03 Apr 2016, 09:42
އެފްރިކާގެ ބޮޓްސްވާނާގައި ތަމްރީން ހަދަމުންދާ ރާއްޖޭގެ ޒުވާން އެތުލީޓުންގެ ޓީމުން ހަތަރެއް ގުނަ 200 މީޓަރު ރިލޭ ދުވުމުން ގައުމީ ރެކޯޑް އާކޮށްފި އެވެ.
މޯލްޕޯލް ސްޕޯޓްސް ކޮމްޕްލެކްސްގައި ކުރިއަށްދިޔަ ރިލޭ މުބާރާތުގައި ގައުމީ ރެކޯޑް އާކުރި ޓީމުގައި ހިމެނެނީ އިބްރާހިމް އަޝްފާން އަލީ (އައްޕި) އާއި، އަލީ ޝާމްއާއި، މުހައްމަދު ނާއިލް އަދި އަހްމަދު އަނޫފް އެވެ.
ރިލޭ މުބާރާތުގައި އައްޕި، ޝާމް، ނާއިލް އަދި އަނޫފް ހިމެނޭ ރާއްޖޭގެ ޒުވާން ޓީމުން ހަތަރެއް ގުނަ 200 މީޓަރު ރިލޭގެ ގައުމީ ރެކޯޑް އާކުރީ 1:31.70 މިނެޓުން ރޭސް ނިންމައިގެންނެވެ. ކުރިން މި ރެކޯޑް އޮތީ 1:45.36 މިނެޓުން ރެކޯޑް ހެދި މަޖީދިއްޔާ ސްކޫލް ޓީމު އަތުގައެވެ. އެ ޓީމު ރާއްޖޭގެ ރެކޯޑް ހަދާފައިވަނީ 2010 ވަނަ އަހަރެވެ.
މޯލްޑިވްސް އޮލިމްޕިކް ކޮމިޓީން ދިން ތަމްރީން ސްކޮލާޝިޕެއްގައި ރާއްޖޭގެ ޒުވާން ހަތަރު އެތުލީޓުން ކަމަށްވާ އައްޕިއާއި، ޝާމްއާއި، ނާއިލް އަދި އަނޫފް ބޮޓްސްވާނާއަށް ފުރީ މިދިޔަ ފެބްރުއަރީ މަހުގެ ފަހުކޮޅެވެ.
އެ ހަތަރު އެތުލީޓުން ބޮޓްސްވާނާގައި ތަމްރީން ހަދަމުންދަނީ ރިއޯ 2016 އާއި ޔޫތު އޮލިމްޕިކް ގޭމްސް 2018 އަށް ތައްޔާރުވުމަށެވެ.