06 Apr 2016, 11:03
ފުޓްބޯލް އެސޯސިއޭޝަން އޮފް މޮލްޑިވްސް (އެފްއޭއެމް)ގެ ބޭންކް އެކައުންޓުން ފައިސާ ނުނެގޭތީ، އެ އިދާރާގެ މުވައްޒަފުންގެ ހުސްވި މަހުގެ މުސާރަ ދިނުން ލަސްވެއްޖެ އެވެ.
އެފްއޭއެމްގެ މުވައްޒަފުންނަށް ނިމިގެންދިޔަ މާރިޗު މަހުގެ މުސާރަ ނުދެވި ލަސްވެފައިވާ ކަން އެ އެސޯސިއޭޝަންގެ ނޯމަލައިޒޭޝަން ކޮމިޓީގެ ޖެނެރަލް ސެކްރެޓަރީ މުހައްމަދު އާދަމް ވަނީ 'ސަން'އަށް ކަށަވަރުކޮށްދެއްވައިފަ އެވެ.
""ބޭންކުން ބޭނުންވާ ސިޓީ ހޯދުމަށް ހޯމް މިނިސްޓްރީގައި އެފްއޭއެމްއިން އެދުނީ ހުސްވި މަހުގެ 22 ވަނަ ދުވަހު. ބޭންކަށް ބޭނުންވާ މި ސިޓީ ހޯމް މިނިސްޓްރީން ނުލިބޭތީ ބޭންކުގެ ޑޮކޮއުމެންޓްސް ފުރިހަމަ ނުވެފައި. ހޯމް މިނިސްޓްރީން އެންގީ މިއަދު ސިޓީ ދޭނެ ކަމަށް،" އެފްއޭއެމް ނޯމަލައިޒޭޝަން ކޮމިޓީގެ ޖެނެރަލް ސެކްރެޓަރީ މުހައްމަދު ވިދާޅުވި އެވެ.
ބޭންކަށް ހުށަހަޅާ ހޯމް މިނިސްޓްރީގެ އެ ލިޔުމުގައި ނޯމަލައިޒޭޝަން ކޮމިޓީއަށް ގެނެވުނު ބަދަލުތައް ފާހަގަކުރަން ޖެހެއެވެ.
އެފްއޭއެމްގެ ބޭންކް އެކައުންޓުން ފައިސާ ނެގެނީ ނޯމަލައިޒޭޝަން ކޮމިޓީގެ ކުރީގެ ޗެއާމަން މުހައްމަދު ޝަވީދު އާއި މެންބަރު އަލީ އުމަރުގެ ސޮއިއާއެކު އެވެ. ނޯމަލައިޒޭޝަން ކޮމިޓީގެ ޗެއާމަން ކަމުން މުހައްމަދު ޝަވީދު އިސްތިއުފާ ދިނުމާ ގުޅިގެން މިހާރު ޗެއާމަންކަމުގެ މަގާމު ފުރަމުންދަނީ އެ ކޮމިޓީގެ ކުރީގެ ޖެނެރަލް ސެކްރެޓަރީ ބައްސާމް އަދީލް ޖަލީލެވެ.