30 Mar 2016, 15:53
ބާރަ ދާއިރާއަކުން ކިޔެވުމަށް ޗައިނާ ސަރުކާރުން ދީފައިވާ ހަ ސްކޮލަޝިޕަށް ކުރިމަތިލުމުގެ ފުރުސަތު ޑިޕާޓްމަންޓް އޮފް ހަޔާ އެޑިއުކޭޝަން އިން ހުޅުވާލައިފި އެވެ.
އެ ޑިޕާޓްމަންޓުން ނެރުނުއިއުލާނެއްގައިބުނެފައި ވަނީ ޖުމްލަ 12 ދާއިރާއަކުން ކިޔެވުމަށް ހަ ސްކޮލަޝިޕް ފުރުސަތު ހުޅުވާލާފައިވާ ކަމަށެވެ.
ޗައިނާ ސަރުކާރުން ހުޅުވާލާފައި ވަނީ ހަމައެކަނި މާސްޓާސް ޑިގްރީ އަދި ޕީއެޗްޑީ އަށް ކިޔެވުމުގެ ފުރުސަތެވެ.
ޗައިނީޒް ސްކޮލަޝިޕް ކައުންސިލްއިން ސްކޮލާޝިޕްދޭން ނިންމާފައިވާ ދާއިރާތަކުގެ ތެރެއިން ސްކިލް ޝޯޓޭޖް ލިސްޓްގައި ހިމަނާފައި ވަނީ ސައިންސާއި، އިންޖިނިއަރިން، އެގްރިކަލްޗާ، މެޑިސިން، އިކޮނޮމިކްސް، ފިލޯސޮފީ، ލީގަލް ސްޓަޑީޒް، ފައިން އާރޓްސް، މެނޭޖްމަންޓް، އެޑިޔުކޭޝަން، ހިސްޓްރީ އަދި ލިޓްރެޗާ އެވެ.
ޑިޕާޓްމަންޓު އޮފް ހަޔާ އެޑިއުކޭޝަނުން ބުނެފައި ވަނީ ސްކޮލަޝިޕް ލިބޭ ދަރިވަރުން ކިޔަވަންދާން ޖެހޭ ޔުނިވަސިޓީއަކާއި، ކިޔަވަންޖެހޭ ބަހެއް އެނގޭނީ ޗައިނީޒް ސްކޮލަރޝިޕް ކައުންސިލް އިން ޕްލޭސްމަންޓް ހަމަޖެހިގެން އައުމުން ކަމަށެވެ.
އަދި ޕްލޭސްމަންޓް ލިބޭ ޔުނިވަސިޓީގެ ގޮތުން މުޅި ކޯސް ޗައިނީޒް ބަހުން ވެސް ކުރިއަށް ގެންދަން ޖެހިދާނެ ކަމަށެވެ.
"ޗައިނީޒް ބަހުން މުޅި ކޯސް ފުރިހަމަ ކުރަންޖެހޭ ގޮތަށް ޕްލޭސްމަންޓް ހަމަޖެހިގެން އަތުވެއްޖެ ނަމަ ކޯސް ދޫކޮށްލުމުގެ އިޙްތިޔާރު ކެންޑިޑޭޓަށް ލިބިގެންވެ އެވެ." އިއުލާނުގައިވެ އެވެ.
ޗައިނީޒް ބަހުން ކޯސް ހަދަން ޖެހޭ ނަމަ އެއް އަހަރު ނުވަތަ ދެ އަހަރުގެ ލެންގުއޭޖް ކޯހެއް ފުރިހަމަ ކުރަންޖެހޭނެ އެވެ.
ސްކޮލާޝިޕަށް ހުށަހަޅާ ފަރާތްތަކަކީ 40 އަހަރު ފުރިފައި ނުވާ ފަރާތްތަކަށް ވުމުގެ އިތުރުން، ކޯހާ ގުޅޭ ދާއިރާއަކުން ޑިގްރީއެއް ނުވަތަ މާސްޓަސް ޑިގްރީއެއް ހާސިލްކޮށްފައިވާ ފަރާތަކަށް ވާން ޖެހެ އެވެ.
އޭޕްރީލް 10 ވަނަ ދުވަހުގެ ކުރިން ސްކޮލާޝިޕަށް އެދި ފޯމް ހުށަހަޅަން ޖެހޭ އިރު، ސްކޮލާޝިޕަށް ހޮވޭ ފަރާތްތަކުގެ ހުރިހާ ހަރަދެއް ޗައިނާ ސަރުކާރުން ހަމަޖައްސައިދޭނެ އެވެ.