01 Apr 2016, 21:30
ހަނގުރާމަވެރި ހަތިޔާރު ރާއްޖެ އެތެރެކޮށް ގެންގުޅުނުކަމުގެ ކުށް ސާބިތުވެ 11 އަހަރުގެ ޖަލުހުކުމެއް ތަންފީޒުކުރަމުންދާ ކުރީގެ ޑިފެންސް މިނިސްޓަރު ކާނަލް މުހައްމަދު ނާޒިމް ބޭސްފަރުވާއަށް ސިންގަޕޫރުގައި ހުންނެވުމަށް ދިން ތިން ހަފްތާ ދެ ހަފްތާއަށް ކުރުކޮށްލައި މާލެއަންނަން އަންގައިފި އެވެ.
ކާނަލް ނާޒިމްއަށް ދިން ތިން ހަފްތާގެ މުއްދަތު ހަމަވާނީ އޭޕްރީލް އަށްވަނަ ދުވަހަށެވެ. ނަމަވެސް އޭޕްރީލް ދެވަނަ ދުވަހު ނާޒިމް މާލެއައުމަށް އަންގާފައިވާ ކަމަށް ކަރެކްޝަނަލް ސާވިސްއިން ވަނީ ބުނެފަ އެވެ. އަދި އެގޮތަށް އެންގީ ހޯމް މިނިސްޓްރީއިން ކަރެކްޝަނަށް އަންގައިގެން ކަމަށް ކަރެކްޝަންސްގެ މީޑިއާ އޮފިޝަލު ވިދާޅުވި އެވެ.
އެނގިފައިވާ ގޮތުން ކަރެކްޝަނުން އެގޮތަށް އަންގާފައިވަނީ ލޮލުގެ ފަރުވާއަށް މަދުވެގެން އިތުރު ތިން ހަފްތާ ބޭނުންވާ ކަމަށް ބުނެ ސިންގަޕޫރަށް ދެއްކި ޑޮކްޓަރުންގެ ލިޔުން ކަރެކްޝަނަށް ހުށަހަޅާފައިވަނިކޮށެވެ.
ނާޒިމްގެ މައްޗަށް ކޮށްފައިވާ 11 އަހަރުގެ ޖަލުހުކުމުގެ އިސްތިއުނާފު މައްސަލަ ނިންމައި ހައިކޯޓުން ވަނީ އެހުކުމް ދަމަހައްޓަން ތާއީދުކޮށްފަ އެވެ. ނާޒިމްގެ އާއިލާއިން ބުނެފައި ވަނީ ހައިކޯޓުގެ ނިންމުމަށް ތާއީދު ނުކުރާ ކަމަށާއި އެހުކުމް ސުޕްރީމް ކޯޓުގައި އިސްތިއުނާފު ކުރާނެ ކަމަށެވެ.
ނާޒިމްގެ ޖަލު ހުކުމް ހައިކޯޓަށް އިސްތިއުނާފަށް ހުށަހަޅާފައި ވަނިކޮށްވެސް ނާޒިމް ވަނީ ބޭސްފަރުވާއަށް ސިންގަޕޫރަށް ވަޑައިގެންފަ އެވެ. ލޮލުގެ ބައްޔަށް ފަރުވާ ހޯދުމަށް ނާޒިމް ވަނީ ސިންގަޕޫރުގައި 44 ދުވަސް މިދއަ އަހަރުގެ އޭޕްރީލް 10 އަކުންފެށުގެން ވަނީ ހޭދަކުރައްވާފަ އެވެ.
ނާޒިމްގެ މައްޗަށް ހަނގުރާމަވެރި ހަތިޔާރު ރާއްޖެއެތެރެކޮށް ގެންގުޅުމުގެ ދައުވާ އުފުލާފައި ވަނީ ރާއްޖެ އަށް ގެނައުން މަނާތަކެތީގެ ގާނޫނުގެ ދެވަނަ މާއްދާގެ (ހ) އާއި އެ ގާނޫނުގެ ނުވަ ވަނަ މާއްދާއާ ހަވާލާދީ އެ ގާނޫނުގެ 13 ވަނަ މާއްދާގެ (ހ)ގެ ދަށުންނެވެ.