05 Apr 2016, 09:06
އެމެރިކާގެ ޓެކްސަސްގެ ސްކޫލެއްގައި ކިޔަވަމުންދާ 12 އަހަރުގެ ދަރިވަރަކާ ދިމާލަށް އެކުއްޖާގެ ޓީޗަރަކު "ޓެރަރިސްޓް" އެކޭ ބުނި މައްސަލައެއް ފެންމަތިވެއްޖެ އެވެ.
މީޑިއާ ރިޕޯޓްތައް ބުނާ ގޮތުން، ފަސްޓް ކޮލަނީ މިޑިލް ސްކޫލުގައި ކިޔަވަމުންދާ ވަލީދް އަބޫޝާބަން ނަމަކަށްކިޔާ އެ ދަރިވަރު އިނީ ސްކޫލުން ދިން ޓެސްޓެއް ނިންމާލުމަށްފަހު އެހެން ދަރިވަރުންނާއެކު "ބެންޑު އިޓް ލައިކް ބެކަމް" ނަމަކަށް ކިޔާ ފިލްމެއް ބަލާށެވެ.
"އަޅުނގަޑުމެން ތިބީ ކުލާހުގައި ފިލްމެއް ބަލަން. ދެން އަޅުނގަޑު ފިލްމު ބަލަމުން ހޭންފެށުމުން ޓީޗަރު ބުނީ، އަޅުނގަޑު ނަމަ ޓީޗަރު ނުހޭނެ ކަމަށް. ކީއްވެގެންތޯ އަޅުނގަޑު އެހުމުން ބުނީ ޓީޗަރުމެން އެންމެ ދެކެނީ އަޅުގަނޑަކީ ޓެރަރިސްޓެއްގެ ގޮތުގައޭ،" އަބުޝާބަން ބުންޏެވެ.
އޭނާ ބުނީ، އެހެން ޓީޗަރު ބުނުމުން ކުލާހުގެ އެހެން ކުދިން އޭނާއަށް މަލާމާތްކޮށް "ބޮމެއް ފެންނަ" ކަމަށް ބުނި ކަމަށެވެ.
އަބުޝާބަން އާ ދިމާލަށް ޓެރަރިސްޓެކޭ ބުނި މައްސަލަ ފެންމަތިވުމާ ގުޅިގެން އެހެން ބުނި ޓީޗަރު މިހާރު ހުރީ މުސާރަ ހިނގާގޮތަށް ގެއަށް ފޮނުވާލާފައެވެ. އަދި އަބުޝާބަންގެ އާއިލާ އިން ބޭނުންވަނީ އެ ޓީޗަރު ވަޒީފާއިން ވަކިކޮށް ސްކޫލުގެ ފަރާތުން ދީންތަކަށް އިހުތިރާމްކުރުމަށް ދަރިވަރުންނާ ޓީޗަރުން ތަމްރީން ކުރުމަށެވެ.
އަބުޝާބަންގެ ބައްޕަ މާލިކް ބުނީ، އޭނާގެ ދަރިފުޅަކީ މުސްލިމެއް ކަމަކު އޭގެ މާނައަކީ އޭނާއަކީ ޓެރަރިސްޓެއް ނޫން ކަމަށެވެ.
"އަަހަރެންގެ ދަރިފުޅަކީ އެމެރިކާގެ ރައްޔިތެއް. އެހެން މީހުންނެކޭ އެއްގޮތަށް އޭނާ އަކީ އެމެރިކާގެ ރައްޔިތެއް. އޭނާ އުފަންވެފައިވަނީ އެމެރިކާއަށް... އޭނާއަށް އެމެރިކާގެ ރައްޔިތަކަށް ވުމަށް އިނގެންޖެހޭ ހުރިހާ އެއްޗަކީ އެއީ،" އަބުޝާބަން ގެ ބައްޕަ މާލިކް ބުންޏެވެ.
މައުލޫމާތު: ނިއުޔޯކް ޑެއިލީ ނިއުސް، ދަ އިންޑިޕެންޑެންޓް