01 Apr 2016, 19:27
ރާއްޖެއަށް މަސްތުވާތަކެތި އެތެރެކުރި މައްސަލައެއްގެ ތުހުމަތުގައި ފަސް މީހަކު ހައްޔަރުކޮށްފި އެވެ.
ފުލުހުން ބުނީ ހާއްސަ އޮޕަރެޝަނެއްގެ ދަށުން ހައްޔަރުކުރި މީހުންގެ ތެރޭގައި ހިމެނެނީ ހަތަރު ދިވެއްސަކާ ބަންގްލަދޭޝް މީހެއް ކަމަށެވެ. ދިވެހިންގެ ތެރޭގައި ހިމެނެނީ 26 އަހަރާއި 41 އަހަރާއި 35 އަހަރާއި 25 އަހަރުގެ މީހުން ކަމަށާއި ބަންގްލަދޭޝް މީހާއަކީ 48 އަހަރުގެ މީހެއް ކަމަށްވެސް ފުލުހުން ވަނީ ބުނެފަ އެވެ.
އެމީހުން ހައްޔަރުކޮށްފައިވަނީ، ރާއްޖެއަށް ބަޔަކު މަސްތުވާތަކެތި ދިރުވާލައިގެން އެތެރެކޮށްފައިވާކަމުގެ މައުލޫމާތު 2016 މާރިޗް 30 ވަނަ ދުވަހު ފުލުހުންނަށް ލިބުމާ ގުޅިގެން ޑްރަގް އެންފޯސްމަންޓް ޑިޕާޓްމަންޓުން ހިންގި އޮޕަރޭޝަނެއްގައި ކަމަށް ފުލުހުން ބުންޏެވެ.
މަސްތުވާތަކެތި އެތެރެކުރި ކަމަށް ތުހުމަތުކުރެވޭ މީހާ ފިހާރައެއްގައި ހުއްޓައި ފުލުހުންގެ ބެލުމުގެ ދަށަށްގެނެސް ބަލައި ފާސްކުރި އިރު، އޭނާ ލައިގެންހުރި ސޯޓުގެ ޖީބުން ވަނީ މަސްތުވާތަކެތި ކަމަށް ބެލެވޭ އެއްޗެއްހުރި ރަބަރު 2 ޕެކެޓް ފެނިފައިވާ ކަމަށް ފުލުހުން ބުންޏެވެ.
ފުލުހުން ބުނީ މައްސަލާގައި ހިމެނޭކަމަށް ތުހުމަތު ކުރެވޭ އިތުރު މީހުން ހައްޔަރުކޮށްފައިވަނީ ކޯޓު އަމުރެއްގެ ދަށުން މައްޗަންގޯޅީގައި ހުންނަ ގަރާޖެއް ކައިރިން ކަމަށެވެ. މައްސަލާގައި ހައްޔަރުކޮށްފައިވާ މީހުން ދިރިއުޅޭ، މއ. ސާދީވިލާގެ ކޯޓު އަމުރެއްގެ ދަށުން ބަލައި ފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއްހުރި 28 ބުލެޓް ފެނިފައިވާ ކަމަށްވެސް ފުލުހުން ބުންޏެވެ.
އެމީހުންގެ ބަންދަށް ކޯޓުން ވަނީ 10 ދުވަސް ޖަހާފަ އެވެ.