06 Apr 2016, 13:28
ގުދުރަތީ ކާރިސާތަކުގެ އަސަރާއި ހީރާސް ނުވަތަ ރިސްކް ކުޑަ ކުރުމަށާއި، އެފަދަ ކާރިސާތަކަށް ތައްޔާރު ވުމުގެ މަސައްކަތުގައި ބޭނުންކުރުމަށް ޖަޕާނު ސަރުކާރުން ދިވެހިރާއްޖެ އަށް 5.4 މިލިޔަން ޑޮލަރު (600 މިލިޔަން ޔެން)ގެ ހިލޭ އެހީ ދީފި އެވެ.
ފޮރިން މިނިސްޓްރީގައި މިއަދު ކުރިޔަށް ދިޔަ ރަސްމިއްޔާތެއްގައި، ރާއްޖެ އަށް މި ފައިސާ ފޯރުކޮށްދިނުމުގެ އެގްރީމެންޓްގައި ޖަޕާނު ސަރުކާރުގެ ފަރާތުން ސޮއި ކުރެއްވީ، ދިވެހިރާއްޖެ އަށް ޖަޕާނުން ކަނޑައަޅުއްވާފައި ހުންނަވާ ސަފީރު ކެނީޗީ ސުގަނޫމާ އެވެ. ދިވެހި ސަރުކާރުގެ ފަރާތުން އެ އެހީއާ ހަވާލުވެވަޑައިގަތީ، ފޮރިން މިނިސްޓަރ ދުންޔާ މައުމޫނެވެ.
ޖަޕާނު ސަރުކާރުން ރާއްޖެއަށް 5.4 މިލިޔަން ޑޮލަރުގެ ހިލޭ އެހީ ފޯރުކޮށްދިނުން -- ސަން ފޮޓޯ/ޔޫސުފް ސޮފްވާން
ފޮރިން މިނިސްޓްރީ އިން ބުނި ގޮތުގައި، އެ ފައިސާގެ ބޭނުން ހިފާނީ ކާރިސާގެ ހީރާސް ކުޑަކުރުމަށް ބޭނުންވާ ނިޒާމުތައް ގާއިމު ކުރުމަށެވެ. އެގޮތުން، ކާރިސާއެއް ހިނގަން އުޅޭ އިރު އެ މައުލޫމާތު ފެތުރުމަށް ވޯނިންގް ސިސްޓަމެއް ގާއިމު ކުރުމަށާއި، ޑްރެއިނޭޖް ޕަމްޕު ފަދަ ތަކެތި ހޯދުމަށް މި ފައިސާ ބޭނުން ކުރެވޭނެ އެވެ. އަދި މި ފައިސާ ބޭނުންކުރެވޭނެ ގޮތްތައް ކަނޑައަޅާނީ ދިވެހި ސަރުކާރަށް ކޮންސަލްޓޭޝަން ދޭ ފަރާތްތަކުގެ އިރުޝާދުގެ ދަށުން ކަމަށް ވެސް ފޮރިން މިނިސްޓްރީއިން ބުނެ އެވެ.
އެ ރަސްމިއްޔާތުގައި، ފޮރިން މިނިސްޓަރު ދުންޔާ މައުމޫން ވިދާޅުވީ، ޖަޕާނަކީ ރާއްޖޭގެ އިގްތިސާދީ އަދި އިޖްތިމާއީ ތަރައްގީގައި ވަރަށް މުހިންމު ދައުރެއް އަދާކުރާ ގައުމެއް ކަމަށާއި، ދެ ގައުމުގެ ދެމެދުގައި އޮންނަނީ ވަރަށް ގާތް ގުޅުމެއް ކަމަށެވެ.
އަދި، ޖަޕާނު ސަރުކާރުން މިއަދު ފޯރުކޮށްދިން ފައިސާގެ އެހީގެ އެންމެ ފުރިހަމަ ބޭނުން ރާއްޖެ އިން ހިފާނެ ކަމަށް ދުންޔާ ވިދާޅުވި އެވެ.
އެ ރަސްމިއްޔާތުގައި ޖަޕާނުގެ ސަފީރު ކެނީޗީ ސުގަނޫމާ ވިދާޅުވީ، ޖަޕާނަކީ ކާރިސީ ހިރާސް ކުޑަކުރުމުގައި ދުނިޔޭގައި އެންމެ ބޮޑެތި މަސައްކަތްތައް ކުރާ ގައުމު ކަމަށެވެ.
"ކާރިސާއެއް ނުހުއްޓުވޭނެ. އެކަމަކު އޭގެ އަސަރު ކުޑަ ކުރެވިދާނެ. މިއީ އަޅުގަނޑުމެންގެ ގައުމުން ދުނިޔޭގެ އެހެން ގައުމުތަކާ ގުޅުން ބަދަހިކުރަން ވަރަށް ބޭނުންވާ ދާއިރާއެއް،" ސަފީރު ވިދާޅުވި އެވެ.