04 Apr 2016, 10:43
ޓްރާސްޕޯޓް އޮތޯރިޓީން ދެމުންގެންދާ ހުރިހާ ހިދުމަތްތަކެއް ލ. އަތޮޅުން ލިބޭނެ ގޮތް ހަމަޖައްސައިފި އެވެ.
ޓްރާންސްޕޯޓް އޮތޯރިޓީގެ ޗެއާމަން އަބްދުއްރަޝީދު ނާފިޒް ވިދާޅުވީ، ޓްރާސްޕޯޓް އޮތޯރިޓީންދޭ ހިދުމަތްތައް ރާއްޖޭގެ އެކިކަންކޮޅުތަކަށް ފޯރުކޮށްދިނުމުގެ ގޮތުން ލ. އަތޮޅުގައި އެ އޮތޯރިޓީން ދޭ ހިދުމަތްތައް ދޭން ފަށާފައިވަނީ އިއްޔެ ކަމަށެވެ.
އެގޮތުން ލ. އަތޮޅު ކައުންސިލާއެކު ޓްރާސްޕޯޓް އޮތޯރިޓީން ވަނީ އިއްޔެ އެމްއޯޔޫއެއްގައި ސޮއިކޮށްފައެވެ.
ނާފިޒް ވިދާޅުވީ، ލ. އަތޮޅުގައި ހިދުމަތްތައް ދޭން ފެށުމުން މިހާރު ރާއްޖޭގެ ހަ އަތޮޅެއް ފިޔަވައި އެހެން ހުރިހާ އަތޮޅެއްގައި ޓްރާސްޕޯޓް އޮތޯރިޓީގެ ހިދުމަތްތައް ލިބޭނެ ކަމަށެވެ. އަދި އެ އޮތޯރިޓީގެ ހިދުމަތްތައް މިހާރު ރާއްޖޭގެ އާބާދީގެ 90 ޕަސެންޓަށް ލިބިގެންދާނެ ކަމަށް ވެސް އޭނާ ވިދާޅުވި އެވެ.
"ލ. އަތޮޅުގައި ހިދުމަތްތައް ގާއިމްކުރުމުން ތަފާތުކުރުމެއްނެތި ހިދުމަތް ލިބޭނެ. އަދި އެއްވެސް ކަމެއް ހޯދުމަށް މާލެ ވަޑައިގަންނަވާކަށް ނުޖެހޭނެ،" ނާފިޒް ވިދާޅުވި އެވެ.
ލ. އަތޮޅުގައި އިއްޔެ ފެއްޓި އެ ހިދުމަތްތަކުގެ ތެރޭގައި ޓްރާސްޕޯޓް އޮތޯރިޓީންދޭ ކަނޑާއި އެއްގަމުގެ ރަޖިސްޓްރީއާ ލައިސެންސްގެ އިތުރުން ޕްރިންޓްކުރުމުގެ ހިދުމަތް ވެސް ލިބިގެންދާނެ އެވެ.
ޓްރާސްޕޯޓް އޮތޯރިޓީންދޭ ހިދުމަތްތައް ލ. އަތޮޅުގައި ދޭން ފެށުމުން އެ އަތޮޅު ކައުންސިލުން ހަރަދުކޮށްގެން ހަދާފައިވާ ޑްރައިވިން ޓްރެކެއް ވެސް ވަނީ އިއްޔެ ހުޅުވާފައެވެ.
ލ. އަތޮޅު ކައުންސިލުގެ ރައީސް ޔޫސުފް އާމިރު ވިދާޅުވީ، އެ ޓްރެކަކީ ޓްރާސްޕޯޓް އޮތޯރިޓީގެ މިންގަނޑަށް ފެތޭގޮތަށް އެ ކައުންސިލުން ހަ ލައްކައަށްވުރެއް ގިނަ ރުފިޔާ ހަރަދުކޮށްގެން ހަދާފައިވާ ޓްރެކެއް ކަމަށެވެ.