06 Apr 2016, 02:17
މި ހަފްތާގައި ޕެނަމާގެ ލޯ ފާމް މޮސެކް ފޮންސެކާގެ ޑޮކިއުމެންޓްތަކެއް ލީކުވެ، އައިސްލެންޑުގެ ބޮޑުވަޒީރާއި ކޮރަޕްޝަނުގެ ބޮޑު މައްސަލަތަކެއް ފަޅައި އެރުމުގެ ސަބަބުން، އެގައުމުގެ ބޮޑުވަޒީރު ސިގްމަންޑުރ ޑޭވިޑް ގުންލާގްސަން އިސްތިއުފާ ދީފި އެވެ.
މޮސެކް ފޮންސެކާ ލޯ ފާރމް އަކީ ޕެނަމާގެ ކުންފުންޏެކެވެ. އެ ކުންފުނިން ދިޔައީ، ދުނިޔޭގެ ނަން ހިނގާ މަޝްހޫރު މީހުންނާއި، ސިޔާސީ ފަރާތްތަކުން ޓެކްސްއަށް މަކަރު ހެދުމުގައި އެހީތެރިވެ ދިނުމަށް އޮފްޝޯ ކުންފުނިތަކެއް އުފެއްދުމުގައި އެހީތެރިވެދީ، އެކަން ސިއްރު ކުރުމުގެ މަސައްކަތް ކޮށްދީފަ އެވެ.
"ޕެނަމާ ޕޭޕާސް"ގެ ނަމުން މި ޑޮކިއުމެންޓްތައް ލީކުވި އިރު، މި މައްސަލަތަކާ ސައުދީ ރަސްގެފާނާއި، ޗައިނާގެ ރައީސްގެ ދެކަނބަލުންނާއި ރަޝިއާގެ ރައީސް ވްލަޑީމިއަރ ޕޫޓިން އަދި އިންޑިއާގެ މަޝްހޫރު ބައްޗަން އާއިލާފަދަ ފަރާތްތަކާ ގުޅުން ހުރިކަން ވަނީ ފަޅައި އަރައިފަ އެވެ.
އައިސްލެންޑްގެ ބޮޑުވަޒީރު ވެސް ކޮރަޕްޝަނުގެ ބޮޑު މައްސަލައަކާ ގުޅުންހުރިކަމާއި، އެމަނިކުފާނާ ވެސް އޮފްޝޯ ކުންފުންޏަކާ ގުޅުން ހުރިކަން އެނގިގެން ދިޔުމުގެ ސަބަބުން، އައިސްލެންޑުގެ ވެރިރަށް ރޭކްޔަވިކްގައި ގިނަ އަދަދެއްގެ ރައްޔިތުން ވަނީ ސަރުކާރާއި، ބޮޑުވަޒީރާ ދެކޮޅަށް ވަރުގަދަ މުޒާހަރާތަކެއް ކޮށްފަ އެވެ.
އައިސްލެންޑްގެ ވެރިކަން ކުރާ ޕްރޮގްރެސިވް ޕާޓީގެ ޗެއާމަންގެ ނައިބު މިއަދު އެގައުމުގެ ދައުލަތުގެ ރަސްމީ ޓީވީ ޗެނަލް މެދުވެރިކޮށް ދެއްވި ބަޔާނެއްގައި ވިދާޅުވީ، ބޮޑުވަޒީރު ގަންލާގްސަން، އެ މަގާމުން އިސްތިއުފާ ދެއްވާފައިވާ ކަމަށެވެ.
އިސްތިއުފާ ދެއްވުމުގެ ކުރިން މިއަދު ބޮޑުވަޒީރު ގަންލާގްސަން ވަނީ، އެގައުމުގެ ގާނޫނު ހަދާ މަޖިލިސް އުވާލައި، އަލުން އިންތިޚާބެއް ބާއްވައިގެން އާ މަޖިލީހެއް އިންތިޚާބު ކުރުމަށް ހުށަހަޅުއްވައިފަ އެވެ. ނަމަވެސް އެކަމަށް އައިސްލެންޑުގެ ރައީސް އެއްބަސްވެވަޑައި ނުގެންނެވި އެވެ.
އައިސްލެންޑުގެ ބޮޑުވަޒީރަކީ، ޕެނަމާ ޕޭޕާސްގެ މައްސަލައާ ގުޅިގެން އިސްތިއުފާ އިޖާބައެއް ދީ، މަގާމުގެ މަސްއޫލިއްޔަތުން އިސްތިއުފާ ދެއްވި ފުރަތަމަ ފަރާތެވެ.