގެ އިތުރުން، ފަތުރުވެރިކަން އިތުރަށް ފުޅާކުރުމަށް މަސައްކަތް ކުރާނެ ކަމަށް އެމްއެމްޕީއާރުސީ އިން ބުނެ އެވެ.
މިއީ، އެފްރިކާގައި އެ ފެއާ ބާއްވަމުން އަންނަތާ ތިން ވަނަ އަހަރު ނަމަވެސް، މިއީ ރާއްޖެއިން ފެއާގައި ބައިވެރިވި ފުރަތަމަ ފަހަރެވެ. އެ ފެއާގައި ރާއްޖެއަށް ފަތުރުވެރިން ގެނައުމަށް ކުރިއަށް ގެންދާ ކެމްޕޭނު، "ވިޒިޓް މޯލްޑިވްސް އިޔަރ 2016" ވެސް ޕްރޮމޯޓު ކުރުމަށް ވަނީ ހަމަޖެހިފަ އެވެ.
އެފްރިކާ އަކީ މިހާރު ރާއްޖޭގައި ފުޅާވަމުން އަންނަ މާކެޓެކެވެ. އެގޮތުން މިދިޔަ އަހަރު އެފްރިކާ އިން ރާއްޖެއަށް 4،170 ފަތުރުވެރިން ޒިޔާރަތް ކުރި އިރު، އެއީ އޭގެ ކުރީ އަހަރާ އަޅާބަލާއިރު، 33.2 ޕަސެންޓު އިތުރު އަދަދެކެވެ.